തിരുവനന്തപുരം; സംസ്ഥാന തലസ്ഥാനം തിരുവനന്തപുരത്ത് നിന്ന് കൊച്ചിയിലേക്ക് മാറ്റണമെന്ന ഹൈബി ഈഡന്റെ അഭിപ്രായത്തെ ട്രോളി കേരള പോലീസും. ഹെൽമറ്റ് ബോധവൽക്കരണ സന്ദേശത്തിനായിട്ടാണ് ഹൈബിയുടെ നിർദ്ദേശം പോലീസ് കടംകൊണ്ട് ട്രോളാക്കി മാറ്റിയത്.
നിയമസഭാ മന്ദിരത്തിന് മുൻപിലെ റോഡിലൂടെ അലക്ഷ്യമായി ഹെൽമറ്റ് കൈയ്യിലിട്ട് ബൈക്കിൽ പോകുന്ന യാത്രക്കാരന്റെ ചിത്രം സഹിതമായിരുന്നു ഔദ്യോഗിക സോഷ്യൽ മീഡിയ പേജുകളിലൂടെ കേരള പോലീസിന്റെ ഉപദേശം. തല ‘സ്ഥാനം’ മാറാതിരിക്കാൻ ഹെൽമറ്റ് തലയിൽ തന്നെ വെയ്ക്കണേ എന്ന ക്യാപ്ഷനോടെയാണ് ചിത്രം സോഷ്യൽ മീഡിയ കാർഡാക്കി പോസ്റ്റ് ചെയ്തത്.
ചിത്രത്തിന് രസകരമായ നൂറുകണക്കിന് കമന്റുകളാണ് ലഭിച്ചത്. ട്രോൾ ആശയം മനസിലാക്കിയ സമൂഹമാദ്ധ്യമ ഉപയോക്താക്കൾ അതേരീതിയിൽ തന്നെ പ്രതികരിക്കുകയും ചെയ്തു. പെർഫക്ട് ട്രോൾ അതും ഇത്ര നല്ല സന്ദേശം അടങ്ങിയതെന്ന് പറഞ്ഞ് ചിലർ പോലീസിനെ അഭിനന്ദിച്ചു. മറ്റ് ചിലർ ഒരു എംപിയെ ഇങ്ങനെയൊക്കെ ട്രോളാമോ എന്ന സംശയം പങ്കുവെച്ചു.
ക്യാപ്ഷൻ ഒരു രക്ഷേം ഇല്ല സാറെ, ഇനി കൈയ്യിൽ ഹെൽമറ്റ് ഇടില്ലെന്ന് കുമ്പസാരിച്ചവരും തല ‘സ്ഥാനം’ മാറിയാലും വേണ്ടില്ല പിഴ മുഖ്യം ബിഗിലേ എന്ന് തിരിച്ചു ട്രോളിയവരും ഉണ്ട്. തലസ്ഥാനം കൊച്ചിയിലേക്ക് മാറ്റണമെന്ന് ആവശ്യപ്പെട്ട് ഹൈബി ഈഡൻ പാർലമെന്റിൽ സ്വകാര്യ ബില്ല് അവതരിപ്പിക്കാൻ അനുമതി തേടിയത് രണ്ട് ദിവസമായി സംസ്ഥാനത്ത് രാഷ്ട്രീയ ചർച്ചയാണ്. ഇതിന്റെ ചുവടുപിടിച്ചാണ് പോലീസിന്റെ ട്രോൾ.
Discussion about this post