വ്യത്യസ്ത വിഭാഗക്കാരുടെ ആചാരങ്ങളുടെ ഭാഗമായി പലരും മരത്തെയും വാഴയെയും വിവാഹം കഴിച്ച സംഭവങ്ങൾ ചർച്ചയായിട്ടുണ്ട്. നായ്ക്കളെ വിവാഹം കഴിക്കുന്നനവരുമുണ്ട്. എന്നാൽ ഒരു മുതലയെ വിവാഹം കഴിച്ചാൽ എന്തായിരിക്കും അവസ്ഥ ? അതും ഒരു ജനപ്രതിനിധി.
ഇത്തരത്തിലൊരു സംഭവമാണ് മെക്‌സിക്കോയിൽ നിന്ന് പുറത്തുവരുന്നത്. മെക്‌സിക്കോയിലെ സാൻ പെഡ്രോ ഹുവാമേലൂലയിലെ മേയർ വിക്ടർ ഹ്യൂഗോ സോസ വിവാഹം ചെയ്തത് ഒരു പെൺമുതലയെയാണ്.
നൂറ്റാണ്ടുകൾ പഴക്കമുള്ള ഒരു ആചാരത്തിന്റെ ഭാഗമായാണ് വിവാഹം നടന്നത്. ജനങ്ങൾക്ക് ഭാഗ്യം വരാനും നല്ല വിളവെടുപ്പ് നടക്കാനുമാണ് ഇത്തരത്തിൽ വിവാഹം കഴിക്കുന്നത്. ഇങ്ങനെ ചെയ്താൽ കടലിൽ ചാകര ഉണ്ടാകുമെന്നും ഇവിടുത്തുകാർ വിശ്വസിക്കുന്നു.
വെള്ളിയാഴ്ച്ച ഒസാക്കയിലെ വടക്കൻ പ്രദേശത്തെ ടൗൺഹാളിൽ വെച്ചാണ് വിവാഹം നടന്നത്. ഏഴു വയസ്സുള്ള മുതലയെ ‘രാജകുമാരി’ എന്നാണ് വിശേഷിപ്പിക്കുന്നത്. വെള്ള വിവാഹ വസ്ത്രവും തലയിലൂടെ ഷാളും അണിഞ്ഞാണ് മുതലയെ എത്തിച്ചത്. വായും കൈയും കെട്ടിയിടും. വാദ്യഘോഷങ്ങളോടും നൃത്തച്ചുവടുകളോടൊപ്പം മുതലയെ വിവാഹ വേദിയിൽ എത്തിക്കും. ഈ മുതലയെ മേയർക്ക് കൈമാറും.
വിവാഹശേഷം വധുവിനൊപ്പം വരൻ നൃത്തം ചെയ്യും. വധുവിനെ വരൻ ചുംബിക്കുന്നതോടെയാണ് ചടങ്ങുകൾ അവസാനിക്കുന്നത്. പ്രണയമില്ലാതെ ആർക്കും വിവാഹം കഴിക്കാൻ സാധിക്കില്ലെന്നും തങ്ങൾ പരസ്പരം സ്നേഹിക്കുന്നുവെന്നും വിവാഹത്തിന് ശേഷം മേയർ പറഞ്ഞു.
Discussion about this post