കുട്ടിക്കാലത്ത് അനുഭവിക്കുന്ന പീഡനങ്ങളും അവഗണനയും പിന്നീടുള്ള ജീവിതത്തിലെ മാനസികാരോഗ്യത്തെ ബാധിക്കുന്നത് ആ സംഭവങ്ങള് എത്തരത്തില് ഓര്ത്തുവെക്കുന്നുവെന്നതിനെ ആശ്രയിച്ചിരിക്കുമെന്ന് ഗവേഷണ റിപ്പോര്ട്ട്. അത്തരം അനുഭവങ്ങളേക്കാള് അവയെ കുറിച്ചുള്ള ഓര്മ്മകളാണ് മനസ്സിനെ കൂടുതല് മുറിവേല്പ്പിക്കുന്നതെന്ന കണ്ടെത്തലാണ് ഗവേഷണം പങ്കുവെക്കുന്നത്.
കിംഗ്സ് കോളേജ് ലണ്ടന്, സിറ്റി യൂണിവേഴ്സിറ്റി ന്യൂയോര്ക്ക് എന്നിവിടങ്ങളിലെ സൈക്യാട്രി, സൈക്കോളജി, ന്യൂറോസയന്സ് ഇന്സ്റ്റിറ്റ്യൂട്ട് നടത്തിയ പുതിയ ഗവേഷണമാണ് കുട്ടിക്കാലത്തെ പീഡനത്തിന്റെയും അവഗണനയുടെയും ഓര്മ്മകള് പില്ക്കാലത്ത് മാനസികാരോഗ്യത്തെ പിടിച്ചുലച്ചേക്കുമെന്ന് പറയുന്നത്. രേഖകളെ അടിസ്ഥാനമാക്കിയുള്ള തെളിവുകളുടെ അഭാവത്തിലും, ഇത്തരം ഓര്മ്മകള് പങ്കുവെക്കുന്ന രോഗികള്ക്ക് ഭാവിയില് മാനസിക ആരോഗ്യ പ്രശ്നങ്ങള് ഉണ്ടാകാനുള്ള സാധ്യത ഡോക്ടര്മാര് കണക്കിലെടുക്കണമെന്നും നേരത്തെ തന്നെ രോഗം വരാതിരിക്കാനുള്ള മുന്കരുതലുകള് എടുക്കണമെന്നും ഗവേഷകര് നിര്ദ്ദേശിക്കുന്നു.
കുട്ടിക്കാലത്തെ പീഡനമോ അവഗണനയോ തെറ്റായ രീതിയിലുള്ള പെരുമാറ്റമോ വലുതാകുമ്പോള് വൈകാരിക തകരാറുകള്ക്ക് ഇടയാക്കുന്നുണ്ടോ എന്നത് കണ്ടെത്തുന്നതിനായി നാല്പ്പത് വയസ്സ് വരെ പ്രായമുള്ള 1,196 പേരിലാണ് ഗവേഷകര് പഠനം നടത്തിയത്. ഇതില് താരതമ്യേന പ്രായം കുറഞ്ഞ, 12 വയസ്സിന് മുമ്പായി മേല്പ്പറഞ്ഞ തരത്തിലുള്ള അനുഭവങ്ങള് ഉണ്ടായിട്ടുള്ളവര് പിന്നീടുള്ള പത്ത് വര്ഷത്തില് വലിയ രീതിയിലുള്ള വിഷാദ, ഉത്കണ്ഠ പ്രശ്നങ്ങള് നേരിടുന്നതായി ഗവേഷകര് കണ്ടത്തി. അതേസമയം കുട്ടിക്കാലത്തെ മോശം അനുഭവങ്ങള് ഓര്ത്തുവെക്കാത്തവരില് അല്ലെങ്കില് കാലക്രമേണ അവ മറന്നുപോയവരില് മാനസികപ്രശ്നങ്ങള് കുറവായും കാണപ്പെട്ടു.എന്നാല് കുട്ടിക്കാലത്തെ ദുരനുഭവങ്ങള് ഓര്ത്തുവെക്കാത്തവരിലും (എന്നാല് ഇത് സംബന്ധിച്ച് കോടതി മൊഴി രേഖപ്പെടുത്തിയവര്) വലുതായപ്പോള് മാനസികാരോഗ്യപ്രശ്നങ്ങള് റിപ്പോര്ട്ട് ചെയ്തു.
കുട്ടികളിലും യുവാക്കളിലും മാനസികാരോഗ്യ പ്രശ്നങ്ങള് ഉണ്ടാകുന്നത് നേരത്തേ കണ്ടെത്തുന്നതിനും തടയുന്നതിനും ചികിത്സിക്കുന്നതിനും പുതിയ വഴികള് കണ്ടെത്തുന്നതിന് വേണ്ടിയുള്ള പ്രത്യേക പരിപാടിയുടെ ഭാഗമായിരുന്നു ഈ ഗവേഷണം.
