രണ്ട് കാലാവസ്ഥ ഘടകങ്ങളുടെ ഇടപെടല് കൊണ്ടുണ്ടായ അപൂര്വ്വ പ്രതിഭാസമാണ് വടക്കേ ഇന്ത്യയിലെ പല ഭാഗങ്ങളിലും നിര്ത്താതെ പെയ്യുന്ന പേമാരിക്ക് പിന്നിലെന്ന് റിപ്പോര്ട്ട്. 2013ല് ഉത്തരാഖണ്ഡിലുണ്ടായ ഹിമാലയന് സുനാമിക്ക് സമാനമായ പ്രതിഭാസമാണിത്.
വടക്കേ ഇന്ത്യയിലെ തോരാതെ മഴ പെയ്യുന്ന മേഖലകളുടെ സാറ്റലൈറ്റ് ചിത്രങ്ങളില്, 2013ല് കേദാര്നാഥില് മിന്നല് പ്രളയമുണ്ടാക്കുകയും നൂറുകണക്കിന് ആളുകളുടെ ജീവനെടുക്കുകയും മേഖലയില് കനത്ത നാശനഷ്ടങ്ങള്ക്കിടയാക്കുകയും ചെയ്ത ഹിമാലയന് സുനാമിയോട് വളരെ സാദൃശ്യമുള്ള പ്രതിഭാസമാണ് കാണാനായത്. ഈ പ്രതിഭാസം മൂലം ഞായറാഴ്ച, 24 മണിക്കൂറിനിടെ ഡെല്ഹിയില് 150 മില്ലിമീറ്റര് റെക്കോഡ് മഴയാണ് പെയ്തത്. 1982ന് ശേഷം ഇതാദ്യമായാണ് ഡെല്ഹിയില് ഒറ്റദിവസത്തിനിടെ ഇത്രയധികം മഴ പെയ്യുന്നതെന്ന് കാലാവസ്ഥാ നിരീക്ഷണ കേന്ദ്രം പറയുന്നു. അതേസമയം ഹിമാചല് പ്രദേശിലും ഉത്തരാഖണ്ഡിലും തീവ്ര മഴയ്ക്കും മിന്നല് പ്രളയത്തിനുമുള്ള മുന്നറിയിപ്പുകള് പുറത്തിറക്കിയിട്ടുണ്ട്.
എന്താണ് ഈ അപൂര്വ്വ പ്രതിഭാസത്തിന് കാരണം
മണ്സൂണ് കാറ്റും വെസ്റ്റേണ് ഡിസ്റ്റര്ബന്സും (മെഡിറ്ററേനിയന് മേഖലയില് നിന്നും ആരംഭിച്ച് ഇന്ത്യന് ഉപഭൂഖണ്ഡത്തിന്റെ വടക്കന് മേഖലകളില് അപ്രതീക്ഷിത മഴ പെയ്യിക്കുന്ന ഉഷ്ണമേഖല കാറ്റ്) തമ്മിലുള്ള ഇടപെടലാണ് ഹിമാചല് പ്രദേശിലും ഉത്തരാഖണ്ഡിലും ശക്തമായി മഴ പെയ്യാനുള്ള കാരണമെന്ന് കാലാവസ്ഥാ വകുപ്പ് വ്യക്തമാക്കിയിട്ടുണ്ട്. വടക്കുകിഴക്കന് രാജസ്ഥാനിലും സമീപപ്രദേശങ്ങളിലും സമ്മര്ദ്ദം കുറഞ്ഞ മേഖലകളുണ്ടെന്നാണ് കാലാവസ്ഥാ വകുപ്പിന്റെ നിരീക്ഷണം. മണ്സൂണ് കാറ്റും വെസ്റ്റേണ് ഡിസ്റ്റര്ബന്സും തമ്മിലുള്ള ഇടപെടല് 24-36 മണിക്കൂറുകള് തുടര്ന്നേക്കുമെന്നാണ് സൂചന. വടക്ക് പടിഞ്ഞാറന് ഇന്ത്യയിലെ മിക്ക ഇടങ്ങളിലും ഇതുമൂലം അതിശക്തമായ മഴക്ക് സാധ്യതയുണ്ടെന്നും കാലാവസ്ഥാ വകുപ്പ് മുന്നറിയിപ്പ് നല്കുന്നു.
ഇത്തരം സാഹചര്യങ്ങളെല്ലാം മണ്സൂണ് കാലത്ത് ഇന്ത്യയില് സാധാരണമാണെങ്കിലും മണ്സൂണ് കാറ്റും വെസ്റ്റേണ് ഡിസ്റ്റര്ബന്സും തമ്മിലുള്ള ഇടപെടല് അപൂര്വ്വമാണ്.
എന്താണ് മണ്സൂണ് കാറ്റും വെസ്റ്റേണ് ഡിസ്റ്റര്ബന്സും
മെഡിറ്ററേനിയന് മേഖലയില് നിന്ന് ഉത്ഭവിക്കുന്ന മര്ദ്ദം കുറഞ്ഞ കാറ്റ് അഥവാ എക്സ്ട്രാട്രോപ്പിക്കല് സ്റ്റോം ആണ് വെസ്റ്റേണ് ഡിസ്റ്റര്ബന്സ്. അത് മിഡിഈസ്റ്റ്, ഇറാന് എന്നിവിടങ്ങളിലൂ െകിഴക്കന് മേഖലയിലേക്ക് കടക്കുമ്പോള് ഇന്ത്യന് ഉപഭൂഖണ്ഡത്തിലെ കാലാവസ്ഥകളില് മാറ്റമുണ്ടാകുന്നു. വടക്കേ ഇന്ത്യയിലെ കാലാവസ്ഥയിലാണ് വെസ്റ്റേണ് ഡിസ്റ്റര്ബന്സ് വലിയ മാറ്റങ്ങളുണ്ടാക്കുന്നത്. ഇത് ഇന്ത്യയിലേക്ക് അടുക്കുമ്പോള് രാജ്യത്തിന്റെ വടക്ക് പടിഞ്ഞാറന് മേഖലകള് മേഘാവൃതമായും മഴയും ചിലപ്പോള് ഹിമാലയന് മേഖലകളില് മഞ്ഞുവീഴ്ചയും ഉണ്ടാകും.
അതേസമയം മണ്സൂണ് കാറ്റ് എന്നത് ഇന്ത്യന് ഉപഭൂഖണ്ഡത്തില് പ്രബലമായ, ഇന്ത്യയില് മണ്സൂണ് എത്തിക്കുന്ന ഋതുഭേദങ്ങളെ അടിസ്ഥാനപ്പെടുത്തിയുള്ള കാറ്റിന്റെ വിന്ന്യാസങ്ങളാണ്. തെക്ക്പടിഞ്ഞാറന് മണ്സൂണും വടക്ക്കിഴക്കന് മണ്സൂണുമാണ് കാറ്റിന് കാരണമാകുന്നതും രാജ്യത്ത് വേനല്ക്കാലത്തും മഞ്ഞുകാലത്തും ആവശ്യത്തിന് മഴ പെയ്യിക്കുന്നതും.
Discussion about this post