ലോകത്തിലെ ഏറ്റവും ദുര്ബലമായ നാലാമത്തെ പാസ്പോര്ട്ട് പാക് പാസ്പോര്ട്ട് ആണെന്ന് റിപ്പോര്ട്ട്. ആഗോള സിറ്റിസണ്ഷിപ്പ് ആന്ഡ് റെസിഡന്സി അഡൈ്വസറി കമ്പനിയായ ഹെന്ലി ആന്ഡ് പാര്ട്ണേഴ്സിന്റെ പാസ്പോര്ട്ട് സൂചികയിലാണ് പാകിസ്താന് പാസ്പോര്ട്ടിനെ ലോകത്തിലെ ഏറ്റവും ദുര്ബലമായ പാസ്പോര്ട്ടുകളിലൊന്നായി പട്ടികപ്പെടുത്തിയിരിക്കുന്നത്. പട്ടികയിലുള്ള 199 രാജ്യങ്ങളില് നൂറാംസ്ഥാനത്താണ് പാകിസ്താന്. ഒരു രാജ്യത്തെ നിവാസികള്ക്ക് വിസ ഇല്ലാതെ പോകാന് കഴിയുന്ന സ്ഥലങ്ങളുടെ എണ്ണത്തിന്റെ അടിസ്ഥാനത്തിലാണ് പട്ടിക തയ്യാറാക്കിയിരിക്കുന്നത്.
ഈ വര്ഷം ആദ്യം ലണ്ടന് ആസ്ഥാനമായ അഡൈ്വസറി കമ്പനിയും പാകിസ്താനെ ലോകത്തിലെ ഏറ്റവും മൂല്യം കുറഞ്ഞ പാസ്പോര്ട്ടുകളുള്ള രാജ്യങ്ങളിലൊന്നായി പട്ടികപ്പെടുത്തിയിരുന്നു. കഴിഞ്ഞ വര്ഷം ജനുവരി വരെ പാക്കിസ്താനികള്ക്ക് 35 രാജ്യങ്ങളില് വിസയില്ലാതെ അഥവാ വിസ-ഓണ് അറൈവല് മുഖേന പോകാന് കഴിയുമായിരുന്നെങ്കില്, ഈ വര്ഷം അത് 33 രാജ്യങ്ങളായി കുറഞ്ഞു.
പട്ടികയില് ഒന്നാംസ്ഥാനത്ത് സിംഗപ്പൂര് ആണ്. കഴിഞ്ഞ അഞ്ചുവര്ഷമായി ഒന്നാംസ്ഥാനത്തുണ്ടായിരുന്ന ജപ്പാനെ പിന്തള്ളിക്കൊണ്ടാണ് സിംഗപ്പൂര് ഒന്നാംസ്ഥാനത്ത് എത്തിയിരിക്കുന്നത്. സിംഗപ്പൂരുകാര്ക്ക് 193 സ്ഥലങ്ങളിലേക്ക് വിസയില്ലാതെ യാത്ര ചെയ്യാം. അതേസമയം ജപ്പാനൊപ്പം മൂന്നാംസ്ഥാനം പങ്കിടുന്ന ദക്ഷിണ കൊറിയ, ഓസ്ട്രിയ, ഫിന്ലന്ഡ്,ഫ്രാന്സ്, ലക്സംബര്ഗ്, സ്വീഡന് എന്നീ രാജ്യങ്ങളിലുള്ളവര്ക്ക് 189 സ്ഥലങ്ങള് മുന്കൂട്ടിയുള്ള വിസയില്ലാതെ സന്ദര്ശിക്കാം.
പട്ടികയില് മുന്വര്ഷത്തെ അപേക്ഷിച്ച് ഏഴ് സ്ഥാനങ്ങള് മെച്ചപ്പെടുത്തി ഇന്ത്യ 80-ാം സ്ഥാനത്ത് എത്തി. 57 രാജ്യങ്ങളിലേക്കാണ് ഇന്ത്യക്കാര്ക്ക് വിസയില്ലാതെ പോകാനാകുക.
പൊതുവേ ഏഷ്യന് രാജ്യങ്ങള്ക്കാണ് പട്ടികയില് മുന്തൂക്കം ഉള്ളതെങ്കിലും ഇത്തവണത്തെ റാങ്കിംഗില് യൂറോപ്പ് ശക്തമായ തിരിച്ചുവരവ് പ്രകടമാക്കിയിട്ടുണ്ട്. പട്ടികയില് രണ്ടാംസ്ഥാനത്ത് സ്പെയിന്, ജര്മ്മനി, ഇറ്റലി എന്നീ യൂറോപ്യന് രാജ്യങ്ങളാണ്. 190 സ്ഥലങ്ങളിലേക്കാണ് സ്പെയിനിലുള്ളവര്ക്ക് ഓണ്-അറൈവല് വിസ സൗകര്യമുള്ളത്. അതേസമയം ഒരിക്കല് പട്ടികയില് ഒന്നാംസ്ഥാനത്തായിരുന്ന അമേരിക്കയുടെ റാങ്കിംഗ് കുത്തനെ ഇടിഞ്ഞ് എട്ടാംസ്ഥാനത്തെത്തി. അതേസമയം ബ്രിട്ടന് നില മെച്ചപ്പെടുത്തി നാലാംസ്ഥാനത്തെത്തി.
അന്താരാഷ്ട്ര വ്യോമ ഗതാഗത സംഘടനയുടെ (അയാട്ട) വിവരങ്ങളെ അടിസ്ഥാനപ്പെടുത്തിയാണ് ഹെന്ലി പാസ്പോര്ട്ട് സൂചിക തയ്യാറാക്കുന്നത്. വിസ നയങ്ങളിലെ മാറ്റങ്ങള് പ്രതിഫലിക്കുന്ന തരത്തിലാണ് പട്ടിക പുതുക്കുന്നത്. ലോകത്ത് സഞ്ചാരസ്വാതന്ത്ര്യം മെച്ചപ്പെടുന്നു എന്ന സൂചനയാണ് പട്ടിക നല്കുന്നത്. സന്ദര്ശകര്ക്കുള്ള വിസ-രഹിത ലക്ഷ്യസ്ഥാനങ്ങളുടെ ശരാശരി എണ്ണം 2006ലെ 58ല് നിന്നും ഇത്തവണ 109 ആയി വര്ദ്ധിച്ചത് ഇതിന് തെളിവാണ്.
Discussion about this post