പത്തനംതിട്ട: ഗണപതി ഭഗവാൻ മിത്താണെന്ന പരാമർശത്തിൽ സ്പീക്കർ എഎൻ ഷംസീറിനെതിരെ ശക്തമായ പ്രതിഷേധം ഉയരുന്നതിനിടെ ഗണപതി വിഗ്രഹങ്ങൾക്കൊപ്പമുള്ള ഫോട്ടോ പങ്കുവച്ച് സിപിഐ നേതാവ്. സിപിഐ പത്തനംതിട്ട ജില്ലാ സെക്രട്ടറി എ.പി ജയനാണ് സമൂഹമാദ്ധ്യമത്തിൽ ഗണപതി വിഗ്രഹങ്ങൾക്ക് മുന്നിൽനിന്നുള്ള ചിത്രം പങ്കുവച്ചിരിക്കുന്നത്. ചിത്രം ഇതിനോടകം തന്നെ സിപിഐയ്ക്കുള്ളിൽ വലിയ ചർച്ചയായി.
രാവിലെയോടെയായിരുന്നു അദ്ദേഹത്തിന്റെ ഫേസ്ബുക്കിൽ ചിത്രം പ്രത്യക്ഷപ്പെട്ടത്. ‘ഒരു യാത്രയുടെ തുടക്കം’ എന്ന പേരിലായിരുന്നു ചിത്രം പങ്കുവച്ചത്. നിരവധി ഗണേശ വിഗ്രഹങ്ങളാണ് ചിത്രത്തിൽ ഉള്ളത്. ഇതിന് പുറമേ മറ്റ് വിഗ്രഹങ്ങളും ചിത്രത്തിൽ കാണാം. വിവാദങ്ങൾക്കിടെ പ്രത്യക്ഷപ്പെട്ട ചിത്രം മിനിറ്റുകൾ കൊണ്ടാണ് വ്യാപകമായി പ്രചരിച്ചത്. വിവാദ പരാമർശത്തിൽ ഷംസീറിനെ പിന്തുണയ്ക്കുന്ന നിലപാടാണ് സിപിഐക്കുള്ളത്. ഇതിനിടെ പ്രത്യക്ഷപ്പെട്ട ചിത്രം പാർട്ടിയെ വലിയ പ്രതിരോധത്തിലാക്കിയിരിക്കുകയാണ്.
അതേസമയം സംഭവം വിവാദമാക്കേണ്ടെന്നാണ് പാർട്ടി പറയുന്നത്. ലൈബ്രറി കൗൺസിലിന്റെ സംസ്ഥാന ഭാരവാഹി കൂടിയാണ് അദ്ദേഹം. ഇതുമായി ബന്ധപ്പെട്ട പരിപാടിയുടെ ഭാഗമായി അദ്ദേഹം സംസ്ഥാനത്തിന് പുറത്താണ്. യാത്രയ്ക്കിടെ പങ്കുവച്ച ചിത്രമാണ് ഇതെന്നും പാർട്ടി വ്യക്തമാക്കി. അനധികൃത സ്വത്ത് സമ്പാദന കേസിൽ പാർട്ടിയിൽ നിന്നും അന്വേഷണം നേരിടുന്നയാളാണ് എ.പി ജയൻ.
