ന്യൂഡൽഹി : ലോകത്തിലെ ആദ്യത്തെ 100% എഥനോൾ ഇന്ധന കാർ കേന്ദ്ര റോഡ് ഗതാഗത, ഹൈവേ മന്ത്രി നിതിൻ ഗഡ്കരി പുറത്തിറക്കി. ടൊയോട്ട ഇന്നോവ ഹൈക്രോസിന്റെ എഥനോൾ വേരിയന്റാണ് പുതുതായി അവതരിപ്പിച്ചത്. ഈ കാർ ലോകത്തിലെ ആദ്യത്തെ സ്റ്റേജ്-II BS-VI വൈദ്യുതീകരിച്ച ഫ്ലെക്സ് ഫ്യുവൽ വാഹനമാണെന്നാണ് അറിയപ്പെടുന്നത്.
പെട്രോളിലോ പെട്രോളിന്റെയും എത്തനോളിന്റെയും മിശ്രിതത്തിലോ പ്രവർത്തിക്കാൻ കഴിവുള്ളവയാണ് ഫ്ലെക്സിബിൾ ഫ്യൂവൽ വെഹിക്കിളുകൾ. എന്നാൽ ഈ പുതിയ ഇന്നോവ ഹൈക്രോസ് ഫ്ലെക്സ് ഫ്യുവൽ മോഡൽ 100 ശതമാനം എഥനോൾ ഉപയോഗിച്ചാണ് പ്രവർത്തിക്കുന്നത്. കഴിഞ്ഞ വർഷം, ബദൽ, ഹരിത ഇന്ധന ഊർജം പ്രോത്സാഹിപ്പിക്കുന്നതിനായി ഹൈഡ്രജനിൽ പ്രവർത്തിക്കുന്ന കാറായ ടൊയോട്ട മിറായി ഇവിയും ഗഡ്കരി പുറത്തിറക്കിയിരുന്നു.
എഥനോൾ ഇന്ധന വാഹനങ്ങളുടെ ഉപയോഗം എണ്ണ ഇറക്കുമതി കുറയ്ക്കാൻ സഹായകരമാകുന്നതാണ്. എഥൈൽ ആൽക്കഹോൾ എന്നും അറിയപ്പെടുന്ന ഒരു ജൈവ ഇന്ധനമാണ് എഥനോൾ. സ്വാഭാവികമായി എഥനോൾ ലഭ്യമാകുന്നത് കരിമ്പിൽ നിന്ന് പഞ്ചസാര വേർതിരിച്ചെടുക്കുമ്പോൾ ലഭിക്കുന്ന അവശിഷ്ടമായാണ്.
