പാലക്കാട് : ഷൊർണൂരിൽ കാഴ്ച പരിമിതനായ ലോട്ടറി വില്പനക്കാരനിൽ നിന്നും ടിക്കറ്റുകൾ തട്ടിയെടുത്തയാൾ പിടിയിൽ. തിരുവില്വാമല സ്വദേശി മുബീബ് ആണ് പിടിയിലായത്. 500 രൂപ വിലയുള്ള 7 ഓണം ബംബർ ടിക്കറ്റുകളാണ് ഇയാൾ തട്ടിയെടുത്തത്. കാഴ്ചപരിമിതിയുള്ള അർജുനൻ എന്ന ലോട്ടറി വില്പനക്കാരനിൽ നിന്നുമാണ് മുബീബ് ടിക്കറ്റുകൾ തട്ടിയെടുക്കാനായി ശ്രമിച്ചത്.
റോഡരികിൽ ലോട്ടറി വില്പന നടത്തിയാണ് അർജുനൻ ഉപജീവനം നടത്തുന്നത്. ചൊവ്വാഴ്ച ലോട്ടറി വില്പന നടത്തിക്കൊണ്ടിരിക്കെ മുബീബ് ബൈക്കിൽ ഇയാൾക്കടുത്ത് എത്തുകയായിരുന്നു. ഓണം ബംബർ ലോട്ടറി മാത്രമായിരുന്നു അർജുനന്റെ കയ്യിൽ ഉണ്ടായിരുന്നത്. ലോട്ടറി നോക്കാനെന്ന വ്യാജേന ടിക്കറ്റുകൾ കരസ്ഥമാക്കിയ മുബീബ് പെട്ടെന്ന് ബൈക്ക് സ്റ്റാർട്ട് ചെയ്ത് സ്ഥലം വിടാൻ ശ്രമിക്കുകയായിരുന്നു.
മോഷണശ്രമം ആണെന്ന് മനസ്സിലാക്കിയ അർജുനൻ പെട്ടെന്ന് തന്നെ മുബീബിന്റെ കൈകളിൽ കടന്നു പിടിക്കുകയും ബൈക്കിൽ നിന്നും വലിച്ചിറിക്കുകയും ചെയ്തു. അർജുനൻ ബഹളം വച്ചതിനെത്തുടർന്ന് ഓടി കൂടിയ നാട്ടുകാരാണ് പ്രതിയെ പോലീസിൽ ഏൽപ്പിച്ചത്. ഷൊർണൂർ പോലീസ് ഇയാളെ കസ്റ്റഡിയിൽ എടുത്തിട്ടുണ്ട്.
