കൊച്ചി: മഴയിലും ചോരാത്ത ആവേശവുമായി നിറഞ്ഞ ആരാധകർക്ക് സ്വന്തം തട്ടകത്തിൽ വിജയത്തുടക്കം സമ്മാനമായി നൽകി കേരള ബ്ലാസ്റ്റേഴ്സ്. ബംഗലൂരു എഫ്‌സിക്കെതിരായ മത്സരത്തിൽ 2-1 നായിരുന്നു ബ്ലാസ്റ്റേഴ്‌സിന്റെ വിജയം.
ആദ്യപകുതിയിൽ ഇരു ടീമുകൾക്കും ഗോളുകൾ നേടാനായില്ല. 52 ാം മിനിറ്റിൽ ബംഗലൂരുവിന്റെ നെതർലൻഡ് ഡിഫൻസ് താരം കെസിയ വീൻഡോർപ്പിന്റെ സെൽഫ് ഗോളാണ് ബ്ലാസ്‌റ്റേഴ്‌സിനെ മുന്നിലെത്തിച്ചത്. വീൻഡോർപ്പിന്റെ ദേഹത്ത് തട്ടി പന്ത് വലയിലെത്തുകയായിരുന്നു.
പിന്നാലെ 69 ാം മിനിറ്റിൽ നായകൻ അഡ്രിയൻ ലൂണയും ഗോൾവല കുലുക്കിയതോടെ ബ്ലാസ്റ്റേഴ്സ് ഇരട്ടി ആവേശത്തിലായി. ഇതോടെ പരാജയം മണത്ത ബംഗലൂരു ഗോൾ മടക്കാൻ കിണഞ്ഞു പരിശ്രമിച്ചു.
69 ാം മിനിറ്റിൽ ബംഗലൂരു എഫ്‌സിയുടെ ഗോളി ഗുർപ്രീതിന്റെ അശ്രദ്ധ മുതലെടുത്താണ് ലൂണ ഗോളാക്കി മാറ്റിയത്. ഗുർപ്രീത് തട്ടിയിട്ട പന്തിൽ ഒരു നിമിഷം പോലും പാഴാക്കാതെ ലൂണ വലയിലെത്തിക്കുകയായിരുന്നു.
മഞ്ഞക്കടലായി ഓരോ നീക്കത്തിനും ആർപ്പുവിളിച്ച് പിന്തുണ നൽകിയ ആരാധകർക്ക് മുൻപിൽ ബ്ലാസ്റ്റേഴ്സ് മികച്ച കളിയാണ് പുറത്തെടുത്തത്.
