ന്യൂഡൽഹി: ഇന്ത്യയുമായി അടുത്ത ബന്ധം സ്ഥാപിക്കാൻ കാനഡ പ്രതിജ്ഞാബദ്ധമാണെന്ന് കനേഡിയൻ പ്രധാനമന്ത്രി ജസ്റ്റിൻ ട്രൂഡോ. ഖാലിസ്ഥാൻ ഭീകരൻ ഹർദീപ് സിംഗ് നിജ്ജാറിന്റെ കൊലപാതകത്തിൽ ഇന്ത്യയ്ക്ക് പങ്കുണ്ടെന്ന ആരോപണം ട്രൂഡോ ഉയർത്തിയിരുന്നു. എന്നാൽ ഈ വാദം തള്ളി ഇന്ത്യ രംഗത്തെത്തിയിരുന്നു. ഇരുരാജ്യങ്ങളും തമ്മിലുള്ള നയതന്ത്രബന്ധത്തേയും ഇത് ബാധിച്ച് തുടങ്ങിയതിന് പിന്നാലെയാണ് ഇന്ത്യയുമായുള്ള ബന്ധം തങ്ങൾക്ക് ഏറെ പ്രധാനമാണെന്ന പ്രസ്താവനയുമായി ട്രൂഡോ വീണ്ടും രംഗത്തെത്തിയത്.
ആഗോള തലത്തിൽ ഇന്ത്യയുടെ വർദ്ധിച്ച് വരുന്ന സ്വാധീനത്തെ കുറിച്ച് എടുത്തുപറഞ്ഞ ട്രൂഡോ, ഇന്ത്യയുമായുള്ള ബന്ധം ഏറെ പ്രധാനമാണെന്നും ചൂണ്ടിക്കാട്ടി. ‘ഇന്ത്യ വളർന്നു കൊണ്ടിരിക്കുന്ന ഒരു സാമ്പത്തിക ശക്തിയാണ്. അന്താരാഷ്ട്ര ബന്ധങ്ങളും അവർക്ക് ഏറെയുണ്ട്. ഇന്ത്യയുമായുള്ള ബന്ധത്തെ അങ്ങേയറ്റം ഗൗരവത്തോടെ മാത്രമാണ് കാണുന്നത്. അത് ഏറെ പ്രധാനപ്പെട്ടതുമാണ്. എന്നാൽ നിയമവാഴ്ചയുള്ള ഒരു രാജ്യമെന്ന നിലയിൽ ചില വസ്തുതകളിൽ തീരുമാനം ഉണ്ടാക്കുന്നതിനായി ഇന്ത്യ കാനഡയോട് സഹകരിക്കേണ്ടത് ആവശ്യമാണെന്നും” ട്രൂഡോ പറയുന്നു.
വാഷിംഗ്ടണിൽ വിദേശകാര്യമന്ത്രി എസ് ജയശങ്കറുമായി നിജ്ജാറിന്റെ കൊലപാതകത്തിൽ ഉയർന്നുവന്ന ആരോപണങ്ങളെ കുറിച്ച് സ്റ്റേറ്റ് സെക്രട്ടറി ആന്റണി ബ്ലിങ്കൻ സംസാരിക്കുമെന്ന് ഉറപ്പ് നൽകിയതായും ട്രൂഡോ പറയുന്നു.
