എറണാകുളം: എന്തു ചെയ്താലും സമൂഹമാദ്ധ്യമങ്ങളിൽ വൈറലാകുന്ന നടനാണ് ഷൈൻ ടോം ചാക്കോ. സിനിമയിലെത്തിയ സമയം മുതൽ വ്ലോഗർമാരുടെയും ഓൺലൈൻ മീഡിയയുടെയും ക്യാമറക്കണ്ണുകൾ ഷൈൻ ടോമിനെ വിടാതെ പിന്തുടരുകയാണ്. ഗോസിപ്പുകൾക്കും കുറവുണ്ടായിരുന്നില്ല. ഒരു യുവതിയ്ക്കൊപ്പം നിൽക്കുന്ന ചിത്രത്തിലൂടെയായിരുന്നു ഷൈൻ ടോം ചാക്കോ അവസാനമായി വാർത്തകളിൽ ഇടം പിടിച്ചത്. ഈ പെൺകുട്ടിക്കൊപ്പം സിനിമയുടെ പ്രമോഷൻ വേദിയിലെത്തിയ ഷൈൻ ടോം ചാക്കോയുടെ ചിത്രങ്ങളും വീഡിയോകളുമാണ് സമൂഹമാദ്ധ്യമങ്ങളിൽ പുതിയ ചർച്ചാവിഷയം.
നടന്റെ പുതിയ സിനിമയായ ഡാൻസ് പാർട്ടിയുടെ ഓഡിയോ ലോഞ്ച് ഇന്നലെ നടന്നിരുന്നു. ഇതിൽ പങ്കെടുക്കാൻ യുവതിയ്ക്കൊപ്പമാണ് താരം എത്തിയത്. ഇത് അവിടെയെത്തിയവരുടെ സംശയം ബലപ്പെടുത്തി. ഇതിനിടെ ഉടൻ വിവാഹിതരാവുന്ന ആളുകൾ എന്ന് വിളിച്ച് ചിത്രത്തിന്റെ സംവിധായകൻ സോഹൻ സീനു ലാൽ ഇവരെ വേദിയിലേക്ക് ക്ഷണിക്കുകയായിരുന്നു. ഇതോടെ ഷൈനിന്റെ കാമുകിയാണ് യുവതിയെന്ന കാര്യം വ്യക്തമാക്കി.
ഇരുവരും തമ്മിലുള്ള ചിത്രത്തിന് താഴെ യുവതിയുടെ പേര് ചോദിച്ച് നിരവധി പേർ കമന്റ് ഇട്ടിരുന്നു. എന്നാൽ ഇതിനോട് ഒന്നും നടൻ പ്രതികരിച്ചിരുന്നില്ല. പരിപാടിയിലും യുവതിയുടെ പേര് ആരാധകർ ചോദിച്ചിരുന്നു. പേരക്ക എന്നായിരുന്നു ഇതിന് താരം ചിരിച്ച് മറുപടി പറഞ്ഞത്. ശേഷം തനു എന്നാണ് പേരെന്നും ഷൈൻ വെളിപ്പെടുത്തി. തനൂജ എന്നാണ് യഥാർത്ഥ പേര്.
പരിപാടിയിൽ ഇരുവരും ഒന്നിച്ചുള്ള വീഡിയോകളും റീൽസുകളുമെല്ലാം സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. ഇതിൽ നിന്നും തനൂജ എന്നാണ് യുവതിയുടെ മുഴുവൻപേരെന്ന് വ്യക്തമാകുന്നുണ്ട്. അതേസമയം തനൂജയുമായി ബന്ധപ്പെട്ട കൂടുതൽ വിവരങ്ങൾ പുറത്തുവന്നിട്ടില്ല. സ്വന്തം ഇൻസ്റ്റഗ്രാം പേജിലൂടെ തനൂജക്കൊപ്പമുള്ള വീഡിയോ ഷൈൻ ടോം പങ്കുവച്ചിട്ടുണ്ട്.
Discussion about this post