പുഴക്കരയിലെ ഞാവൽ മരത്തിലെ കുരങ്ങന്റെ ഹൃദയം ഭാര്യക്ക് തിന്നാൻ വേണ്ടി കൊണ്ടുപോയ മണ്ടൻ മുതലയുടെ കഥ കുട്ടിക്കാലത്ത് കേട്ടിട്ടില്ലേ? കൂർത്ത പല്ലുകളുള്ള ഈ ഭീകരന്റെ ഒരൊറ്റ കടിയിൽ അതിന്റെ ഇരകൾ തവിടുപൊടിയാകും. വെള്ളത്തിൽ പതിങ്ങിയിരുന്ന് ഞൊടിയിടയിൽ ആക്രമിക്കുന്ന മുതലയിൽ നിന്ന് രക്ഷപ്പെടാൻ തന്നെ ബുദ്ധിമുട്ടാണ്. എന്നാൽ 60 കാരനായ ഒരു കർഷകൻ മുതലയുടെ ആഹാരമാകാതെ രക്ഷപ്പെട്ട വാർത്തയാണ് ഇപ്പോൾ വൈറലാവുന്നത്.
ഓസ്ട്രേലിയയിലാണ് സംഭവം. കന്നുകാലി കർഷകനായ കോളിൻ ഡെവറക്സ് ഫിന്നിസ് നദിക്ക് സമീപം ചൂണ്ടയിടാനായി പോയതായിരുന്നു. നദിക്കരയിൽ ഇരുന്ന് ചൂണ്ടയിടുന്നതിനിടെ ഒരു വലിയ നിഴൽനദിയുടെ ആഴപരപ്പിലൂടെ നീന്തുന്നതായി കർഷകന്റെ ശ്രദ്ധയിൽപ്പെട്ടു. അതെന്താണെന്ന് ശ്രദ്ധിക്കും മുൻപേ മുതല അദ്ദേഹത്തിന്റെ വലതുകാലിൽ കടിച്ചു.
ഇടത് കാല് കൊണ്ട് മുതലയെ ചവിട്ടി രക്ഷപ്പെടാൻ ശ്രമിച്ചെങ്കിലും നടന്നില്ല. നിമിഷങ്ങൾ മാത്രം നീണ്ട മൽപ്പിടുത്തത്തിൽ കർഷകൻ മുതലയുടെ കൺപോളയിൽ കടിക്കുകയായിരുന്നു. വേദനകൊണ്ട് മുതല കടിവിട്ടതോടെ കർഷകൻ ആ സമയം നോക്കി രക്ഷപ്പെടുകയായിരുന്നു. കോളിൻ ഡെവറക്സ് പറഞ്ഞ രക്ഷപ്പെടലിന്റെ കഥ വിശ്വാസയോഗ്യമല്ലെന്ന് പറയുന്നുണ്ടെങ്കിലും കാലിലെ മുറിവുകൾ മുതല കടിച്ചതിന്റെ തന്നെയാണെന്ന് ഡോക്ടർമാർ സാക്ഷ്യപ്പെടുത്തുന്നു. എന്തായാലും നാട്ടിലെ ഹീറോയാണ് ഇപ്പോൾ ഈ അറപതുകാരൻ.
Discussion about this post