ബീജിങ്:രാജ്യത്ത് അജ്ഞാതരോഗ ബാധയെന്ന റിപ്പോര്‍ട്ടുകള്‍ തള്ളി ചൈന. രോഗ വ്യാപനത്തിനു പിന്നില്‍ അസാധാരണമോ പുതിയതോ ആയ അണുബാധയെല്ലന്നാണ് ചൈനയുടെ വാദം. അജ്ഞാതരോഗത്തെ കുറിച്ചുള്ള വിശദവിരങ്ങളടങ്ങിയ റിപ്പോര്‍ട്ട് ലോകാരോഗ്യ സംഘടന രാജ്യത്തോട് ആവശ്യപ്പെട്ടതിനു പിന്നാലെയാണ് അസാധാരണമായി ഒന്നുമില്ലന്ന വാദവുമായി ചൈന രംഗത്തെത്തിയത്.
കോവിഡ് ആദ്യ നാളുകളില്‍ ഉണ്ടായ പോലെ ന്യമോണിയ ബാധിച്ചവര്‍ ആശുപത്രികളില്‍ നിറയുകയാണ്. മിക്ക സ്‌കൂളുകളിലും വിദ്യാര്‍ത്ഥികളില്ലാത്തതിനാല്‍ അടച്ചിടേണ്ട അവസ്ഥയാണ്. കുട്ടികളില്‍ ശ്വാസകോശ വീക്കം, പനി എന്നിവയുള്‍പ്പെടെ അസാധാരണമായ ലക്ഷണങ്ങളുണ്ട്. എന്നാല്‍ സാധാരണ ചുമ ഉള്‍പ്പെടെ പനി, മറ്റു ശ്വാസകോശ സംബന്ധമായ അസുഖങ്ങള്‍ക്ക് ഉണ്ടാകുന്ന ലക്ഷണങ്ങള്‍ കാണുന്നുമില്ല. ലോകമെമ്പാടും മനുഷ്യരിലും മൃഗങ്ങളിലും ഉണ്ടാകുന്ന രോഗബാധയെ നിരീക്ഷിക്കുന്ന പ്ലാറ്റ്ഫോമായ പ്രോമെഡ് ചൈനയിലെ കുട്ടികളില്‍ ബാധിക്കുന്ന ന്യുമോണിയയെക്കുറിച്ച് മുന്നറിയിപ്പ് നല്‍കി. 2019 ഡിസംബറില്‍ കോവിഡിനെക്കുറിച്ച് ആദ്യം മുന്നറിയിപ്പ് നല്‍കിയതും പ്രോമെഡ് ആണെന്നത് ആശങ്ക വര്‍ദ്ധിപ്പിക്കുന്നു.
വളരെ കുറച്ചു സമയം കൊണ്ട് നിരവധി കുട്ടികളെ ഒരുമിച്ച് ബാധിക്കുന്ന രോഗമാണിത്.നവംബര്‍ 21 നാണ് കുട്ടികളിലെ രോഗം അധികൃതരുടെ ശ്രദ്ധയില്‍പ്പെടുന്നത്.എന്നാല്‍ ഇതുവരെ രോഗം പ്രായപൂര്‍ത്തിയായ ആര്‍ക്കും സ്ഥിരീകരിച്ചതായി റിപ്പോര്‍ട്ട് ചെയ്തിട്ടില്ല. അസുഖമുള്ളവരില്‍ നിന്ന് അകലം പാലിക്കുക , അസുഖബാധിതര്‍ വീട്ടില്‍ തന്നെ തുടരുക, കൃത്യമായ വൈദ്യസഹായം തേടുക ,മാസ്‌ക് ധരിക്കുക, തുടങ്ങിയ നിര്‍ദേശങ്ങളാണ് ലോകാരോഗ്യ സംഘടന ചൈനയക്ക് നല്‍കിയിരിക്കുന്നത്.
കോവിഡിന്റെ രോഗവ്യാപനം സംബന്ധിച്ച വിവരങ്ങളും ചൈന പുറം ലോകത്തുനിന്നും മറച്ചുവെച്ചിരുന്നു. അതുകൊണ്ടുതന്നെ പുതിയ അജ്ഞാതരോഗം ലോകം ആശങ്കയോടെയാണ് നോക്കികാണുന്നത്.
Discussion about this post