ഗാർസീനിയ കാംബോജിയ, മലബാർ ടമറിൻഡ് എന്നീ പേരുകളിൽ അറിയപ്പെടുന്ന നമ്മുടെ സ്വന്തം കുടംപുളി നിരവധി ഗുണങ്ങൾ ഉള്ള ഒരു ഫലമാണ്. എന്നാൽ ശ്രദ്ധിച്ചു ഉപയോഗിച്ചില്ലെങ്കിൽ നല്ല മുട്ടൻ പണിയും കിട്ടാവുന്നതാണ്. പരമ്പരാഗത കാലം മുതൽ കേരളത്തിൽ കുടംപുളി ഉപയോഗിച്ച് വരുന്നുണ്ട്. മീൻ കറി പോലെയുള്ളവയ്ക്ക് രുചി വർദ്ധിപ്പിക്കാൻ ആയിരുന്നു പ്രധാനമായും നമ്മുടെ പൂർവികർ കുടംപുളി ഉപയോഗിച്ചിരുന്നത്. എന്നാൽ ഇപ്പോൾ കുടംപുളി പലരും ഉപയോഗിക്കുന്നത് ശരീരഭാരം കുറയ്ക്കാനുള്ള ഒരു ഔഷധമായാണ്.
ശരീരഭാരം കുറയ്ക്കാൻ സഹായിക്കുന്ന സംയുക്തങ്ങൾ കുടംപുളിയിൽ അടങ്ങിയിട്ടുള്ളതായി ഗവേഷണങ്ങളിലൂടെ കണ്ടെത്തിയിട്ടുണ്ട്. എന്നാൽ ഇവ അളവിൽ കൂടുതലോ അല്ലെങ്കിൽ സ്ഥിരമായോ ഉപയോഗിച്ചാൽ ശരീരത്തിലെ ആന്തരികാവയവങ്ങൾ പോലും പ്രവർത്തനരഹിതമാകുന്ന രീതിയിൽ അപകടകരമാണ്. അതിനാൽ തന്നെ തടി കുറയും എന്ന് കേട്ട് കുടംപുളി കൂടുതൽ കഴിക്കാൻ നിൽക്കേണ്ട എന്നാണ് ആരോഗ്യ വിദഗ്ദ്ധർക്ക് പറയാനുള്ളത്.
കുടംപുളി കഴിക്കുന്ന അളവ് അല്പം കൂടിയാൽ തന്നെ ഓക്കാനം, വയറ്റിൽ അസ്വസ്ഥത, ശർദ്ദി എന്നീ പ്രശ്നങ്ങൾ പലർക്കും ഉണ്ടാകാറുണ്ട്. പക്ഷേ വേഗം തടി കുറയും എന്ന് കരുതി പലരും ഈ ലക്ഷണങ്ങൾ പോലും അവഗണിക്കാറുണ്ട്. കുടംപുളിയിലെ ചില രാസ സംയുക്തങ്ങൾ അധികമാകുന്നത് കരൾ പ്രവർത്തനരഹിതമാക്കി തീർക്കുന്നതായി നിരവധി റിപ്പോർട്ടുകൾ സൂചിപ്പിക്കുന്നുണ്ട്. കൂടുതൽ കാലം കുടംപുളി ഉപയോഗിച്ച് വിവിധ കരൾ രോഗങ്ങൾ വർദ്ധിച്ചതായും പഠന റിപ്പോർട്ടുകൾ സൂചിപ്പിക്കുന്നു.
കുടംപുളിയിലുള്ള ഹൈഡ്രോക്സിസിട്രിക് ആസിഡ് രക്തത്തിലെ പഞ്ചസാരയുടെ അളവ് രക്തം കട്ടപിടിക്കാൻ സഹായിക്കുന്ന ഘടകങ്ങളെയും സ്വാധീനിക്കുന്നതാണ്. കുടംപുളി കൂടുതൽ കഴിക്കുന്നത് നിങ്ങളുടെ ശരീരത്തിൽ രക്തം കട്ടപിടിക്കുന്നത് തടയാൻ കാരണമാകുന്നു. ഇതുവഴി മുറിവുകളോ മറ്റോ ഉണ്ടാകുമ്പോൾ അമിതമായ രക്തസ്രാവം ഉണ്ടാകാൻ സാധ്യതയുണ്ട്. ശസ്ത്രക്രിയകൾക്കും മറ്റും വിധേയരാകുന്നവർ രണ്ടാഴ്ച മുമ്പ് എങ്കിലും കുടംപുളി സത്ത് ഉപയോഗിച്ചുള്ള മരുന്നുകളോ കുടംപുളി നേരിട്ട് കഴിക്കുന്നുണ്ടെങ്കിലോ അവ നിർത്തണമെന്നാണ് ഡോക്ടർമാർ ഉപദേശം നൽകുന്നത്.
കുടംപുളി കൂടുതലായി ഉപയോഗിക്കുന്നത് സെറോടോണിൻ എന്ന മസ്തിഷ്ക രാസവസ്തുവിനെ വർദ്ധിപ്പിക്കുന്നതാണ് . ഇത് ഹൃദയസംബന്ധമായ പ്രശ്നങ്ങൾ, അപസ്മാരം, ഛർദ്ദി എന്നിവയുൾപ്പെടെയുള്ള ഗുരുതരമായ പ്രത്യാഘാതങ്ങൾക്ക് പോലും കാരണമാകാവുന്നതാണ്.
ബൈപോളാർ അസുഖം ഉള്ളവർക്ക് കുടംപുളിയുടെ ഉപയോഗം വിപരീതമായ പ്രത്യാഘാതം ഉണ്ടാക്കും എന്നതിനാൽ പൂർണ്ണമായും ഒഴിവാക്കണമെന്നാണ് വിദഗ്ദ്ധർ നൽകുന്ന ഉപദേശം.
Discussion about this post