തിരുവനന്തപുരം: ഗവർണർക്കെതിരെ എസ് എഫ് ഐ കാണിക്കുന്നത് ഗുണ്ടായിസമാണെന്ന് ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ. എസ് എഫ് ഐയുടെ തെമ്മാടിത്തത്തിന് നേതൃത്വം നൽകുന്നത് സിപിഎമ്മും മുഖ്യമന്ത്രിയുമാണ്. ഗവർണർക്ക് സഞ്ചാര സ്വാതന്ത്ര്യം നിഷേധിക്കുന്ന നടപടിയുമായി മുന്നോട്ട് പോയൽ മുഖ്യമന്ത്രി നയിക്കുന്ന നവകേരള സദസ്സിന് നേരെയും പ്രതിഷേധമുണ്ടാകുമെന്ന് കെ സുരേന്ദ്രൻ വ്യക്തമാക്കി.
ഗവർണർക്കെതിരായ എസ് എഫ് ഐ ആക്രമണങ്ങൾ ഇനിയും തുടരുമെന്നാണ് സിപിഎം സംസ്ഥാന സെക്രട്ടറി പറഞ്ഞിരിക്കുന്നത്. സംസ്ഥാനത്ത് ക്രമസമാധാന തകർച്ചയ്ക്ക് ഭരണകക്ഷി തന്നെ ആഹ്വാനം നൽകുകയാണ്. ഇതാണ് അവസ്ഥാ വിശേഷമെങ്കിൽ ഗുരുതരമായ പ്രത്യാഘാതമുണ്ടാകുമെന്നും കെ സുരേന്ദ്രൻ പറഞ്ഞു.
സർവകലാശാലകളുടെ നിയന്ത്രണവുമായി ബന്ധപ്പെട്ട വിഷയത്തിൽ സുപ്രീം കോടതിയുടെ വിധിക്ക് അനുസൃതമായി ഗവർണർ പ്രവർത്തിക്കുമ്പോൾ അതിൽ എസ് എഫ് ഐക്കും ഡി വൈ എഫ് ഐക്കും എന്താണ് കാര്യം? കേരളത്തിലെ സർവകലാശാലകൾ എസ് എഫ് ഐയുടെയോ സിപിഎമ്മിന്റെയോ തറവാട്ട് സ്വത്തല്ല. അവിടെ കയറി തെമ്മാടിത്തം കാണിച്ചാൽ തിരിച്ചും പ്രതിഷേധങ്ങൾ ഉണ്ടാകുമെന്നും കെ സുരേന്ദ്രൻ മുന്നറിയിപ്പ് നൽകി.
ഭരണ പ്രതിസന്ധി, സാമ്പത്തിക ഞെരുക്കം, സർക്കാരിന്റെ ജനവിരുദ്ധ നയങ്ങൾ എന്നിവ മറച്ചു വെക്കാൻ ഗവർണറെ ആക്രമിക്കാം എന്ന് കരുതേണ്ടെന്നും കെ സുരേന്ദ്രൻ വ്യക്തമാക്കി.
Discussion about this post