മുംബൈ: ബോളിവുഡിലെ ജനപ്രിയ നടന്മാരിലൊരാളാണ് അനുരാഗ് കശ്യപ്. നടനെന്നതിനൊപ്പം തിരക്കഥാകൃത്ത്, സംവിധാകൻ, നിർമാതാവ് എന്നീ നിലകളിലും അദ്ദേഹം സജീവമാണ്. നിരവധി പുതുമുഖങ്ങൾക്ക് അവസരമൊരുക്കിയ സംവിധായകനാണ് അദ്ദേഹം. എന്നാൽ, ഇപ്പോൾ തന്റെ മനം മടുപ്പിച്ച ഒരു സംഭവത്തെ കുറിച്ച് സോഷ്യൽ മീഡിയയിൽ പങ്കുവച്ചിരിക്കുകയാണ് അനുരാഗ് കശ്യപ്.
പുതുമുഖങ്ങളെ സഹായിക്കാൻ ശ്രമിച്ച് തന്റെ ഒരുപാട് സമയം നഷ്ടപ്പെട്ടുവെന്ന് അദ്ദേഹം ഇൻസ്റ്റഗ്രാമിൽ കുറിച്ചു. ഇനിമുതൽ അത്തരക്കാർക്ക് വേണ്ടി സമയം കളയാനില്ല. കുറുക്കുവഴികൾക്കായി തന്നെ സമീപിക്കുന്നവരെക്കൊണ്ട് മടുത്തു. ആർക്കെങ്കിലും ഇനി തന്നെ കാണണമെങ്കിൽ പത്ത് മിനിറ്റിന് ഒരു ലക്ഷം എന്നകണക്കിൽ ഫീസ് നൽകണമെന്നും അനുരാഗ് കശ്യപ് അറിയിച്ചു.
‘പുതുമുഖങ്ങളെ സഹായിക്കാൻ ശ്രമിച്ച് എന്റെ ഒരുപാട് സമയം കളഞ്ഞു. അതെല്ലാം നിലവാരമില്ലാത്ത പരാജയങ്ങളിൽ ചെന്നാണ് അവസാനിച്ചത്. അതിനാൽ, ഇനിയങ്ങോട്ട് ‘ക്രിയേറ്റ് ജീനിയസ്’ എന്ന് ചിന്തിക്കുന്ന ഇത്തരക്കാരുമായുളള കൂടിക്കാഴ്ച്ചക്ക് സമയം പാഴാക്കാൻ ഞാൻ ആഗ്രഹിക്കുന്നില്ല. അതിനാൽ തന്നെ ഞാനുമായുള്ള കൂടിക്കാഴ്ച്ചക്ക് വിലയിടുകയാണ്.
ഇനിമുതൽ എന്നെ കാണണമെന്ന് ആഗ്രഹിക്കുന്നവർക്ക് 10 മുതൽ 15 മിനിറ്റ് വരെയുള്ള സമയത്തിന് ഒരു ലക്ഷം നൽകേണ്ടി വരും. അര മണിക്കൂർ സമയത്തേക്ക് രണ്ട് ലക്ഷം രൂപയും ഒരു മണിക്കൂർ ആണെങ്കിൽ 5 ലക്ഷവുമായിരിക്കും റേറ്റ്. ആളുകളുമായി കൂടിക്കാഴ്ച്ച നടത്തി ഞാൻ ക്ഷീണിച്ചു. ഈ പണം നൽകാൻ കഴിയുന്നവർക്ക് മാത്രം എന്നെ വിളിക്കാം. അല്ലാത്തവർക്ക് വിട്ടു നിൽക്കാം’ – അനുരാഗ് കശ്യപ് ഇൻസ്റ്റഗ്രാമിൽ കുറിച്ചു.
ഈ പണം മുൻകൂർ ആയി അടക്കണമെന്നും അദ്ദേഹം അറിയിച്ചു. ഇത് വെറുതെ പറയുന്നതല്ല. തനിക്ക് മെസേജ് അയക്കുകയോ ഫോൺ വിളിക്കുകയോ ചെയ്യരുത്. താൻ ചാരിറ്റി നടത്തുന്നയാളല്ല. കുറിക്കു വഴികൾ അന്വേഷിക്കുന്ന ആളുകളെ കൊണ്ട് മടുത്തെന്നും അദ്ദേഹം കൂട്ടിച്ചേർത്തു.
Discussion about this post