തിരുവനന്തപുരം: ഒളിമ്പിക്സ് ഹോക്കിയിൽ ഇന്ത്യയുടെ അഭിമാനനേട്ടത്തിന് കാരണമായ പി.ആർ ശ്രീജേഷിന് ഐഎഎസ് നൽകണമെന്ന് ആവശ്യം. കേരള ഒളിമ്പിക്സ് അസോസിയേഷനാണ് സർക്കാരിനോട് ഇക്കാര്യം ആവശ്യപ്പെട്ടിരിക്കുന്നത്. ഇതുമായി ബന്ധപ്പെട്ട് മുഖ്യമന്ത്രിയ്ക്ക് അസോസിയേഷൻ കത്ത് നൽകി.
രാജ്യത്തെയും മലയാളികളെയും സംബന്ധിച്ച് ഏറെ അഭിമാനകരമാണ് ശ്രീജേഷിന്റെ മെഡൽ നേട്ടമെന്ന് കത്തിൽ അസോസിയേഷൻ ചൂണ്ടിക്കാട്ടുന്നു. മറ്റൊരു മലയാളി കായിക താരത്തിനും ഇത്തരത്തിൽ ഒരു നേട്ടം അവകാശപ്പെടാൻ ഇല്ല. അതിനാൽ ലോകത്തെ തന്നെ ഹോക്കി ഇതിഹാസം ആണ് അദ്ദേഹം. കേരളത്തിന്റെ കായിക രംഗത്തിനാകെ പ്രചോദനമായ അദ്ദേഹത്തിന് ഐഎഎസ് പദവി നൽകി സർക്കാർ ആദരിക്കണം എന്നും കത്തിൽ വ്യക്തമാക്കുന്നുണ്ട്.
നിലവിൽ പൊതുവിദ്യാഭ്യാസ വകുപ്പ് ജോയിന്റ് ഡയറക്ടർ ആണ് ശ്രീജേഷ്. ഒളിമ്പിക്സിൽ വെങ്കല മെഡലായിരുന്നു അദ്ദേഹം രാജ്യത്തിന് നേടികൊടുത്തത്. ഇതിന് പിന്നാലെ ഹോക്കിയിൽ നിന്നും വിരമിക്കുകയാണെന്നും അദ്ദേഹം പ്രഖ്യാപിച്ചു.
