തൃശൂര്‍: എഡിഎം നവീന്‍ ബാബു ആത്മഹത്യ ചെയ്ത സംഭവത്തില്‍ പ്രതിയായ പിപി ദിവ്യക്കെതിരെ സിപിഎം എടുത്ത നടപടിയില്‍ വിമർശനവുമായി കെപിസിസി അദ്ധ്യക്ഷന്‍ കെ സുധാകരൻ. പി ശശിയെ പോലെ പിപി ദിവ്യയും തിരിച്ചു വരുമെന്ന് കെ സുധാകരന്‍ പറഞ്ഞു. ആത്മാർത്ഥതയില്ലാത്ത നടപടിയാണ് സിപിഎമ്മിന്റേതെന്നും അദ്ദേഹം കുറ്റപ്പെടുത്തി.
മുമ്പ് പി ശശിക്കെതിരെയും ഇതുപോലെ തന്നെ സിപിഎം നടപടി എടുത്തിരുന്നു. എന്നാൽ ശശി ഇന്ന് അരമുഖ്യമന്ത്രിയാണ്. ശശിയെ പോലെ ദിവ്യയും അധികാര സ്ഥാനങ്ങളിലേക്ക് തിരിച്ചു വരും. നവീൻ ബാബുവിന്റെ കുടുംബത്തെ ബോധ്യപ്പെടുത്താന്‍ വേണ്ടി മാത്രമാണ്‌ ഇപ്പോഴത്തെ നടപടി. ഉപതെരഞ്ഞെടുപ്പ് മുന്നിൽ കണ്ടാണ് ഇപ്പോൾ പിപി ദിവ്യക്കെതിരെ നടപടിയെടുത്തത്.
ഇന്നലെയാണ് പിപി ദിവ്യക്കെതിരെ സിപിഎം നടപടിയെടുത്തത്. കണ്ണൂർ ജില്ലാ കമ്മിറ്റി അംഗമായിരുന്ന ദിവ്യയെ സിപിഎം പ്രാഥമിക അംഗത്വത്തിലേക്കാണ് തരംതാഴ്ത്തിയത്. ഇന്നലെ ഓൺലൈനായി ചേർന്ന സിപിഎം സംസ്ഥാന സെക്രട്ടേറിയേറ്റ് യോഗമാണ് കണ്ണൂർ ജില്ലാ കമ്മിറ്റിയെടുത്ത നടപടിക്ക് അംഗീകാരം നൽകിയത്.
അതേസമയം, പി പി ദിവ്യയുടെ ജാമ്യഹർജിയിൽ വിധി പറയും. തലശ്ശേരി പ്രിൻസിപ്പൽ സെഷൻസ് കോടതി ജഡ്ജ് നിസാർ അഹമ്മദാണ് ജാമ്യഹർജിയിൽ ഉത്തരവ് പറയുക. കഴിഞ്ഞ ദിവസമാണ് കോടതി ഹർജി പരിഗണിച്ചത്.
അന്വേഷണവുമായി സഹകരിച്ചെന്നും ജാമ്യം നൽകണമെന്നുമാണ് ദിവ്യയുടെ അഭിഭാഷകന്‍ കോടതിയില്‍ വാദിച്ചത്. എഡിഎം കൈക്കൂലി വാങ്ങിയതിന് സാഹചര്യത്തെളിവുകളുണ്ടെന്നും കോടതിയില്‍ പ്രതിഭാഗം വ്യക്തമാക്കി. അതേസമയം പ്രസംഗം നല്ല ഉദ്ദേശത്തിലായിരുന്നു എന്നും പറഞ്ഞു. എന്നാല്‍, യാത്രയയപ്പ് യോഗത്തിലെ സംസാരം ഒഴിവാക്കേണ്ടതായിരുന്നുവെന്ന് കോടതിയിൽ പ്രതിഭാഗം സമ്മതിച്ചിരുന്നു.
