കുവൈത്ത് സിറ്റി : കുവൈത്ത് അമീറുമായി പ്രധാനമന്ത്രി നരേന്ദ്ര മോദി ഇന്ന് കൂടിക്കാഴ്ച നടത്തും. ഇരു നേതാക്കളും കൂടിക്കാഴ്ച നടത്തുക ഉച്ചയ്ക്ക് 1 മണിക്കാണ്. ഇരു രാജ്യങ്ങൾ തമ്മിലുള്ള പരസ്പര സഹകരണം ശക്തമാക്കാനുള്ള കരാറുകളിൽ ഒപ്പിടും എന്നാണ് വിവരം.
ഇന്നലെ 26 ാമത് അറേബ്യൻ ഗൾഫ് കപ്പിന്റെ ഉദ്ഘാടനച്ചടങ്ങിൽ പ്രധാനമന്ത്രിയും കുവൈത്ത് അമീറുമായും കൂടിക്കാഴ്ച നടത്തിയിരുന്നു. അദ്ദേഹത്തെ കാണാൻ കഴിഞ്ഞതിൽ സന്തോഷം എന്ന് മോദി എക്സിൽ കുറിച്ചിരുന്നു. ചടങ്ങിൽ പങ്കെടുത്തത് ഇരു നേതൃത്വങ്ങൾക്കും പരസ്പരം അനൗപചാരിക ആശയവിനിമയത്തിൽ ഏർപ്പെടാൻ അവസരമൊരുക്കിയെന്നും വിദേശകാര്യ മന്ത്രാലയം പുറത്തിറക്കിയ പ്രസ്താവനയിൽ പറയുന്നു.
കുവൈറ്റ് അമീർ ഷെയ്ഖ് മെഷാൽ അൽ അഹമ്മദ് അൽ ജാബർ അൽ സബാഹിന്റെ ക്ഷണപ്രകാരമായിരുന്നു 43 വർഷത്തിനിടെ ഒരു ഇന്ത്യൻ പ്രധാനമന്ത്രി ദ്വിദിന കുവൈറ്റ് സന്ദർശനം നടത്തിയത്. ദ്വിദിന സന്ദർശനത്തിന്റെ ആദ്യ ദിവസം നഗരത്തിലെ ഷെയ്ഖ് സാദ് അൽ അബ്ദുല്ല ഇൻഡോർ സ്പോർട്സ് കോംപ്ലക്സിൽ ‘ഹലാ മോദി’ എന്ന പരിപാടിയിൽ പ്രധാനമന്ത്രി ഇന്ത്യൻ പ്രവാസികളുടെ വലിയ സമ്മേളനത്തെ അഭിസംബോധന ചെയ്തു .ജനുവരിയിൽ ഇന്ത്യയിൽ നടക്കുന്ന പ്രവാസി ഭാരതീയ ദിവസിലും മഹാ കുംഭത്തിലും പങ്കെടുക്കാൻ ഇന്ത്യൻ പ്രവാസികളെ പ്രധാനമന്ത്രി ക്ഷണിച്ചു.
Discussion about this post