ന്യൂഡൽഹി: പുതുവർഷത്തിൽ രാജ്യതലസ്ഥാനത്തിന് കൈനിറയെ സമ്മാനവുമായി കേന്ദ്രസർക്കാർ. 12,000 കോടിയുടെ വികസന പദ്ധതികൾ പ്രധാനമന്ത്രി നരേന്ദ്ര മോദി ഡൽഹിയ്ക്ക് സമർപ്പിക്കും. നമോഭാരത് ഇടനാഴി ഉൾപ്പെടെ പൂർത്തിയായ വികസന പദ്ധതികൾ പ്രധാനമന്ത്രി നാടിന് സമർപ്പിക്കും.
നമോഭാരത് ട്രെയിന്റെ ഉദ്ഘാടനം നിർവ്വഹിച്ചുകൊണ്ടാകും പ്രധാനമന്ത്രി ഇന്നത്തെ പരിപാടികൾ ആരംഭിക്കുക. രാവിലെ 11 ന് സാഹിബാബാദിലെ ആർആർടിഎസ് സ്റ്റേഷനിൽ നിന്നും നമോഭാരത് ട്രെയിനിൽ അദ്ദേഹം ന്യൂ അശോക് ആർആർടിഎസ് സ്റ്റേഷനിലേക്ക് യാത്ര ചെയ്യും. ഇതിന് ശേഷം ഇരു പ്രദേശങ്ങളെയും ബന്ധിപ്പിച്ചുകൊണ്ടുള്ള ഡൽഹി- ഗാസിയാബാദ്- മീററ്റ് നമോഭാരത് ഇടനാഴിയുടെ ഉദ്ഘാടനവും പ്രധാനമന്ത്രി നിർവ്വഹിക്കും. 13 കിലോമീറ്റർ ദൈർഘ്യമുള്ള ഈ ഇടനാഴി 4600 കോടി രൂപ ചിലവിട്ടാണ് നിർമ്മിച്ചിരിക്കുന്നത്.
ഇതിന് ശേഷം അദ്ദേഹം ജനക്പുരി- കൃഷ്ണപാർക്ക് മെട്രോ പാതയുടെ ഉദ്ഘാടനവും നിർവ്വഹിക്കും. ഡൽഹി മെട്രോയുടെ അഞ്ചാം ഘട്ടത്തിന്റെ ഭാഗമായിട്ടാണ് ഈ പാതയുടെ നിർമ്മാണം. 1200 കോടി രൂപ ചിലവിട്ട് 2.8 കിലോ മീറ്റർ പാതയുടെ നിർമ്മാണം ആണ് പൂർത്തിയാക്കിയിരിക്കുന്നത്.
സെൻട്രൽ ആയുർവേദ റിസർച്ച് ഇൻസ്റ്റിറ്റ്യൂട്ട് ഉൾപ്പെടെ വിവിധ പദ്ധതികളുടെ തറക്കല്ലിടൽ കർമ്മവും പ്രധാനമന്ത്രി നിർവ്വഹിക്കും. രോഹിണിയിൽ ആണ് ഈ ഇൻസ്റ്റിറ്റ്യൂട്ട് നിർമ്മിക്കുന്നത്. ഇതിന് പുറമേ ഡൽഹി മെട്രായുടെ ആറാംഘട്ടത്തിന്റെ ഭാഗമായ റിതാല- കുണ്ട്ലി മെട്രോ പാതയുടെ നിർമ്മാണത്തിനും അദ്ദേഹം ആരംഭം കുറിയ്ക്കും. 6,230 കോടി രൂപ ചിലവ് വരുന്നതാണ് ഈ പദ്ധതി.
