എന്തിനാടാ ആഘോഷിച്ചിട്ട് അവൻ വിക്കറ്റ് എടുത്തിട്ടും കാര്യമില്ലല്ലോ, ദുരന്ത റെക്കോഡുള്ള താരം ഇന്ന് ഇന്ത്യൻ പരിശീലകൻ; സംഭവം ഇങ്ങനെ

2006 നും 2018 നും ഇടയിൽ അന്താരാഷ്ട്ര ക്രിക്കറ്റ് കളിച്ച ദക്ഷിണാഫ്രിക്കൻ താരമായ മോർണേ മോർക്കലിനെ ക്രിക്കറ്റ് പ്രേമികൾ മറക്കാനിടയില്ല. ദക്ഷിണാഫ്രിക്ക സൃഷ്‌ടിച്ച ഏറ്റവും മികച്ച താരങ്ങളിൽ ഒരാളായ ഇതിഹാസം ഇന്ന് ഇന്ത്യയുടെ ബോളിങ് പരിശീലകൻ കൂടിയാണ്. ഇത് കൂടാതെ ഇന്ത്യൻ പ്രീമിയർ ലീഗിൽ ഡൽഹി ഡെയർ ഡെവിൾസിനായി 2012 സീസണിൽ 16 മത്സരങ്ങളിൽ നിന്നായി 25 വിക്കറ്റുകൾ നേടിയ താരം തിളങ്ങിയിരുന്നു.

2006-ൽ തന്റെ ടെസ്റ്റ് അരങ്ങേറ്റം കുറിച്ച മോർക്കൽ ദക്ഷിണാഫ്രിക്കൻ ദേശീയ ക്രിക്കറ്റ് ടീമിനായി 86 ടെസ്റ്റ് മത്സരങ്ങൾ കളിച്ചു. 2018 മാർച്ചിൽ ദക്ഷിണാഫ്രിക്കയ്‌ക്കായി 300 ടെസ്റ്റ് വിക്കറ്റുകൾ തികച്ച താരം ഈ നേട്ടം സ്വന്തമാക്കുന്ന അഞ്ചാമത്തെ ദക്ഷിണാഫ്രിക്കൻ ബോളർ ആയിരുന്നു. 117 ഏകദിനങ്ങളിലും 44 ട്വന്റി20 ഇന്റർനാഷണൽ മത്സരങ്ങളിലും കളിച്ച അദ്ദേഹം വൈറ്റ് ബോൾ ക്രിക്കറ്റിലും പല മത്സരങ്ങളിലും ടീമിന്റെ ജയത്തിൽ നിർണായക പങ്ക് വഹിച്ചു.

എന്തായാലും താരത്തിന് ഒരു ബൗളറും ആഗ്രഹിക്കാത്ത ഒരു റെക്കോഡുണ്ട്. ഒരു നോബോളിൽ ഏറ്റവും കൂടുതൽ ടെസ്റ്റ് വിക്കറ്റുകൾ വീഴ്ത്തിയതിന്റെ അനാവശ്യ റെക്കോർഡ് മോർക്കലിന്റെ പേരിലാണ്. അത്തരത്തിലുള്ള 14 വിക്കറ്റുകൾ നോ ബോളിൽ താരം വീഴ്ത്തിയിട്ടുണ്ട്. പക്ഷെ പ്രയോജനം ഇല്ലല്ലോ!. അതിനാൽ തന്നെ താരം വിക്കറ്റ് നേട്ടം ആഘോഷിക്കുമ്പോൾ സഹതാരങ്ങൾ നേരെ നോക്കുന്നത് അമ്പയറിന്റെ നോ ബോൾ സിഗ്നൽ വന്നിട്ടുണ്ടോ എന്നായിരുന്നു.

കാര്യങ്ങൾ ഇങ്ങനെ ഒകെ ആണെങ്കിലും കരിയറിൽ ടെസ്റ്റിലും ഏകദിനത്തിലുമായി 497 വിക്കറ്റുകൾ വീഴ്ത്തിയ താരം ദക്ഷിണാഫ്രിക്കൻ ക്രിക്കറ്റ് കണ്ട ഏറ്റവും മികച്ച താരങ്ങളിലൊരാളാണ്.