അവനെയൊക്കെ നിങ്ങൾ എവിടെ നിന്നാണ് കൊണ്ടുവരുന്നത്, സഞ്ജു ഇല്ലാതെ എന്ത് ഏകദിന ടീമിനെയാണ് ബിസിസിഐ പ്രഖ്യാപിച്ചിരിക്കുന്നത്; മുൻ താരം പറയുന്നത് ഇങ്ങനെ

ഓസ്‌ട്രേലിയൻ പര്യടനത്തിനുള്ള ഏകദിന ടീമിൽ സഞ്ജു സാംസണെ ഉൾപ്പെടുത്താത്തതിന് മുൻ ഇന്ത്യൻ ക്രിക്കറ്റ് താരം ക്രിസ് ശ്രീകാന്ത് സെലക്ടർമാരെ വിമർശിച്ചു. ഒക്ടോബർ 19 ന് ആരംഭിക്കാനിരിക്കുന്ന ഓസ്‌ട്രേലിയയ്‌ക്കെതിരായ മൂന്ന് ഏകദിനങ്ങൾക്കും അഞ്ച് ടി20 മത്സരങ്ങൾക്കുമുള്ള ടീമിനെ ബിസിസിഐ (ഇന്ത്യൻ ക്രിക്കറ്റ് കൺട്രോൾ ബോർഡ്) കഴിഞ്ഞ ദിവസം പ്രഖ്യാപിച്ചു.

ടി20 ഐ ടീമിൽ സാംസൺ സ്ഥാനം നിലനിർത്തിയെങ്കിലും, ഋഷഭ് പന്ത് പരിക്കുമൂലം പുറത്തായതോടെ ഏകദിന ടീമിലേക്കും അദ്ദേഹത്തിന് വിളി ലഭിക്കുമെന്ന് പ്രതീക്ഷിച്ചിരുന്നു. എന്നിരുന്നാലും, സെലക്ടർമാർ ധ്രുവ് ജുറലിൽ വിശ്വാസം പ്രകടിപ്പിച്ചു, കെഎൽ രാഹുലിന്റെ ബാക്കപ്പ് വിക്കറ്റ് കീപ്പറായി അദ്ദേഹത്തെ തിരഞ്ഞെടുത്തു. 2023 ൽ ദക്ഷിണാഫ്രിക്കയ്‌ക്കെതിരായ തന്റെ അവസാന ഏകദിന മത്സരത്തിൽ സാംസൺ സെഞ്ച്വറി നേടിയിരുന്നുവെന്ന് ശ്രീകാന്ത് പറഞ്ഞു. സഞ്ജുവിനെ പുറത്താക്കിയതിനെ “അന്യായം” എന്നാണ് ശ്രീകാന്ത് വിശേഷിപ്പിച്ചത്.

“ഇതിനെ അന്യായം എന്ന് മാത്രമേ വിശേഷിപ്പിക്കാൻ പറ്റുക ഉള്ളു. അവസാന ഏകദിനത്തിൽ സെഞ്ച്വറി നേടിയ സഞ്ജു ഉണ്ടാകേണ്ടതായിരുന്നു. ഒരു ദിവസം നിങ്ങൾ അവനെ 5-ൽ ബാറ്റ് ചെയ്യാൻ പ്രേരിപ്പിക്കുന്നു, പിന്നീട് മറ്റൊരു ദിവസം നിങ്ങൾ അവനെ ഓപ്പണറാക്കുന്നു. ചിലപ്പോൾ നിങ്ങൾ അവനെ 7-ലോ 8-ലോ അയയ്ക്കുന്നു. ധ്രുവ് ജൂറൽ പെട്ടെന്ന് എങ്ങനെയാണ് വന്നത്? സഞ്ജു ഇലവനിൽ ഇടം നേടിയില്ലെങ്കിലും അവനെ ബാക്കപ്പ് സ്ഥാനത്ത് കൊണ്ടുവരേണ്ടത് ആയിരുന്നു” ശ്രീകാന്ത് പറഞ്ഞു.

സെലക്ഷൻ കമ്മിറ്റിയുടെ അസ്ഥിരമായ നയങ്ങളെ ശ്രീകാന്ത് വിമർശിച്ചു, അത്തരം തീരുമാനങ്ങൾ കളിക്കാരെ ആശയക്കുഴപ്പത്തിലാക്കുകയും അവരുടെ ആത്മവിശ്വാസം തകർക്കുകയും ചെയ്യുമെന്ന് എടുത്തുപറഞ്ഞു. ഏകദിന കരിയറിൽ ഇതുവരെ 14 ഇന്നിംഗ്‌സുകളിൽ നിന്ന് 56.66 ശരാശരിയിലും 99.60 സ്ട്രൈക്ക് റേറ്റിലും ഒരു നൂറ്റി മൂന്ന് അർദ്ധസെഞ്ച്വറികളുൾപ്പടെ 510 റൺസ് സാംസൺ നേടിയിട്ടുണ്ട്. 5ഫോർമാറ്റിൽ അദ്ദേഹം അവസാനമായി കളിച്ചത് 2023 ൽ ദക്ഷിണാഫ്രിക്കയ്‌ക്കെതിരെയായിരുന്നു, അവിടെ അദ്ദേഹം 108 (114) എന്ന മാച്ച് വിന്നിംഗ് ഇന്നിംഗ്‌സ് കളിച്ചു, ഇന്ത്യയെ 2-1 ന് പരമ്പര ജയിക്കാൻ സഹായിച്ചു.