ന്യൂഡൽഹി : സുപ്രീംകോടതി ചീഫ് ജസ്റ്റിസ് ആർ ഗവായിക്ക് നേരെ ചെരിപ്പേറ്. സുപ്രീംകോടതിക്കുള്ളിൽ വച്ചാണ് നാടകീയ സംഭവങ്ങൾ അരങ്ങേറിയത്. സുപ്രീം കോടതിയിലെ ഒരു അഭിഭാഷകനാണ് തന്റെ ഷൂ ഊരി ചീഫ് ജസ്റ്റിസിന് നേരെ എറിഞ്ഞത്. സനാതന ധർമ്മത്തെ അപമാനിക്കുന്നത് പൊറുക്കാൻ ആവില്ല എന്ന് പറഞ്ഞു കൊണ്ടായിരുന്നു അഭിഭാഷകന്റെ ചെരിപ്പേറ്.
ബി ആർ ഗവായിയുടെ ഖജുരാഹോ പരാമർശം അഭിഭാഷകനെ പ്രകോപിപ്പിച്ചത്. ഖജുരാഹോയിലെ ജവാരി ക്ഷേത്രത്തിൽ ഏഴടി ഉയരമുള്ള വിഷ്ണു വിഗ്രഹം പുനർനിർമ്മിക്കുന്നതിനും പുനഃസ്ഥാപിക്കുന്നതിനും നിർദ്ദേശം നൽകണമെന്ന് ആവശ്യപ്പെട്ട് ഈ അഭിഭാഷകന്റെ നേതൃത്വത്തിൽ സുപ്രീംകോടതിയിൽ ഒരു ഹർജി നൽകിയിരുന്നു. ഈ ഹർജി സെപ്റ്റംബർ 16 ന് സുപ്രീം കോടതി തള്ളി. ‘പബ്ലിസിറ്റി താൽപ്പര്യ ഹർജി’ എന്നാണ് ചീഫ് ജസ്റ്റിസ് ഈ ഹർജിയെ വിശേഷിപ്പിച്ചിരുന്നത്.
ഹർജി പരിഗണിക്കുന്ന വേളയിൽ ” ഇത് പൂർണ്ണമായും പരസ്യത്തിനു വേണ്ടിയുള്ള ഒരു ഹർജി മാത്രമാണ്, പോയി ദൈവത്തോട് തന്നെ എന്തെങ്കിലും ചെയ്യാൻ ആവശ്യപ്പെടൂ. നിങ്ങൾ ഭഗവാൻ വിഷ്ണുവിന്റെ ശക്തമായ ഭക്തനാണെന്ന് പറയുകയാണെങ്കിൽ, നിങ്ങൾ പ്രാർത്ഥിക്കുകയും ധ്യാനിക്കുകയും ചെയ്യുക” എന്നായിരുന്നു ചീഫ് ജസ്റ്റിസ് ബി ആർ ഗവായി അഭിപ്രായപ്പെട്ടിരുന്നത്. അദ്ദേഹത്തിന്റെ അഭിപ്രായങ്ങൾ സോഷ്യൽ മീഡിയയിൽ വ്യാപകമായ പ്രതിഷേധത്തിന് കാരണമായിരുന്നു. തന്റെ വാക്കുകൾ ‘തെറ്റായി ചിത്രീകരിച്ചു’ എന്ന് ചീഫ് ജസ്റ്റിസ് പിന്നീട് വിശദീകരിക്കുകയും എല്ലാ മതങ്ങളോടും തനിക്ക് ബഹുമാനം ഉണ്ടെന്ന് പറയുകയും ചെയ്തിരുന്നു. ഈ സംഭവമാണ് ഇന്നത്തെ അഭിഭാഷകന്റെ പ്രതിഷേധത്തിന് കാരണമായത്. ഉടൻതന്നെ പോലീസ് അഭിഭാഷകനെ അറസ്റ്റ് ചെയ്തു.
