ബുദ്ധിജീവികൾ തീവ്രവാദികളായി മാറുമ്പോൾ അവർ മറ്റുള്ള ഭീകരരെക്കാൾ കൂടുതൽ അപകടകാരികളെന്ന് അഡീഷണൽ സോളിസിറ്റർ ജനറൽ(എഎസ്ജി) വി രാജു. ഡൽഹി കലാപക്കേസ് പ്രതിയായ ഷർജീൽ ഇമാമിന്റെ ജാമ്യാപേക്ഷയെ സുപ്രീംകോടതിയിൽ എതിർക്കുകയായിരുന്നു ഡൽഹി പോലീസ്. ഷർജീലും കൂട്ടാളികളും ലക്ഷ്യമിട്ടത് ഭരണമാറ്റം ആയിരുന്നുവെന്നും പോലീസിന് വേണ്ടി ഹാജരായ എഎസ്ജി കൂട്ടിച്ചേർത്തു.
ബുദ്ധിജീവികൾ ഭീകരരായി മാറുമ്പോൾ അവർ മറ്റുള്ള തീവ്രവാദികളെക്കാൾ അപകടകാരികളാണ്.സർക്കാർ പിന്തുണയോടെ ബിരുദങ്ങൾ നേടുകയും, സർക്കാർ ഫണ്ടിംഗ് ഉപയോഗിച്ച് ഡോക്ടർമാരാവുകയും, തുടർന്ന് ദുരുദ്ദേശപരമായ പ്രവർത്തനങ്ങൾക്കായി അത് ഉപയോഗിക്കുകയും ചെയ്യുന്ന ബുദ്ധിജീവികൾ കൂടുതൽ അപകടകാരികളാണെന്നാണ് എഎസ്ജി ചൂണ്ടിക്കാട്ടിയത്.
ഈ ഗൂഢാലോചനയിലെ പ്രധാനി എന്താണ് പറയുന്നത്? അദ്ദേഹം ഇതിനെ അക്രമാസക്തമായ പ്രതിഷേധം എന്നാണ് വിളിക്കുന്നത്. അസമിനെ ഇന്ത്യയിൽ നിന്ന് വേർപെടുത്തണമെന്ന് പറയുന്നു. അസമിനെ ഇന്ത്യയുമായി ബന്ധിപ്പിക്കുന്ന 16 കിലോമീറ്റർ നീളമുള്ള ഭൂപ്രദേശമായ ‘ചിക്കൻ നെക്കിനെ’ക്കുറിച്ച് അദ്ദേഹം സംസാരിക്കുന്നു. കശ്മീരിനെക്കുറിച്ച് അദ്ദേഹം സംസാരിക്കുന്നു. മുസ്ലീങ്ങളെ പ്രകോപിപ്പിക്കാൻ ശ്രമിക്കുകയാണ്. തുടർന്ന് മുത്തലാഖിനെക്കുറിച്ച് സംസാരിക്കുകയും കോടതിയെ അപകീർത്തിപ്പെടുത്തുകയും ചെയ്യുന്നു. ‘കോർട്ട് കി നാനി യാദ് കരാ ദെങ്കെ’ എന്ന് അദ്ദേഹം പറയുന്നു. ബാബരി മസ്ജിദിനെക്കുറിച്ചും സംസാരിക്കുന്നു. അതിനാൽ, ഭരണമാറ്റമാണ് ആത്യന്തിക ലക്ഷ്യമെന്ന് എഎസ്ജി വ്യക്തമാക്കി.
“അദ്ദേഹം ഒരു ബുദ്ധിജീവിയാണെന്നും, വേട്ടയാടപ്പെടുന്നുവെന്നും മറ്റും ഒരു കഥ കെട്ടിച്ചമയ്ക്കപ്പെടുന്നു. അങ്ങനെയല്ല. ബുദ്ധിജീവികൾ പലമടങ്ങ് അപകടകാരികളാണ്. പ്രതിഷേധത്തിന്റെ യഥാർത്ഥ ലക്ഷ്യം ഭരണമാറ്റമായിരുന്നു. സി‌എ‌എ പ്രതിഷേധം വെറും ഒരു നുണയായിരുന്നു. ഇത് ഒരു പോലീസുകാരൻ ഉൾപ്പെടെ 53 പേരുടെ മരണത്തിന് കാരണമായി. ഒരു ഐബി ഉദ്യോഗസ്ഥനും കൊല്ലപ്പെട്ടു. 530 ലധികം പേർക്ക് പരിക്കേറ്റുവെന്ന് അദ്ദേഹം ചൂണ്ടിക്കാട്ടി.
“ഡൊണാൾഡ് ട്രംപിന്റെ സന്ദർശനവുമായി സമന്വയിപ്പിക്കുന്ന തരത്തിലാണ് ഇത് ആസൂത്രണം ചെയ്തത്, അതുവഴി അന്താരാഷ്ട്ര മാധ്യമങ്ങളുടെ ശ്രദ്ധ പിടിച്ചുപറ്റും. ബുദ്ധിജീവികൾ തീവ്രവാദികളാകുമ്പോൾ, താഴേത്തട്ടിലുള്ള തീവ്രവാദികളേക്കാൾ അപകടകാരികളാണ്. ഈ ബുദ്ധിജീവികളാണ് യഥാർത്ഥ തലച്ചോറുകൾ. ഡൽഹി ചെങ്കോട്ടയ്ക്കടുത്ത് സ്ഫോടനം സംഭവിച്ചതിൽ നിന്ന് ഇത് പ്രകടമാണ്. “ഭരണമാറ്റമാണ് ആത്യന്തിക ലക്ഷ്യം. സി‌എ‌എ പ്രതിഷേധങ്ങൾ ഒരു കൊടും ക്രൂരതയായിരുന്നു, യഥാർത്ഥ ലക്ഷ്യം ഭരണമാറ്റമായിരുന്നു, സാമ്പത്തിക തകർച്ച സൃഷ്ടിക്കുകയും രാജ്യത്തുടനീളം കുഴപ്പങ്ങൾ സൃഷ്ടിക്കുകയും ചെയ്യുക എന്നതായിരുന്നു. യുഎസ് പ്രസിഡന്റ് ഡൊണാൾഡ് ട്രംപിന്റെ സന്ദർശനത്തോട് അനുബന്ധിച്ച് മനഃപൂർവ്വം കലാപങ്ങൾ സൃഷ്ടിച്ചു. ഈ ബുദ്ധിജീവികൾ എന്ന് വിളിക്കപ്പെടുന്നവർ താഴേത്തട്ടിലുള്ള തീവ്രവാദികളേക്കാൾ അപകടകാരികളാണെന്ന് അദ്ദേഹം ആവർത്തിച്ചു
