2019-ൽ ഇന്ത്യൻ ടീമിലെ തന്റെ അരങ്ങേറ്റം പ്രതീക്ഷിച്ചപോലെ മികച്ചതാകാത്തതിൽ വിഷമിച്ചിരുന്ന ശുഭ്മൻ ഗില്ലിനെ എം.എസ് ധോണി ആശ്വസിപ്പിച്ച കഥ ക്രിക്കറ്റ് ലോകത്ത് വളരെ പ്രശസ്തമാണ്. ഒരു അഭിമുഖത്തിലാണ് ഗിൽ ഈ കാര്യങ്ങളെല്ലാം എല്ലാം വെളിപ്പെടുത്തിയത്. നിലവിൽ ഇന്ത്യയുടെ ഏകദിന, ടെസ്റ്റ് ടീമുകളുടെ നായകൻ കൂടിയാണ് ഗിൽ.
2019-ൽ ന്യൂസിലൻഡിനെതിരായ ഏകദിന പരമ്പരയിലൂടെയാണ് 19-കാരനായ ശുഭ്മൻ ഗിൽ ഇന്ത്യൻ ടീമിൽ അരങ്ങേറുന്നത്. ഹാമിൽട്ടണിൽ നടന്ന ആ മത്സരത്തിൽ ഗില്ലിന് വെറും 9 റൺസ് മാത്രമാണ് നേടാനായത്. ഇന്ത്യ വെറും 92 റൺസിന് പുറത്താവുകയും മത്സരം തോൽക്കുകയും ചെയ്തു. തന്റെ സ്വപ്നതുല്യമായ അരങ്ങേറ്റം പാളിപ്പോയതിൽ ഗിൽ വല്ലാതെ നിരാശനായിരുന്നു.
ഗിൽ പുറത്ത് തനിച്ച് വിഷമിച്ചിരിക്കുന്നത് കണ്ടപ്പോൾ ഇതിഹാസ താരം എം.എസ് ധോണി അദ്ദേഹത്തിന്റെ അടുത്തുചെന്ന് പറഞ്ഞു:”നിന്റെ അരങ്ങേറ്റം എന്റേതിനേക്കാൾ എത്രയോ മികച്ചതാണ്!”. ആദ്യമൊന്ന് അമ്പരന്ന ഗില്ലിനോട് ചിരിച്ചുകൊണ്ട് ധോണി തന്റെ അരങ്ങേറ്റത്തെക്കുറിച്ച് ഓർമ്മിപ്പിച്ചു. 2004-ൽ ബംഗ്ലാദേശിനെതിരെ നടന്ന തന്റെ ആദ്യ ഏകദിനത്തിൽ ഒരു പന്ത് പോലും നേരിടാതെ (Golden Duck) താൻ റണ്ണൗട്ടായ കാര്യമാണ് ധോണി പറഞ്ഞത്.
ഇന്ത്യയുടെ എക്കാലത്തെയും മികച്ച ക്യാപ്റ്റൻമാരിൽ ഒരാളായ ധോണി, തനിക്ക് ഉണ്ടായ അനുഭവം പങ്കുവെച്ച് ഒരു തുടക്കക്കാരനെ ആശ്വസിപ്പിച്ചത് ഗില്ലിനെ സംബന്ധിച്ച് വലിയൊരു കാര്യമായിരുന്നു. അത് തന്റെ ആത്മവിശ്വാസം വീണ്ടെടുക്കാൻ സഹായിച്ചതിൽ വലിയ പങ്ക് വഹിച്ചു എന്നാണ് താരം പറഞ്ഞത്.
Discussion about this post