സംസ്ഥാനത്ത് ക്രിസ്മസ് ആഘോഷങ്ങൾ പൊടിപൊടിച്ചപ്പോൾ ബെവ്കോയിൽ റെക്കോർഡ് മദ്യവിൽപന. വെറും നാലുദിവസം കൊണ്ട് മലയാളികൾ കുടിച്ചുതീർത്തത് 332.62 കോടി രൂപയുടെ മദ്യമാണ്. കഴിഞ്ഞ വർഷത്തെ അപേക്ഷിച്ച് മദ്യവിൽപനയിൽ 19 ശതമാനത്തിന്റെ വൻ വർദ്ധനവാണ് ഇക്കുറി രേഖപ്പെടുത്തിയിരിക്കുന്നത്.
ഡിസംബർ 22 മുതൽ 25 വരെയുള്ള കണക്കുകൾ പ്രകാരം ക്രിസ്മസ് തലേന്നായ ഡിസംബർ 24-നാണ് ഏറ്റവും കൂടുതൽ വിൽപന നടന്നത്. അന്നേദിവസം മാത്രം 114.45 കോടി രൂപയുടെ മദ്യം വിറ്റഴിച്ചു. കഴിഞ്ഞവർഷം ഇതേദിവസം 98.98 കോടി രൂപയുടെ മദ്യമായിരുന്നു വിറ്റുപോയിരുന്നത്.
വിൽപനയിലെ കണക്കുകൾ ഒറ്റനോട്ടത്തിൽ:
ഡിസംബർ 22: 77.62 കോടി രൂപ
ഡിസംബർ 23: 81.56 കോടി രൂപ
ഡിസംബർ 24 (ക്രിസ്മസ് തലേന്ന്): 114.45 കോടി രൂപ
ഡിസംബർ 25 (ക്രിസ്മസ്): 59.21 കോടി രൂപ
ആകെ വിൽപന: 332.62 കോടി രൂപ
വിൽപനയിൽ ഇത്തവണയും തൃശൂരിലെ ചാലക്കുടി ഔട്ട്ലെറ്റാണ് ഒന്നാം സ്ഥാനത്തെത്തിയത്. 78.90 ലക്ഷം രൂപയുടെ മദ്യമാണ് ഇവിടെ വിറ്റുപോയത്. തിരുവനന്തപുരത്തെ പഴയ ഉച്ചക്കട (68.73 ലക്ഷം), എറണാകുളം കടവന്ത്ര (66.92 ലക്ഷം) എന്നീ ഔട്ട്ലെറ്റുകളാണ് യഥാക്രമം രണ്ടും മൂന്നും സ്ഥാനങ്ങളിൽ.
സംസ്ഥാനത്തുടനീളം ബെവ്കോ ആരംഭിച്ച പുതിയ പ്രീമിയം കൗണ്ടറുകളും മെച്ചപ്പെട്ട സൗകര്യങ്ങളും വിൽപന വർദ്ധിക്കാൻ പ്രധാന കാരണമായെന്നാണ് വിലയിരുത്തൽ. തിരക്ക് കുറയ്ക്കാനായി കൂടുതൽ കൗണ്ടറുകൾ തുറന്നതും ഉപഭോക്താക്കൾക്ക് സ്വയം മദ്യം തിരഞ്ഞെടുക്കാനുള്ള സൗകര്യം ഒരുക്കിയതും ബെവ്കോയ്ക്ക് ഗുണകരമായി. വരും ദിവസങ്ങളിൽ ന്യൂ ഇയർ ആഘോഷങ്ങൾ കൂടി വരുന്നതോടെ വിൽപന ഇനിയും വർദ്ധിക്കുമെന്നാണ് ബെവ്കോ അധികൃതരുടെ പ്രതീക്ഷ. കഴിഞ്ഞ ഓണക്കാലത്ത് 12 ദിവസം കൊണ്ട് ബെവ്കോ 826.38 കോടി രൂപയുടെ റെക്കോർഡ് വിൽപന നടത്തിയിരുന്നു.
Discussion about this post