ലോകം മുഴുവൻ ഉറ്റുനോക്കുന്ന യുക്രൈൻ സമാധാന ചർച്ചകൾക്കായി പ്രസിഡൻ്റ് ഡൊണാൾഡ് ട്രംപ് എത്തുമ്പോൾ ചർച്ചയാകുന്നത് അദ്ദേഹത്തിൻ്റെ കൈവെള്ളയിലെ ദുരൂഹമായ കറുത്ത പാടുകൾ. ചർച്ചകളുടെയും കൈകൊടുക്കലുകളുടെയും ചിത്രങ്ങൾ പുറത്തുവന്നതോടെ ട്രംപിൻ്റെ ആരോഗ്യനിലയെക്കുറിച്ച് സമൂഹമാധ്യമങ്ങളിൽ വലിയ രീതിയിലുള്ള അഭ്യൂഹങ്ങളാണ് പടരുന്നത്.
ട്രംപിൻ്റെ വലതു കൈവെള്ളയിലും വിരലുകൾക്കിടയിലുമായി കറുത്ത നിറത്തിലുള്ള പാടുകൾ (Bruising) വ്യക്തമായി കാണാം. യുക്രൈൻ പ്രസിഡൻ്റ് വ്ലാഡിമിർ സെലൻസ്കിയുമായുള്ള കൂടിക്കാഴ്ചയ്ക്കിടെയുള്ള ദൃശ്യങ്ങളിലാണ് ഇത് ആദ്യം ശ്രദ്ധയിൽപ്പെട്ടത്. ഇതോടെ ട്രംപിന് എന്തെങ്കിലും ഗുരുതരമായ ആരോഗ്യപ്രശ്നങ്ങളുണ്ടോ എന്ന ചോദ്യം ഉയർന്നു കഴിഞ്ഞു.
സമാധാന ചർച്ചകൾക്ക് നേതൃത്വം നൽകുന്നതിനിടെയാണ് ട്രംപിൻ്റെ ആരോഗ്യത്തെക്കുറിച്ചുള്ള ചർച്ചകൾ ഉയരുന്നത് എന്നത് ശ്രദ്ധേയമാണ്. ഇതിനുമുൻപും സമാനമായ പാടുകൾ ട്രംപിൻ്റെ കൈകളിൽ പ്രത്യക്ഷപ്പെട്ടിരുന്നു. അന്ന് ‘പേപ്പർ കട്ട്’ മൂലമുണ്ടായ മുറിവുകളാണെന്നായിരുന്നു ഔദ്യോഗിക വിശദീകരണം. പ്രസിഡൻ്റിൻ്റെ ആരോഗ്യത്തെക്കുറിച്ച് നിലവിൽ ആശങ്കപ്പെടേണ്ട സാഹചര്യമില്ലെന്നാണ് ട്രംപിനോട് അടുത്ത വൃത്തങ്ങൾ നൽകുന്ന സൂചന.
മെഡിക്കൽ വിദഗ്ധർ ഇതിന് ലളിതമായ ചില കാരണങ്ങളാണ് ചൂണ്ടിക്കാണിക്കുന്നത്:
അമിതമായ ഹാൻഡ്ഷെയ്ക്കുകൾ: ലോകനേതാക്കളുമായും ഉദ്യോഗസ്ഥരുമായും നിരന്തരമായി ഹസ്തദാനം ) ചെയ്യുന്നത് മൂലം ചർമ്മത്തിന് താഴെയുള്ള ചെറിയ രക്തക്കുഴലുകൾ പൊട്ടുകയും അത് കറുത്ത പാടുകളായി മാറുകയും ചെയ്യാം. പ്രത്യേകിച്ചും പ്രായമേറിയവരിൽ ചർമ്മത്തിന് കട്ടി കുറവായതിനാൽ ഇത്തരത്തിലുള്ള ‘ബ്രൂയിസിംഗ്’ സാധാരണമാണ്. ഹൃദയാരോഗ്യത്തിനായി ട്രംപ് ആസ്പിരിൻ പോലുള്ള മരുന്നുകൾ ഉപയോഗിക്കാറുണ്ട്. രക്തം കട്ടപിടിക്കുന്നത് തടയുന്ന ഇത്തരം മരുന്നുകൾ കഴിക്കുന്നവർക്ക് ചെറിയ തട്ടലോ മുട്ടലോ ഏറ്റാൽ പോലും പെട്ടെന്ന് കറുത്ത പാടുകൾ വരാൻ സാധ്യതയുണ്ട്.കഠിനമായ ശൈത്യകാലത്ത് ചർമ്മം വരളുന്നതും ചെറിയ രീതിയിലുള്ള രക്തസ്രാവത്തിന് കാരണമായേക്കാം.
Discussion about this post