ജനുവരി 11-ന് വഡോദരയിൽ ആരംഭിക്കുന്ന ഇന്ത്യ-ന്യൂസിലൻഡ് ഏകദിന പരമ്പരയിൽ ആരാധകർ ഉറ്റുനോക്കുന്നത് ഐസിസി റാങ്കിംഗിലെ ഒന്നാം സ്ഥാനത്തിനായുള്ള പോരാട്ടമാണ്. നിലവിൽ ടീം ഇന്ത്യയുടെ നായകൻ രോഹിത് ശർമ്മയാണ് ഏകദിന റാങ്കിംഗിൽ ഒന്നാമത്. എന്നാൽ തൊട്ടുപിന്നാലെ വിരാട് കോഹ്ലിയുമുണ്ട്.
ന്യൂസിലൻഡിനെതിരായ മൂന്ന് മത്സരങ്ങളിൽ മികച്ച പ്രകടനം കാഴ്ചവെച്ചാൽ കോഹ്ലിക്ക് എളുപ്പത്തിൽ രോഹിത്തിനെ മറികടന്ന് ലോക ഒന്നാം നമ്പർ ഏകദിന ബാറ്ററാകാൻ സാധിക്കും. കോഹ്ലി ഈ ലക്ഷ്യത്തോടെയാകും കളത്തിലിറങ്ങുകയെന്ന് ഡി വില്ലിയേഴ്സ് തന്റെ യൂട്യൂബ് ചാനലിലൂടെ പറഞ്ഞു. “രോഹിത് ഒന്നാം സ്ഥാനത്താണെന്ന കാര്യം വിരാടിന് കൃത്യമായി അറിയാം. അവർ അടുത്ത സുഹൃത്തുക്കളും ഒരേ ടീമിലെ അംഗങ്ങളുമാണെങ്കിലും, റാങ്കിംഗിൽ താഴെ നിൽക്കാൻ വിരാട് ഇഷ്ടപ്പെടുന്നില്ല.” അദ്ദേഹം പറഞ്ഞു.
“അവർ തമ്മിൽ ഇതിനെക്കുറിച്ച് നേരിട്ട് സംസാരിക്കില്ലായിരിക്കാം. പക്ഷേ, രോഹിത്തിന് തന്റെ ഒന്നാം സ്ഥാനം നിലനിർത്തണമെന്നും വിരാടിന് അത് തിരിച്ചുപിടിക്കണമെന്നും ആഗ്രഹമുണ്ടാകും.” ഇതിഹാസം പറഞ്ഞു നിർത്തി. എന്തായാലും ലോകത്തിലെ ഏറ്റവും മികച്ച രണ്ട് ബാറ്റർമാർ ഒരു ടീമിൽ ഒന്നാം സ്ഥാനത്തിനായി മത്സരിക്കുമ്പോൾ അത് ആത്യന്തികമായി ഇന്ത്യൻ ടീമിന് കൂടുതൽ റൺസ് നേടിക്കൊടുക്കാൻ സഹായിക്കും. ഈ ആരോഗ്യകരമായ മത്സരം ടീമിന്റെ വിജയസാധ്യത വർദ്ധിപ്പിക്കും.
