ചെന്നൈ : പ്രധാനമന്ത്രി നരേന്ദ്രമോദിക്കെതിരായി നടൻ കിഷോർ നടത്തിയ പരാമർശമാണ് ഇപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്. ടൈം മെഷീൻ ഉണ്ടായിരുന്നെങ്കിൽ 2014ലേക്ക് തിരികെ പോയി പ്രധാനമന്ത്രിയെ മാറ്റും എന്നാണ് ഒരു സിനിമയുടെ പ്രമോഷൻ പരിപാടിക്കിടെ കിഷോർ പ്രസ്താവന നടത്തിയത്. കഴിഞ്ഞ കുറച്ചു വർഷങ്ങളായി ഇന്ത്യ ഒരുപാട് മാറിയെന്നും രാജ്യം ഇപ്പോൾ അപകടത്തിൽ ആണെന്നും കിഷോർ സൂചിപ്പിച്ചു.
ഇന്ത്യ ഗ്ലിറ്റ്സ് തമിഴ് യൂട്യൂബ് ചാനലിന് നൽകിയ അഭിമുഖത്തിൽ ആയിരുന്നു കിഷോറിന്റെ ഈ പരാമർശങ്ങൾ. കിഷോർ നായകനായ മെല്ലിസൈ എന്ന ചിത്രം ഉടൻ തിയേറ്ററുകളിൽ എത്താനിരിക്കുകയാണ്. “ഇപ്പോൾ ജനാധിപത്യം വഴിതെറ്റിക്കപ്പെടുകയാണ്. വിദ്വേഷ വികാരങ്ങൾ വർദ്ധിച്ചു. എനിക്ക് ജീവിതത്തിൽ പിന്നോട്ട് പോകാൻ അവസരം ലഭിച്ചിരുന്നെങ്കിൽ, ഞാൻ 2014 ലേക്ക് പോയി പ്രധാനമന്ത്രിയെ മാറ്റുമായിരുന്നു. ഇന്ത്യ തന്നെ മാറിയേനെ. രാജ്യം ഇപ്പോൾ അപകടകരമായ അവസ്ഥയിലാണ്. നമ്മുടെ രാജ്യം മാത്രമല്ല, പല രാജ്യങ്ങളും അങ്ങനെയാണ്. ഇന്ന് ട്രംപിനെ എടുക്കുക. കാര്യങ്ങൾ ഇങ്ങനെ തുടർന്നാൽ, ഇത് മാറ്റാൻ വർഷങ്ങളെടുക്കും.വെറുപ്പിനെ നിക്ഷേപമായി കണ്ട് ഭരിക്കുന്നവർ വളരെ അപകടകാരികളാണ്. സ്നേഹമില്ലെങ്കിൽ ഇവിടെ ഒന്നുമില്ല,” എന്നും കിഷോർ അഭിപ്രായപ്പെട്ടു.
Discussion about this post