ഐ.പി.എല്ലിൽ റോയൽ ചലഞ്ചേഴ്സ് ബംഗളൂരുവിന് വേണ്ടി കളിക്കുമ്പോൾ ഇന്ത്യൻ ക്രിക്കറ്റ് ഇതിഹാസം വിരാട് കോഹ്ലിക്കൊപ്പം ബാറ്റ് ചെയ്ത അനുഭവം ആവേശത്തോടെ പങ്കുവെച്ച് ഇംഗ്ലണ്ട് യുവ ഓൾറൗണ്ടർ ജേക്കബ് ബെഥേൽ. ആർ.സി.ബിയുടെ ഹോം ഗ്രൗണ്ടായ എം. ചിന്നസ്വാമി സ്റ്റേഡിയത്തിൽ ആദ്യമായി കോഹ്ലിക്കൊപ്പം ഇന്നിങ്സ് ഓപ്പൺ ചെയ്യാൻ ഇറങ്ങിയ നിമിഷത്തെക്കുറിച്ച് ‘ദി സൂപ്പർ ഓവർ’ എന്ന യൂട്യൂബ് ചാനലിന് നൽകിയ അഭിമുഖത്തിലാണ് ബെഥേൽ മനസ്സ് തുറന്നത്. കോഹ്ലിക്കായി പതിനായിരക്കണക്കിന് ആരാധകർ സ്റ്റേഡിയത്തിൽ ആർത്തുവിളിക്കുമ്പോൾ ഉണ്ടാകുന്ന അന്തരീക്ഷം സങ്കൽപ്പാതീതമാണെന്ന് 22-കാരനായ താരം പറഞ്ഞു.
ഞങ്ങൾ ബാറ്റ് ചെയ്യാനായി മൈതാനത്തേക്ക് നടക്കുമ്പോൾ സ്റ്റേഡിയത്തിൽ ഉയർന്ന കാതടപ്പിക്കുന്ന ശബ്ദം കാരണം സ്വന്തം ചിന്തകൾ പോലും കേൾക്കാൻ പറ്റാത്ത അവസ്ഥയിലായിരുന്നു താനെന്നും ആരാധകർ കോഹ്ലി കോഹ്ലി എന്ന് വിളിച്ചുപറഞ്ഞ് സ്റ്റേഡിയത്തെ ഇളക്കിമറിക്കുകയായിരുന്നുവെന്നും ബെഥേൽ ഓർത്തെടുത്തു. ആരാധകർ നമ്മുടെ തലയ്ക്ക് മുകളിൽ വന്നു നിൽക്കുന്നത് പോലെയാണ് അപ്പോൾ തോന്നുക. ഭാഗ്യവശാൽ ആ മത്സരത്തിൽ കുറച്ചു റൺസ് കൂട്ടിച്ചേർക്കാൻ തങ്ങൾക്ക് കഴിഞ്ഞു. നേരിട്ട രണ്ടാം പന്തിൽ തന്നെ താൻ ഫോറടിച്ചപ്പോൾ സ്റ്റേഡിയത്തിൽ നിന്ന് ഉയർന്ന അത്രയും വലിയൊരു ശബ്ദം ജീവിതത്തിൽ ഇതുവരെ കേട്ടിട്ടില്ലെന്നും യുവതാരം വ്യക്തമാക്കി.
മത്സരത്തിനിടയിൽ വിരാട് കോഹ്ലി തനിക്ക് അധികം നിർദ്ദേശങ്ങളൊന്നും നൽകിയിരുന്നില്ലെന്നും എന്നാൽ മികച്ച രീതിയിൽ കളിക്കാൻ നിരന്തരം പ്രോത്സാഹിപ്പിച്ചിരുന്നുവെന്നും ബെഥേൽ വെളിപ്പെടുത്തി. താൻ ആ സമയത്ത് നന്നായി റൺസ് കണ്ടെത്തുന്നുണ്ടായിരുന്നതുകൊണ്ട് ഒരുപാട് കാര്യങ്ങൾ സംസാരിക്കുന്നതിന് പകരം മികച്ച ഷോട്ടുകൾ കളിക്കുമ്പോൾ മറുതലയ്ക്കൽ നിന്ന് കോഹ്ലി നൽകിയ പിന്തുണ വളരെ വലുതായിരുന്നു. ഒരു നല്ല ഷോട്ട് കളിച്ചാൽ അപ്പുറത്തുനിന്ന് കോഹ്ലി ‘ഷോട്ട് മാൻ’ എന്ന് വിളിച്ച് അഭിനന്ദിക്കുന്നത് കേൾക്കാമായിരുന്നുവെന്ന് താരം പറഞ്ഞു. 2025 ലെ ഐ.പി.എൽ മെഗാ ലേലത്തിൽ 2.60 കോടി രൂപയ്ക്കാണ് ആർ.സി.ബി ഈ യുവ പ്രതിഭയെ സ്വന്തമാക്കിയത്. ആർ.സി.ബി കിരീടം ചൂടിയ 2026 ലെ ഐ.പി.എൽ സീസണിൽ ഏഴ് മത്സരങ്ങളിൽ ബെഥേൽ പാഡ് കെട്ടിയിരുന്നു. എങ്കിലും ബാറ്റിംഗിൽ പ്രതീക്ഷിച്ചത്ര വലിയ സ്വാധീനം ചെലുത്താൻ താരത്തിന് സാധിച്ചില്ല. ഏഴ് ഇന്നിങ്സുകളിൽ നിന്നായി 124.67 സ്ട്രൈക്ക് റേറ്റിൽ വെറും 96 റൺസ് മാത്രമാണ് താരം സീസണിൽ അടിച്ചെടുത്തത്.
അഭിമുഖത്തിലെ റാപ്പിഡ് ഫയർ റൗണ്ടിൽ, തന്റെ ബാറ്റിംഗ് ശൈലിയിലേക്ക് കൂട്ടിച്ചേർക്കാൻ ആഗ്രഹിക്കുന്ന ഒരു ഷോട്ടിനെക്കുറിച്ച് ചോദിച്ചപ്പോൾ മുൻ ഇന്ത്യൻ ട്വന്റി-20 ക്യാപ്റ്റൻ സൂര്യകുമാർ യാദവിന്റെ സിഗ്നേച്ചർ ഷോട്ടിനെക്കുറിച്ചാണ് ബെഥേൽ സംസാരിച്ചത്. സൂര്യകുമാർ യാദവ് കളിക്കുന്നത് പോലെയുള്ള പിക്ക്-അപ്പ് സ്കൂപ്പ് ഷോട്ട് സ്വന്തമാക്കാൻ തനിക്ക് അതിയായ ആഗ്രഹമുണ്ടെന്ന് ഈ ഇടങ്കയ്യൻ ബാറ്റർ തുറന്നുപറഞ്ഞു. പന്ത് സ്ക്വയർ ലെഗിന് മുകളിലൂടെ അടിച്ചുപറത്താൻ തനിക്ക് സാധിക്കുമെങ്കിലും, മിഡിൽ സ്റ്റംപ് ലക്ഷ്യമാക്കി വരുന്ന പന്തുകളെ തല കുനിച്ച് നേരിട്ട് സിക്സറിലേക്ക് മാറ്റുന്ന സൂര്യകുമാറിന്റെ ആ മാന്ത്രിക ഷോട്ട് പഠിച്ചെടുക്കാനാണ് താൻ ആഗ്രഹിക്കുന്നത്. ഇന്ത്യക്കെതിരെ അടുത്തിടെ സമാപിച്ച മൂന്ന് മത്സരങ്ങളുടെ ഏകദിന പരമ്പരയിൽ ഇംഗ്ലണ്ടിനായി ജേക്കബ് ബെഥേൽ മികച്ച പ്രകടനമാണ് പുറത്തെടുത്തത്.
ആദ്യ രണ്ട് മത്സരങ്ങളിലും യഥാക്രമം 14, 4 റൺസ് മാത്രം നേടി നിരാശപ്പെടുത്തിയെങ്കിലും, ലോർഡ്സിൽ നടന്ന നിർണായകമായ അവസാന ഏകദിനത്തിൽ 93 പന്തിൽ നിന്ന് 91 റൺസ് അടിച്ചുകൂട്ടി ഇംഗ്ലണ്ടിന് പരമ്പര വിജയം സമ്മാനിക്കുന്നതിൽ ബെഥേൽ പ്രധാന പങ്കുവഹിച്ചിരുന്നു.
