ടി20 ലോകകപ്പിലെ ഇന്ത്യ-പാകിസ്ഥാൻ മഹാപോരാട്ടത്തിന് മുന്നോടിയായി പാക് സ്പിന്നർ ഉസ്മാൻ താരിക്കിന്റെ വ്യത്യസ്തമായ ബൗളിംഗ് ശൈലി അനുകരിച്ച് ഇന്ത്യൻ നായകൻ സൂര്യകുമാർ യാദവ്. പന്ത് റിലീസ് ചെയ്യുന്നതിന് മുൻപുള്ള താരിക്കിന്റെ പ്രത്യേക രീതിയിലുള്ള അനുകരിക്കുന്ന സൂര്യയുടെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്.
കൊളംബോയിൽ മഴ പെയ്തതിനെ തുടർന്ന് ഇൻഡോർ സ്റ്റേഡിയത്തിലായിരുന്നു ഇന്ത്യൻ ടീമിന്റെ പരിശീലനം. പാക് സ്പിന്നർ ഉസ്മാൻ താരിക്കിന്റെ നിഗൂഢമായ ബൗളിംഗ് ശൈലി നേരിടാൻ ടീം ഇന്ത്യ കടുത്ത പരിശീലനത്തിലാണ്. പാകിസ്ഥാൻ നിരയിലെ പുതിയ അത്ഭുതമാണ് സ്പിന്നർ ഉസ്മാൻ താരിക്ക്. പന്ത് എറിയുന്നതിന് തൊട്ടുമുമ്പ് താരം നിശ്ചലനായി നിൽക്കുന്നതുംസൈഡ് ആം ആക്ഷനും ബാറ്റ്സ്മാൻമാർക്ക് പന്തിന്റെ ഗതി മനസ്സിലാക്കുന്നത് പ്രയാസകരമാക്കുന്നു.
ഇതുവരെ നാല് ടി20 മത്സരങ്ങൾ മാത്രം കളിച്ച താരിക്ക്, തന്റെ വ്യത്യസ്തമായ ശൈലിയിലൂടെയാണ് ലോകകപ്പ് ടീമിൽ ഇടംപിടിച്ചത്. മുൻപ് താരത്തിന്റെ ആക്ഷൻ റിപ്പോർട്ട് ചെയ്യപ്പെട്ടിരുന്നെങ്കിലും ഐസിസി പിന്നീട് അനുമതി നൽകിയിരുന്നു. വാർത്താ സമ്മേളനത്തിൽ താരിക്കിന്റെ ബൗളിംഗിനെക്കുറിച്ച് ചോദിച്ചപ്പോൾ സൂര്യകുമാർ നൽകിയ മറുപടി ആരാധകർ ഏറ്റെടുത്തു കഴിഞ്ഞു.
“ചിലപ്പോൾ പരീക്ഷയിൽ ഔട്ട് ഓഫ് സിലബസ് ചോദ്യങ്ങൾ വരാറുണ്ട്. എന്ന് കരുതി ആ ചോദ്യം നമുക്ക് ഉപേക്ഷിക്കാൻ കഴിയില്ലല്ലോ? അത് നേരിടാൻ നമ്മൾ നമ്മുടേതായ വഴികൾ കണ്ടെത്തണം. താരിക്ക് വ്യത്യസ്തനായ ബൗളറാണ്, പക്ഷേ അദ്ദേഹത്തിന് മുന്നിൽ ഞങ്ങൾ കീഴടങ്ങില്ല,” സൂര്യ വ്യക്തമാക്കി.
താരിക്കിന്റെ ആക്ഷന് സമാനമായി പന്തെറിയുന്ന ബൗളർമാരെ വെച്ച് ഇന്ത്യൻ ബാറ്റ്സ്മാൻമാർ നെറ്റ്സിൽ കഠിന പരിശീലനം നടത്തുന്നുണ്ട്. പരീക്ഷയ്ക്ക് തയ്യാറെടുക്കുന്നത് പോലെ തന്നെ കൃത്യമായ പ്ലാനിംഗോടെയാണ് ടീം ഇന്ത്യ നാളെ മൈതാനത്തിറങ്ങുകയെന്നും സൂര്യകുമാർ കൂട്ടിച്ചേർത്തു.
View this post on Instagram
Discussion about this post