ഐപിഎൽ 2026 സീസണിൽ ചെന്നൈ സൂപ്പർ കിംഗ്സിന്റെ ദയനീയ പ്രകടനത്തിന് പിന്നിലെ പ്രധാന കാരണം ഓപ്പണിംഗ് ജോഡികളുടെ പരാജയമാണെന്ന് മുൻ താരം മോഹിത് ശർമ്മ. ആർസിബിക്കെതിരായ 43 റൺസിന്റെ തോൽവിക്ക് പിന്നാലെ ‘ക്രിക്ബസിനോട്’ സംസാരിക്കുകയായിരുന്നു അദ്ദേഹം.
സഞ്ജുവും റുതുരാജും മികച്ച കളിക്കാരാണെങ്കിലും അവരുടെ ഇപ്പോഴത്തെ മനോഭാവം ടീമിനെ തളർത്തുകയാണെന്ന് മോഹിത് ശർമ്മ പറഞ്ഞു. “ചെന്നൈ ടീമിന്റെ ഏറ്റവും വലിയ ആശങ്ക സഞ്ജു സാംസൺ – റുതുരാജ് സഖ്യമാണ്. ബ്രെവിസും ധോണിയും തിരിച്ചെത്തിയേക്കാം, പക്ഷേ പ്രശ്നം മിഡിൽ ഓർഡറിലല്ല. പവർപ്ലേയിൽ വിക്കറ്റ് സംരക്ഷിച്ചുകൊണ്ട് എങ്ങനെ റൺസ് ഉയർത്താം എന്നതിൽ ഇവർ പരാജയപ്പെടുന്നു. ഇത് സ്കില്ലിന്റെ പ്രശ്നമല്ല, മറിച്ച് അടുത്ത മത്സരത്തിനായുള്ള അവരുടെ മൈൻഡ് സെറ്റാണ് മാറേണ്ടത്.” മോഹിത് ശർമ്മ പറഞ്ഞു.
ഒരു ടീമിന്റെ സ്ഥിരതയാർന്ന പ്രകടനത്തിന് ആദ്യ മൂന്ന് വിക്കറ്റുകൾ നൽകുന്ന അടിത്തറ പ്രധാനമാണെന്ന് മുൻ പേസർ സഹീർ ഖാൻ ചൂണ്ടിക്കാട്ടി “മത്സരങ്ങൾ ജയിക്കണമെങ്കിൽ ടോപ്പ് ഓർഡർ ഉത്തരവാദിത്തം ഏറ്റെടുക്കണം. സഞ്ജുവും റുതുരാജും പരാജയപ്പെടുമ്പോൾ അത് മിഡിൽ ഓർഡറിനെ കടുത്ത സമ്മർദ്ദത്തിലാക്കുന്നു. വിക്കറ്റുകൾ കയ്യിലുണ്ടെങ്കിൽ മാത്രമേ അവസാന ഓവറുകളിൽ ആർസിബിയെപ്പോലെയുള്ള ടീമുകൾക്കെതിരെ ആഞ്ഞടിക്കാൻ സാധിക്കൂ. എത്രയും വേഗം ഈ സഖ്യം ഫോമിലേക്ക് തിരിച്ചെത്തണം, ഇല്ലെങ്കിൽ കാര്യങ്ങൾ കൈവിട്ടുപോകും.” സഹീർ ഖാൻ പറഞ്ഞു.
ഈ സീസണിൽ ഇതുവരെ കളിച്ച മൂന്ന് ഇന്നിംഗ്സുകളിൽ നിന്ന് സഞ്ജു സാംസൺ വെറും 22 റൺസും റുതുരാജ് ഗെയ്ക്വാദ് 41 റൺസുമാണ് നേടിയത്. ഏപ്രിൽ 11-ന് ഡൽഹി ക്യാപിറ്റൽസിനെതിരെ ചെപ്പോക്കിൽ നടക്കുന്ന മത്സരത്തിൽ ഈ സഖ്യം എങ്ങനെ പ്രതികരിക്കുമെന്നാണ് ക്രിക്കറ്റ് ലോകം ഉറ്റുനോക്കുന്നത്.
