ന്യൂഡൽഹി : ഓസ്ട്രേലിയൻ ലക്ഷ്വറി ട്രാവൽ ക്രിയേറ്ററായ ക്രിസ്റ്റ്യൻ ബെറ്റ്സ്മാൻ ഇന്ത്യയുടെ വടക്കുകിഴക്കൻ സംസ്ഥാനങ്ങളിലൂടെ നടത്തിയ തന്റെ അവിസ്മരണീയമായ യാത്രാനുഭവങ്ങൾ സമൂഹമാധ്യമങ്ങളിലൂടെ പങ്കുവെച്ചു. പ്രകൃതിഭംഗിയും തനതായ ഗോത്ര സംസ്കാരവും പൈതൃകവും കൊണ്ട് സമ്പന്നമായ ഈ പ്രദേശം ഇന്ത്യയിലെ മറ്റ് സ്ഥലങ്ങളിൽ നിന്ന് തികച്ചും വ്യത്യസ്തമാണെന്നും ഓരോ സംസ്ഥാനത്തിനും അതിന്റേതായ സവിശേഷതകളുണ്ടെന്നും അദ്ദേഹം അഭിപ്രായപ്പെടുന്നു. സിഡ്നിയിൽ നിന്നുള്ള ഈ യാത്രികൻ തന്റെ യാത്രയിൽ കണ്ടറിഞ്ഞ കാഴ്ചകളും സംസ്കാരങ്ങളും വിവരിച്ചുകൊണ്ടാണ് വടക്കുകിഴക്കൻ ഇന്ത്യയെ സഞ്ചാരികൾക്ക് പരിചയപ്പെടുത്തുന്നത്.
മേഘാലയയെ ഒരു ഒളിഞ്ഞിരിക്കുന്ന സ്വർഗ്ഗമായാണ് ക്രിസ്റ്റ്യൻ വിശേഷിപ്പിക്കുന്നത്. തെളിഞ്ഞ നദികളും നിഗൂഢമായ ഗുഹകളും ജീവനുള്ള വേരുകൾ കൊണ്ടുള്ള പാലങ്ങളും (living root bridges) അദ്ദേഹത്തിൽ ഏറെ സാഹസികത ഉണർത്തി. തുടർന്ന് യാത്ര ചെയ്ത അസമിലെ വിശാലമായ തേയിലത്തോട്ടങ്ങളുടെ പച്ചപ്പും പ്രകൃതിഭംഗിയുമാണ് അദ്ദേഹത്തെ ആകർഷിച്ചത്. ഇതിന് പുറമെ, വിനോദസഞ്ചാരികളുടെ പ്രിയപ്പെട്ട കാടിനുള്ളിലൂടെയുള്ള സഫാരിയിലൂടെ ഒറ്റക്കൊമ്പൻ കാണ്ടാമൃഗങ്ങളെ അവയുടെ സ്വാഭാവിക ആവാസവ്യവസ്ഥയിൽ കാണാൻ സാധിച്ചതും അദ്ദേഹത്തിന് മികച്ച അനുഭവമായി മാറി.
യാത്രയിലെ ഏറ്റവും സവിശേഷമായ അനുഭവങ്ങൾ സമ്മാനിച്ചത് നാഗാലാൻഡാണെന്ന് അദ്ദേഹം പറയുന്നു. നാഗാ ഗോത്രങ്ങൾ ഒന്നിക്കുന്ന പ്രശസ്തമായ ഹോൺബിൽ ഫെസ്റ്റിവലിൽ പങ്കെടുത്ത അദ്ദേഹം അവിടുത്തെ ഗോത്രവർഗ്ഗ പാരമ്പര്യവും തദ്ദേശീയ കായിക വിനോദങ്ങളും പരമ്പരാഗത നൃത്തങ്ങളും സംഗീതവും ഭക്ഷണവും നേരിട്ടറിഞ്ഞു. മണിപ്പൂരിലെ ശാന്തമായ പ്രകൃതിസൗന്ദര്യവും അദ്ദേഹത്തെ അത്ഭുതപ്പെടുത്തി. ലോകതാക് തടാകത്തിലെ ഒഴുകുന്ന ചെറിയ ദ്വീപുകൾക്കിടയിലൂടെയുള്ള സമാധാനപൂർണ്ണമായ ബോട്ട് യാത്രയും മണിപ്പൂരിന്റെ തനത് ആയോധനകലകളും അദ്ദേഹത്തിന് പുതിയ കാഴ്ചകളായി.
ഇന്ത്യയിൽ അധികമാരും പര്യവേക്ഷണം ചെയ്യാത്തതും എന്നാൽ ഏറെ മനോഹരവുമായ സംസ്ഥാനമാണ് മിസോറാം എന്ന് അദ്ദേഹം സാക്ഷ്യപ്പെടുത്തുന്നു. പച്ചപ്പണിഞ്ഞ കുന്നുകൾക്കിടയിലുള്ള ഗ്രാമങ്ങളും അവിടുത്തെ ശാന്തമായ അന്തരീക്ഷവും അദ്ദേഹത്തിന് ഏറെ സമാധാനം നൽകുന്നതായിരുന്നു. ത്രിപുരയിലെ മാണിക്യ രാജവംശത്തിന്റെ കൊട്ടാരങ്ങൾ സന്ദർശിച്ച ക്രിസ്റ്റ്യൻ, ആ നാടിന്റെ രാജകീയ പാരമ്പര്യവും നൂറ്റാണ്ടുകൾ പഴക്കമുള്ള ചരിത്രവും പഠിച്ചു. ഇന്ത്യയിലെ ഏറ്റവും മനോഹരവും എന്നാൽ വേണ്ടത്ര പരിഗണിക്കപ്പെടാത്തതുമായ ശാന്തമായ ലക്ഷ്യസ്ഥാനങ്ങളിലൊന്നാണ് ത്രിപുരയെന്ന് പറഞ്ഞുകൊണ്ടാണ് അദ്ദേഹം തന്റെ മികച്ച യാത്രാനുഭവങ്ങളുടെ വിവരണം അവസാനിപ്പിക്കുന്നത്
