ഇന്നത്തെ തിരക്കേറിയ ജീവിതത്തിനിടയിൽ 5 മുതൽ 6 മണിക്കൂർ വരെ മാത്രം ഉറങ്ങുകയും, അത് തികച്ചും സ്വാഭാവികമാണെന്ന് കരുതുകയും ചെയ്യുന്നവരാണ് നമ്മളിൽ പലരും. എന്നാൽ, കുറഞ്ഞ സമയം മാത്രം ഉറങ്ങുന്നത് തലച്ചോറിനെയും ശരീരത്തെയും നിശബ്ദമായി നശിപ്പിക്കുന്നതിനുള്ള ഏറ്റവും എളുപ്പമുള്ള മാർഗ്ഗമാണെന്ന് ആരോഗ്യവിദഗ്ദ്ധർ മുന്നറിയിപ്പ് നൽകുന്നു.
“ശരീരത്തിന് കുറഞ്ഞ ഉറക്കം കൊണ്ട് നിലനിൽക്കാൻ സാധിച്ചേക്കാം, എന്നാൽ മികച്ച രീതിയിൽ പ്രവർത്തിക്കാൻ അതിന് കഴിയില്ല. 8 മണിക്കൂർ നല്ല രീതിയിൽ ഉറങ്ങുക എന്നത് മടിയുടെ ലക്ഷണമല്ല, മറിച്ച് ശരീരത്തിന്റെ അടിസ്ഥാനപരമായ ആരോഗ്യ പരിപാലനമാണ്,” എന്ന് ലൊഞ്ചെവിറ്റി സ്ലീപ്പ് വിദഗ്ദ്ധയായ ഡോ. ദീപിക കൃഷ്ണ വ്യക്തമാക്കുന്നു.
സ്ഥിരമായി 6 മണിക്കൂറോ അതിൽ കുറവോ മാത്രം ഉറങ്ങുമ്പോൾ ഒരു സ്ത്രീയുടെ ശരീരത്തിൽ എന്തൊക്കെ മാറ്റങ്ങളാണ് സംഭവിക്കുന്നത് എന്ന് നോക്കാം
1. ഹോർമോൺ അസന്തുലിതാവസ്ഥയും സമ്മർദ്ദവും
സ്ഥിരമായി ഉറക്കം കുറയുന്നത് ശരീരത്തിലെ ഹോർമോൺ സന്തുലിതാവസ്ഥയെ തെറ്റിക്കും. ഇത് ‘കോർട്ടിസോൾ’ എന്ന സ്ട്രെസ് ഹോർമോണിന്റെ അളവ് കൂട്ടാൻ കാരണമാകുന്നു. കോർട്ടിസോൾ കൂടുന്നത് ശരീരത്തിലെ രക്തത്തിലെ പഞ്ചസാരയുടെ അളവ് നിയന്ത്രിക്കുന്നതും വിശപ്പ് നിയന്ത്രിക്കുന്നതും ബുദ്ധിമുട്ടിലാക്കും.
2. അമിതഭാരവും പി.സി.ഒ.എസ് പ്രശ്നങ്ങളും
ഉറക്കം കുറയുമ്പോൾ വിശപ്പ് നിയന്ത്രിക്കുന്ന ഹോർമോണുകളിൽ വ്യതിയാനമുണ്ടാകുകയും കൂടുതൽ വിശപ്പ് അനുഭവപ്പെടുകയും ചെയ്യും. ഇത് ശരീരഭാരം കൂടാനും അമിതവണ്ണത്തിനും കാരണമാകാം. കൂടാതെ, സ്ത്രീകളുടെ പ്രത്യുത്പാദന ഹോർമോണുകളെയും ആർത്തവ ചക്രത്തെയും ഇത് ബാധിക്കുന്നു. പോളിസിസ്റ്റിക് ഓവറി സിൻഡ്രോം പോലുള്ള അവസ്ഥകൾ കൂടുതൽ വഷളാകാൻ ഉറക്കക്കുറവ് ഒരു പ്രധാന കാരണമാണ്.
3. മാനസികാരോഗ്യവും ഏകാഗ്രതക്കുറവും
സ്ഥിരമായ ഉറക്കക്കുറവ് ഉത്കണ്ഠ , വിഷാദം എന്നിവയിലേക്ക് നയിച്ചേക്കാം. പകൽ സമയങ്ങളിൽ ഊർജ്ജമില്ലായ്മ, ദേഷ്യം, കാര്യങ്ങളിൽ ശ്രദ്ധ കേന്ദ്രീകരിക്കാനുള്ള ബുദ്ധിമുട്ട് , മൂഡ് മാറ്റങ്ങൾ എന്നിവ ഇതിന്റെ ഫലമായി ഉണ്ടാകുന്നു.
4. വിട്ടുമാറാത്ത രോഗങ്ങളുടെ സാധ്യത
തുടർച്ചയായി 6 മണിക്കൂറോ അതിൽ കുറവോ മാത്രം ഉറങ്ങുന്ന സ്ത്രീകളിൽ ടൈപ്പ്-2 പ്രമേഹം, ഹൃദയസംബന്ധമായ രോഗങ്ങൾ, ഉയർന്ന രക്തസമ്മർദ്ദം എന്നിവയ്ക്കുള്ള സാധ്യത വളരെ കൂടുതലാണെന്ന് മെഡ് ഫസ്റ്റ് ഇ.എൻ.ടി സെന്ററിലെ കൺസൾട്ടന്റായ ഡോ. രാജേഷ് ഭരദ്വാജ് വ്യക്തമാക്കുന്നു. ഇത് ശരീരത്തിന്റെ മെറ്റബോളിസത്തെയും പ്രതിരോധശേഷിയെയും ദോഷകരമായി ബാധിക്കും.
ചില സാഹചര്യങ്ങളിൽ 8 മണിക്കൂർ തികച്ചുറങ്ങാൻ പറ്റിയില്ലെങ്കിലും, ഉറങ്ങുന്ന സമയത്തിന്റെ ഗുണനിലവാരം വർദ്ധിപ്പിക്കാൻ ശ്രദ്ധിക്കണം. അതിനായി ചെയ്യേണ്ട കാര്യങ്ങൾ
കൃത്യമായ സമയം പാലിക്കുക: ദിവസവും ഒരേ സമയത്ത് ഉറങ്ങാനും ഉണരാനും ശ്രമിക്കുക.
സ്ക്രീൻ ടൈം കുറയ്ക്കുക: ഉറങ്ങുന്നതിന് ഒരു മണിക്കൂർ മുമ്പെങ്കിലും മൊബൈൽ ഫോൺ, ടിവി, ലാപ്ടോപ്പ് എന്നിവയുടെ ഉപയോഗം പൂർണ്ണമായി ഒഴിവാക്കുക.
ഭക്ഷണക്രമം: ഉറങ്ങുന്നതിന് തൊട്ടുമുമ്പ് കഫീൻ അടങ്ങിയ പാനീയങ്ങളോ (ചായ, കാപ്പി), കനത്ത ആഹാരങ്ങളോ കഴിക്കരുത്.
അന്തരീക്ഷം: കിടപ്പുമുറി ഇരുണ്ടതും, ശാന്തവും, അമിത ചൂടില്ലാത്തതുമായി സൂക്ഷിക്കുക.
പകൽ സമയത്തെ ചെറിയ ഉറക്കം: പകൽ സമയത്ത് 20 മുതൽ 30 മിനിറ്റ് വരെയുള്ള ചെറിയ ഉറക്കം ക്ഷീണം കുറയ്ക്കാൻ സഹായിക്കും. എന്നാൽ ഇത് രാത്രിയിലെ ഉറക്കത്തിന് പകരമാകില്ല.
നല്ല ഉറക്കം എന്നത് ആഡംബരമല്ല, മറിച്ച് ആരോഗ്യത്തോടെ ജീവിക്കാനുള്ള സ്ത്രീകളുടെ അവശ്യ ആവശ്യമാണ്!
