കൈകാലുകൾ തീരെ മെലിഞ്ഞ്, എന്നാൽ വയർ മാത്രം മുന്നോട്ട് ഉന്തിനിൽക്കുന്ന ശരീരപ്രകൃതിയുള്ളവരെ നാം നിത്യേന കാണാറുണ്ട്. ‘അല്പം കുടവയറൊക്കെ ആണുങ്ങൾക്ക് ഒരു അന്തസ്സല്ലേ’ എന്നോ, ‘വയറ് കുറച്ച് കൂടിയതുകൊണ്ട് എന്ത് കുഴപ്പം’ എന്നോ ചിന്തിച്ച് അതിനെ നിസ്സാരമായി തള്ളിക്കളയുന്നവരാണ് ഭൂരിഭാഗവും. എന്നാൽ കണ്ണാടിയിൽ കാണുന്ന ഈ കുടവയർ വെറുമൊരു സൗന്ദര്യപ്രശ്നമോ ശരീരവടിവിന്റെ കുറവോ മാത്രമല്ല; ശരീരത്തിനകത്ത് നിശബ്ദമായി പുകയുന്ന വലിയൊരു ആരോഗ്യപ്രതിസന്ധിയുടെ മുന്നറിയിപ്പാണ്. വസ്ത്രത്തിന് മുകളിലൂടെ കാണുന്ന ആ കൊഴുപ്പ് വെറുതെ അവിടെ കിടക്കുകയല്ല, മറിച്ച് ദിവസവും വിഷവസ്തുക്കളെ ഉത്പാദിപ്പിക്കുന്ന ഒരു ഫാക്ടറിയായി ശരീരത്തിനുള്ളിൽ പ്രവർത്തിച്ചുകൊണ്ടിരിക്കുകയാണ്.
ശരീരത്തിലെ കൊഴുപ്പ് പ്രധാനമായും രണ്ടുതരത്തിലാണ് കാണപ്പെടുന്നത്. തൊലിപ്പുറത്തിന് തൊട്ടുതാഴെ അടിഞ്ഞുകൂടുന്ന subcutaneous കൊഴുപ്പും, ആന്തരികാവയവങ്ങളായ കരൾ, കുടൽ, പാൻക്രിയാസ് എന്നിവയെ വരിഞ്ഞുമുറുക്കി കിടക്കുന്ന visceral കൊഴുപ്പും. ഇതിൽ വയറിനുള്ളിൽ ഒളിച്ചിരിക്കുന്ന രണ്ടാമത്തെ കൊഴുപ്പാണ് യഥാർത്ഥ വില്ലൻ. വെറുമൊരു കൊഴുപ്പ് ശേഖരമെന്നതിനപ്പുറം ഇതൊരു സജീവ കോശസമൂഹമാണ് (active tissue). നിരന്തരം ഇൻഫ്ലമേറ്ററി കെമിക്കലുകളും ഹോർമോണുകളും ഫാറ്റി ആസിഡുകളും രക്തത്തിലേക്ക് ഒഴുക്കിവിടുന്ന ഇവ ശരീരത്തിൽ ക്രോണിക് ഇൻഫ്ലമേഷൻ അഥവാ നീർക്കെട്ടുണ്ടാക്കുന്നു. ശരീരം കൃത്യമായി ഉത്പാദിപ്പിക്കുന്ന ഇൻസുലിനെ കോശങ്ങൾ തിരിച്ചറിയാതെ പോകുന്ന അവസ്ഥയിലേക്കാണ് (insulin resistance) ഇത് നയിക്കുന്നത്. രക്തത്തിലെ ഗ്ലൂക്കോസ് കോശങ്ങളിലേക്ക് കടക്കാതെ വരികയും, പ്രീഡയബറ്റിസിലൂടെ വളരെ വേഗത്തിൽ അത് ടൈപ്പ്-2 പ്രമേഹമായി മാറുകയും ചെയ്യുന്നു.
പ്രമേഹം മാത്രമല്ല, ഒട്ടും മദ്യപിക്കാത്തവരിൽപ്പോലും ഇന്ന് വ്യാപകമായി കാണുന്ന ഫാറ്റി ലിവർ രോഗത്തിന് പിന്നിലെ പ്രധാന കാരണവും വയറിനകത്തെ ഈ കൊഴുപ്പാണ്. വിസറൽ ഫാറ്റിൽ നിന്ന് നേരിട്ട് കരളിലേക്ക് എത്തുന്ന ഫാറ്റി ആസിഡുകൾ കരളിൽ അടിഞ്ഞുകൂടി ക്രമേണ ലിവർ സിറോസിസിലേക്ക് വരെ നയിച്ചേക്കാം. ഒപ്പം, രക്തത്തിലെ നല്ല കൊളസ്ട്രോളായ എച്ച്.ഡി.എൽ (HDL) കുറയ്ക്കാനും, ട്രൈഗ്ലിസറൈഡുകളും രക്തസമ്മർദ്ദവും കുത്തനെ ഉയർത്താനും ഇത് ഇടയാക്കുന്നു. ഇതിന്റെയെല്ലാം ഒടുക്കം ഹൃദയാഘാതവും പക്ഷാഘാതവുമായിരിക്കും. വലിയ വയറും ഉയർന്ന ബി.പിയും രക്തത്തിലെ പഞ്ചസാരയും കൊളസ്ട്രോളും ഒന്നിച്ചുവരുന്ന ഈ അവസ്ഥയെ മെഡിക്കൽ ലോകം ‘മെറ്റബോളിക് സിൻഡ്രോം’ എന്നാണ് വിളിക്കുന്നത്.
രാത്രിയിലെ കനത്ത കൂർക്കംവലിയും ഉറക്കത്തിനിടയിലെ ശ്വാസംമുട്ടലും കാരണം പകൽ മുഴുവൻ അനുഭവപ്പെടുന്ന ക്ഷീണവും ഉറക്കത്തൂക്കവും വെറും ഉറക്കക്കുറവല്ല, വയറിലെ കൊഴുപ്പുമൂലം ഉണ്ടാകുന്ന ഒബ്സ്ട്രക്ടീവ് സ്ലീപ് അപ്നിയ (Sleep Apnea) എന്ന അവസ്ഥയുടെ ലക്ഷണമാകാം. സ്ത്രീകളിലാകട്ടെ, ക്രമം തെറ്റിയ ആർത്തവത്തിനും മുഖക്കുരുവിനും അമിത രോമവളർച്ചയ്ക്കും കാരണമാകുന്ന പോളിസിസ്റ്റിക് ഒവേറിയൻ സിൻഡ്രോമുമായും (PCOS) ഈ വിസറൽ ഫാറ്റിന് നേരിട്ട് ബന്ധമുണ്ട്.
ശരീരഭാരം നോക്കുന്ന തുലാസിലെ അക്കങ്ങൾ കൃത്യമായിരുന്നാലും നിങ്ങളുടെ വയറ്റിൽ വിസറൽ ഫാറ്റ് ഒളിച്ചിരിപ്പുണ്ടാകാം. അതുകൊണ്ട് ഭാരം മാത്രം നോക്കാതെ ഒരളവുനാടയെടുത്ത് അരക്കെട്ടിന്റെ ചുറ്റളവ് കൃത്യമായി പരിശോധിക്കുകയാണ് വേണ്ടത്. ദക്ഷിണേഷ്യൻ ജനവിഭാഗങ്ങളിൽ പുരുഷന്മാരുടെ അരക്കെട്ടളവ് 90 സെന്റീമീറ്ററിലും സ്ത്രീകളിൽ 80 സെന്റീമീറ്ററിലും കൂടുന്നത് അപകടകരമായ മെറ്റാബോളിക് റിസ്കിന്റെ ലക്ഷണമാണ്. ദിവസവും കുറെ സിറ്റ്-അപ്പുകൾ എടുത്തതുകൊണ്ട് മാത്രം അടിവയറ്റിലെ കൊഴുപ്പ് അലിഞ്ഞുപോകില്ല. കൃത്യമായ ഭക്ഷണനിയന്ത്രണം, പ്രോട്ടീനും നാരുകളും അടങ്ങിയ ആഹാരങ്ങൾ, മധുരപാനീയങ്ങളുടെ പൂർണ്ണമായ ഒഴിവാക്കൽ, ഒപ്പം നടത്തവും സ്ട്രെങ്ത് ട്രെയിനിംഗും നല്ല ഉറക്കവും ചേർന്ന ജീവിതശൈലിയിലൂടെ മാത്രമേ ഈ ഉള്ളിലെ കൊഴുപ്പിനെ തുരത്താൻ കഴിയൂ. ശരീരഭാരത്തിന്റെ വെറും അഞ്ചോ പത്തോ ശതമാനം കുറയ്ക്കുന്നത് പോലും വലിയൊരു മാറ്റം കൊണ്ടുവരും. കൈകാലുകൾ മെലിഞ്ഞതുകൊണ്ട് എനിക്ക് കുഴപ്പമില്ലെന്ന് സമാധാനിക്കാതെ, മുന്നോട്ട് തള്ളുന്ന ആ വയറിന് പിന്നിലെ അപകടം തിരിച്ചറിഞ്ഞ് സമയോചിതമായി രക്തപരിശോധനകൾ നടത്താനും വൈദ്യസഹായം തേടാനും മടിക്കരുത്.
