ഓസ്‌ട്രേലിയയ്‌ക്കെതിരായ രണ്ടാം ടെസ്റ്റിൽ ദക്ഷിണാഫ്രിക്ക ചരിത്രവിജയം സ്വന്തമാക്കിയിരുന്നു. ഗെബർഹയിലെ സെന്റ് ജോർജ്ജ് പാർക്കിൽ നടന്ന മത്സരത്തിൽ ഇന്നിംഗ്സിനും 31 റൺസിനുമാണ് ദക്ഷിണാഫ്രിക്ക വിജയിച്ചു കയറിയത്. ആദ്യ ഇന്നിംഗ്സിൽ 425 റൺസ് നേടി ഇന്നിംഗ്സ് ഡിക്ലെയർ ചെയ്ത ദക്ഷിണാഫ്രിക്ക, ഓസ്‌ട്രേലിയയെ വെറും 99 റൺസിന് പുറത്താക്കി ഫോളോ ഓൺ ചെയ്യിക്കുകയായിരുന്നു.
തുടർന്ന് രണ്ടാം ഇന്നിംഗ്സിൽ തിരികെ വരാൻ ശ്രമിച്ച ഓസ്‌ട്രേലിയയെ 295 റൺസിന് എറിഞ്ഞൊതുക്കിയാണ് പ്രോട്ടീസ് ജയം തൊട്ടത്. ഈ വിജയത്തോടെ രണ്ട് മത്സരങ്ങളുള്ള ടെസ്റ്റ് പരമ്പര 1-1 ന് സമനിലയിലാക്കാൻ ദക്ഷിണാഫ്രിക്കയ്ക്ക് സാധിച്ചു. 179 റൺസിന്റെ തകർപ്പൻ ഇന്നിംഗ്സ് പുറത്തെടുത്ത നായകൻ ടെംബ ബവുമയാണ് കളിയിലെ താരം.
ബാറ്റിംഗിലെ മികവിന് പുറമേ, മത്സരത്തിനിടയിൽ ബവൂമയുടെ രസകരമായ ഒരു പ്രതികരണവും ക്രിക്കറ്റ് ആരാധകർക്കിടയിൽ തരംഗമായി മാറി. ഓസ്‌ട്രേലിയയുടെ രണ്ടാം ഇന്നിംഗ്സിലെ 83-ാം ഓവറിൽ സ്റ്റീവ് സ്മിത്തിന്റെ വിക്കറ്റ് വീഴുന്ന സമയത്തായിരുന്നു സംഭവം. കാഗിസോ റബാഡയുടെ പന്തിൽ വലിയ ഷോട്ടിന് ശ്രമിച്ച സ്മിത്തിന് പിഴയ്ക്കുകയും പന്ത് ഉയർന്നുപൊങ്ങുകയും ചെയ്തു.
മിഡ്‌വിക്കറ്റിൽ നിൽക്കുകയായിരുന്ന മാത്യു ബ്രീറ്റ്‌സ്‌കെ പന്ത് കൈപ്പിടിയിലൊതുക്കിയെങ്കിലും പന്ത് ഉയർന്നു നിൽക്കുന്ന സമയത്ത് പേടിയോടെ ഗാലറിയിലേക്ക് തിരിഞ്ഞുനിൽക്കുകയായിരുന്നു ക്യാപ്റ്റൻ ടെംബ ബവുമ. ഈ വിക്കറ്റ് ദക്ഷിണാഫ്രിക്കയെ സംബന്ധിച്ച് വളരെ നിർണ്ണായകമായിരുന്നെന്നും, ശക്തമായ കാറ്റുള്ളതിനാൽ ക്യാച്ച് കൈവിടുമോ എന്ന ഭയത്താലാണ് താൻ തിരിഞ്ഞുനിന്നതെന്നും മത്സരശേഷം ടെംബ ബവുമ തമാശയോടെ വ്യക്തമാക്കി.
