യുവതാരം വൈഭവ് സൂര്യവംശിയെ ടീമിന്റെ പ്ലേയിംഗ് ഇലവനിൽ ഉൾപ്പെടുത്തണമെന്ന രീതിയിൽ സോഷ്യൽ മീഡിയയിൽ ഉയരുന്ന അമിതമായ സമ്മർദ്ദങ്ങൾ കളിക്കാരന്റെ വളർച്ചയെ പ്രതികൂലമായി ബാധിക്കുമെന്ന് ഇന്ത്യൻ ബാറ്റിംഗ് കോച്ച് സിതാംശു കോട്ടക് വ്യക്തമാക്കി. ന്യൂസിലൻഡിനെതിരായ രണ്ടാം ട്വന്റി20 മത്സരത്തിന് മുന്നോടിയായി മാധ്യമങ്ങളോട് സംസാരിക്കവെയാണ് സോഷ്യൽ മീഡിയയിലെ ചർച്ചകളെയും ടീം സെലക്ഷനെയും കുറിച്ച് അദ്ദേഹം നിലപാട് വ്യക്തമാക്കിയത്. നിലവിലെ ഓപ്പണിംഗ് ജോഡികളായ സഞ്ജു സാംസണും അഭിഷേക് ശർമ്മയും മികച്ച പ്രകടനം പുറത്തെടുക്കുമ്പോൾ ഇത്തരം ആവശ്യങ്ങൾ ഉയർത്തുന്നത് നിലവിൽ തിളങ്ങുന്ന താരങ്ങളോട് ചെയ്യുന്ന അനീതിയാണെന്നും അദ്ദേഹം ചൂണ്ടിക്കാട്ടി.
ടീം മാനേജ്‌മെന്റിന്റെ തീരുമാനങ്ങൾ എപ്പോഴും ടീമിന്റെ നന്മയ്ക്ക് വേണ്ടിയുള്ളതാണെന്നും ആരാധകരുടെയും സോഷ്യൽ മീഡിയയുടെയും താത്പര്യപ്രകാരമല്ല പ്ലേയിംഗ് ഇലവനെ തിരഞ്ഞെടുക്കേണ്ടതെന്നും കോട്ടക് പറഞ്ഞു. വൈഭവ് സൂര്യവംശി അപാരമായ കഴിവുള്ള താരമാണെന്ന കാര്യത്തിൽ ആർക്കും തർക്കമില്ലെന്നും ഭാവിയിൽ മികച്ചൊരു കരിയർ അവനെ കാത്തിരിക്കുന്നുണ്ടെന്നും അദ്ദേഹം കൂട്ടിച്ചേർത്തു. എന്നാൽ വെറും 15-16 വയസ്സ് മാത്രം പ്രായമുള്ള ഒരു യുവതാരത്തിന് മേൽ തുടക്കത്തിലേ ഇത്തരത്തിലുള്ള അമിത പ്രതീക്ഷകളും ഹൈപ്പും നൽകുന്നത് അനാവശ്യ സമ്മർദ്ദം സൃഷ്ടിക്കും.
നിലവിൽ ടീമിന് പുറത്തിരിക്കേണ്ടി വരുന്നത് എന്തുകൊണ്ടാണെന്ന് വൈഭവ് കൃത്യമായി മനസ്സിലാക്കിയിട്ടുണ്ടെന്നും കോട്ടക് വെളിപ്പെടുത്തി. സഞ്ജുവും അഭിഷേകും ഓപ്പണിംഗിൽ മികച്ച ബാറ്റിംഗ് തുടരുമ്പോൾ തനിക്ക് ഇപ്പോൾ അവസരം ലഭിക്കില്ലെന്ന് തിരിച്ചറിയാനുള്ള പക്വത അവൻ കാണിക്കുന്നുണ്ട്. പരാതികളൊന്നുമില്ലാതെ ഫിറ്റ്‌നസ്, ഫീൽഡിംഗ്, ബാറ്റിംഗ് എന്നിവ മെച്ചപ്പെടുത്താനും മുതിർന്ന താരങ്ങളിൽ നിന്ന് കാര്യങ്ങൾ പഠിക്കാനും വൈഭവ് ഈ സമയം പരമാവധി പ്രയോജനപ്പെടുത്തുന്നുണ്ടെന്നും അദ്ദേഹം പറഞ്ഞു.
