ധാക്ക: ഇന്ത്യക്കാരിയടക്കം 22 പേര്‍ കൊല്ലപ്പെട്ട ധാക്ക ഭീകരാക്രമണവുമായി ബന്ധപ്പെട്ട് രണ്ടുപേര്‍ അറസ്റ്റില്‍. പൊലീസ് ഐ.ജി എ.കെ.എം ശാഹിദുല്‍ ഹഖാണ് ഇക്കാര്യം അറിയിച്ചത്. എന്നാല്‍, ഇവരെപ്പറ്റി കൂടുതല്‍ വിവരങ്ങള്‍ അദ്ദേഹം വെളിപ്പെടുത്താന്‍ തയ്യാറായില്ല. പിടിയിലായ രണ്ടുപേരും അവശനിലയിലാണെന്നും അവരുടെ നില മെച്ചപ്പെട്ടശേഷമേ ചോദ്യം ചെയ്യൂവെന്നും അദ്ദേഹം പറഞ്ഞു.
ഒരാള്‍ ആശുപത്രയിലും മറ്റൊരാള്‍ കസ്റ്റഡിയിലുമാണ്. സംഭവസ്ഥലത്തുനിന്ന് ഒരു തീവ്രവാദിയെ പിടികൂടിയതായി നേരത്തെ പ്രധാനമന്ത്രി ശൈഖ് ഹസീന അറിയിച്ചിരുന്നു. എന്നാല്‍, ഇതാരെന്ന് വെളിപ്പെടുത്തിയിട്ടില്ല. പിടിയിലായവര്‍ക്ക് അന്താരാഷ്ട്ര തീവ്രവാദസംഘടനകളുമായി ബന്ധമുണ്ടാകാന്‍ സാധ്യതയുണ്ടെന്ന് ശാഹിദുല്‍ ഹഖ് സൂചന നല്‍കി.
വെള്ളിയാഴ്ച രാത്രിയാണ് സുരക്ഷാമേഖലയായ ധാക്കയിലെ ഗുല്‍ഷനിലുള്ള ഹൊലെ ആര്‍ട്ടിസാന്‍ ബേക്കറിയില്‍ ഭീകരര്‍ അതിക്രമിച്ചു കയറി അവിടെയുണ്ടായിരുന്നവരെ ബന്ദിയാക്കുകയും തുടര്‍ന്ന് 20പേരെ കൊലപ്പെടുത്തുകയും ചെയ്തത്. ഭീകരരുമായുണ്ടായ ഏറ്റുമുട്ടലില്‍ രണ്ട് പൊലീസുകാരും മരിച്ചിരുന്നു.
ഈ സംഭവത്തിന്റെ ഉത്തരവാദിത്തം അമഖ് വെബ്‌സൈറ്റ് വഴി ഐ.എസ് ഏറ്റെടുത്തിരുന്നു. ഓണ്‍ലൈന്‍ തീവ്രവാദപ്രവര്‍ത്തനങ്ങള്‍ നിരീക്ഷിക്കുന്ന അമേരിക്കന്‍ സംഘടനയായ സൈറ്റ് ആണ് അമഖ് വെബ്‌സൈറ്റിലെ വിവരം ആദ്യം പുറത്തു വിട്ടത്. കറുത്ത പതാകക്കു മുന്നില്‍ പോസ് ചെയ്ത നാലു ചെറുപ്പക്കാരുടെ ചിത്രവും ‘സൈറ്റ്’ പ്രസിദ്ധീകരിച്ചു. സൈനിക ഓപ്പറേഷനില്‍ കൊലപ്പെടുത്തിയവരുടേതെന്ന പേരില്‍ പൊലീസ് പുറത്തുവിട്ട അഞ്ചു ഭീകരരുടെ ചിത്രങ്ങളില്‍ നാലുപേര്‍ക്ക് സൈറ്റില്‍ വന്ന ചിത്രങ്ങളുമായി സാമ്യമുണ്ടെന്ന് പറയുന്നു. ഈ നാലുപേരും സമ്പന്ന കുടുംബങ്ങളില്‍ ജനിച്ചവരും ധാക്കയിലും വിദേശത്തുമായി ഉന്നത വിദ്യാഭ്യാസം നേടിയവരുമാണന്ന് പൊലീസ് അറിയിച്ചു.
അഞ്ചാമത്തെയാള്‍ വടക്കുപടിഞ്ഞാറന്‍ ഗ്രാമമായ ബോഗ്ര സ്വദേശിയും ആക്രമണത്തിന് നേതൃത്വം നല്‍കിയയാളുമാണെന്ന് പൊലീസ് വെളിപ്പെടുത്തി. ഖൈറുള്‍ എന്ന് വിളിക്കുന്ന ഇയാളെ കഴിഞ്ഞ ഏഴുമാസമായി മറ്റ് മൂന്ന് തീവ്രവാദ ആക്രമണങ്ങളുമായി ബന്ധപ്പെട്ട് പൊലീസ് അന്വേഷിച്ചു വരികയായിരുന്നു. ഖൈറുളിന്റെ മാതാപിതാക്കളെ പോലീസ് നേരത്തെ ചോദ്യംചെയ്തിരുന്നുവെന്ന് ബംഗ്‌ളാദേശിലെ പ്രചാരമേറെയുള്ള ‘ പ്രൊഥോം അലോ’ പത്രം റിപ്പോര്‍ട്ട് ചെയ്തു.
കൊല്ലപ്പെട്ട തീവ്രവാദികളില്‍ ഒരാളായ രോഹന്‍ ഇംതിയാസ് ഭരണകക്ഷിയായ അവാമി ലീഗ് നേതാവിന്റെ മകനാണെന്നും സ്വകാര്യ സര്‍വ്വകലാശാലയായ ‘ബ്രാക്’ വിദ്യാര്‍ഥിയാണെന്നും തിരിച്ചറിഞ്ഞിട്ടുണ്ട്. ഇംതിയാസിന്റെ മാതാവ് ധാക്കയിലെ സമ്പന്നരുടെ മക്കള്‍ പഠിക്കുന്ന സ്‌കൊളാസ്റ്റിക സ്‌കൂള്‍ അധ്യാപികയുമാണ്.
ഡിസംബര്‍ മുതല്‍ ഇംതിയാസിനെ കാണാനില്ലെന്ന് കുടുംബം പൊലീസില്‍ പരാതി നല്‍കിയിരുന്നു. കൊല്ലപ്പെട്ട ഭീകരരില്‍ മറ്റൊരാള്‍ മലേഷ്യന്‍ സര്‍വ്വകലാശാല വിദ്യാര്‍ഥിയാണ്.
Discussion about this post