ഡല്‍ഹി: ജിയോയ്ക്ക് ഇന്റര്‍കണക്ഷന്‍ നിഷേധിച്ച എയര്‍ടെല്‍, വോഡാഫോണ്‍, ഐഡിയ കമ്പനികള്‍ക്ക് 3000 കോടിയിലധികം രൂപയുടെ പിഴ. ടെലികോം റെഗുലേറ്ററി അതോറിറ്റി ഓഫ് ഇന്ത്യ(TRAI) ആണ് പിഴ വിധിച്ചത്. ടെലികോം കമ്പനികളുടെ ഓരോ സര്‍ക്കിളുകളില്‍ നിന്നും 50 കോടി രൂപ വീതമാണ് പിഴ ഈടാക്കിയിരിക്കുന്നത്. മൊത്തം പിഴതുക 3,000 കോടി വരും. ജിയോയില്‍ നിന്നും മറ്റു നെറ്റ്‌വര്‍ക്കുകളിലേക്കും തിരിച്ചുമുള്ള ഫോണ്‍ കോളുകള്‍ കണക്ട് ചെയ്യാന്‍ ആവശ്യമായ ഇന്റര്‍കണക്ട് പോയിന്റുകള്‍ മറ്റു ടെലികോം കമ്പനികള്‍ നല്‍കുന്നില്ലെന്ന റിലയന്‍സ് ജിയോയുടെ പരാതിയുടെ അടിസ്ഥാനത്തിലാണ് നടപടി.
എയര്‍ടെല്‍, വോഡാഫോണ്‍, ഐഡിയ കമ്പനികള്‍ തങ്ങളുടെ നെറ്റ്‌വര്‍ക്കുമായി സഹകരിക്കുന്നില്ലെന്ന് കാട്ടി ജിയോ കഴിഞ്ഞ രണ്ട് മാസമായി പരാതിപ്പെടുകയാണ്. ഇക്കാര്യം ചൂണ്ടിക്കാട്ടി ട്രായ്ക്കും പ്രധാനമന്ത്രിയുടെ ഓഫീസിനും ടെലികോം മന്ത്രാലയത്തിനും ജിയോ പരാതി നല്‍കിയിരുന്നു. വേണ്ടത്ര ഇന്റര്‍കണക്ഷന്‍ പോയിന്റുകള്‍ നല്‍കാത്തതിനാല്‍ തങ്ങളുടെ നെറ്റ്‌വര്‍ക്കില്‍ പ്രതിദിനം 52 കോടി കോള്‍ ഡ്രോപ്പുകള്‍ വരെ ഉണ്ടാകുന്നുവെന്നായിരുന്നു ജിയോയുടെ പരാതി.
ആജീവനാന്ത സൗജന്യ കോളുകള്‍ നല്‍കുന്നത് ഉള്‍പ്പെടെയുള്ള ആകര്‍ഷക ഡേറ്റ ഓഫറുകള്‍ക്കെതിരെ എതിര്‍പ്പുമായി രംഗത്തെത്തിയ കമ്പനികളാണ് എയര്‍ടെല്ലും, വോഡാഫോണും ഐഡിയയും. ഇത് നിയമവിധേയമല്ലെന്ന ടെലികോം കമ്പനികളുടെ വാദം ട്രായ് കഴിഞ്ഞ ദിവസം തള്ളിയിരുന്നു. ട്രായ് പിഴയിട്ടതിനെ കുറിച്ച് ടെലികോം കമ്പനികള്‍ ഇതുവരെ പ്രതികരിച്ചിട്ടില്ല. ട്രായ്‌ക്കെതിരെ കമ്പനികള്‍ കോടതിയെ സമീപിച്ചേക്കുമെന്നാണ് ടെലികോം രംഗത്തെ വിദഗ്ധര്‍ പറയുന്നത്.
Discussion about this post