ചണ്ഡിഗഡ്: ക്രിക്കറ്റ് താരം യുവരാജ് സിങ് വിവാഹിതനായി. നടിയും മോഡലുമായ ഹസല്‍ കീച്ചാണ് വധു. അടുത്ത ബന്ധുക്കളും സുഹൃത്തുകളും പങ്കെടുത്ത വിവാഹം സിഖ് ആചാരപ്രകാരമാണ് നടത്തിയത്. ഛണ്ഡിഗഡിലെ ഗുരുദ്വാരയില്‍ വച്ചായിരുന്നു വിവാഹം. ഡിസംബര്‍ പന്ത്രണ്ടിന് ഗോവയില്‍ വച്ചു ഹിന്ദു ആചാരപ്രകാരവും വിവാഹം നടക്കുന്നുണ്ട്.
ബോളിവുഡ്, ക്രിക്കറ്റ് ലോകത്തെ പ്രമുഖരും രാഷ്ട്രീയ, സാംസ്‌കാരിക മേഖലയില്‍ നിന്നുള്ളവരും വിവാഹത്തിന് എത്തിയപ്പോള്‍ യുവരാജിന്റെ അച്ഛന്‍ യോഗ്‌രാജ് സിങ് ചടങ്ങില്‍ പങ്കെടുത്തില്ല. മതപുരോഹിതന്മാരുടെ നേതൃത്വത്തിലാണ് വിവാഹമെങ്കില്‍ താന്‍ പങ്കെടുക്കില്ലെന്ന് അദ്ദേഹം നേരത്തെ വ്യക്തമാക്കിയിരുന്നു.
എന്റെ മകന്റെ വിവാഹ ആഘോഷത്തില്‍ നിന്നു വിട്ടുനില്‍ക്കാനുള്ള തീരുമാനം നിര്‍ഭാഗ്യകരം തന്നെയാണ്. ഏതെങ്കിലും മതപരമായ ഗുരുക്കന്മാരുടെ സാന്നിധ്യത്തിലാണു വിവാഹം നടക്കുന്നതെങ്കില്‍ താന്‍ പങ്കെടുക്കില്ലെന്ന് യുവരാജിന്റെ അമ്മയെ അറിയിച്ചിട്ടുണ്ട്. അതാണു വിധി, ഞാന്‍ പോകില്ല. ഞാന്‍ ദൈവത്തില്‍ മാത്രമേ വിശ്വസിക്കുന്നുള്ളു അല്ലാതെ മതപുരോഹിതന്മാരില്‍ എനിക്കു വിശ്വസമില്ലെന്നും യോഗ്‌രാജ് സിങ് പറഞ്ഞു.
കടുത്ത ചുവപ്പ് നിറത്തിലുള്ള വസ്ത്രമാണ് ഇരുവരും തിരഞ്ഞെടുത്തത്. രാജകീയമായ പ്രൗഡീയോടെ പരമ്പരാഗത ശൈലിയില്‍ നിന്നും വ്യത്യസ്തമായ രീതിയിലായിരുന്നു വധുവിന്റെ വേഷം. അതിനു ചേരുന്ന തരത്തില്‍ ഷെര്‍വാണി അണിഞ്ഞാണ് യുവി എത്തിയത്.
Discussion about this post