ന്യൂഡൽഹി : ലോകത്തെ ഏറ്റവും മികച്ച മൂന്ന് ഫീൽഡർമാർ ആരെന്ന ചോദ്യത്തിന് ഫീൽഡിംഗ് ഇതിഹാസം ജോണ്ടി റോഡ്സ് പറഞ്ഞ ഉത്തരം ശ്രദ്ധേയമാകുന്നു. ഒരു ദേശീയ മാദ്ധ്യമത്തിന് അനുവദിച്ച അഭിമുഖത്തിലാണ് റോഡ്സ് അഭിപ്രായം പങ്കുവെച്ചത്. 2023 ഇന്ത്യൻ പ്രിമിയർ ലീഗ് ആരംഭിക്കാനിരിക്കേയാണ് ജോണ്ടി റോഡ്സിന്റെ പരാമർശം.
നിലവിൽ ലോകത്തെ എറ്റവും മികച്ച ഫീൽഡർ ഇന്ത്യൻ ടീമിലാണുള്ളത്. ബാറ്റിംഗും ബൗളിംഗും ഒപ്പം ഫീൽഡിംഗും കൊണ്ട് ടീമിന് നിർണായക വിജയങ്ങൾ നേടിക്കൊടുത്തിട്ടുള്ള രവീന്ദ്ര ജഡേജയുടെ പേരാണ് ലഖ്നൗ സൂപ്പർ ജയന്റ്സിന്റെ ഫീൽഡിംഗ് കോച്ചായ ജോണ്ടി റോഡ്സ് പറഞ്ഞത്. ഫീൽഡിംഗ് മികച്ചതാകണമെങ്കിൽ സ്വയം അത് ആസ്വദിക്കണമെന്നും റോഡ്സ് സൂചിപ്പിച്ചു.
വശങ്ങളിലേക്കും മുന്നോട്ടും പെട്ടെന്ന് നീങ്ങാനുള്ള കഴിവാണ് പ്രധാനം. പന്ത് ബാറ്റിലേക്ക് വരുന്നത് മാത്രം നോക്കിയാൽ പോരാ ബാറ്ററുടെ ചലനങ്ങളും ശ്രദ്ധിക്കണം. എങ്കിൽ മാത്രമേ നല്ല ഫീൽഡറാകാൻ കഴിയൂ. ഐപിഎൽ ആരംഭിച്ചതിനു ശേഷം ഫീൽഡിംഗിൽ വളരെ വലിയ പുരോഗതിയാണുണ്ടായതെന്നും റോഡ്സ് വ്യക്തമാക്കി.
മാർച്ച് 31 ന് ആരംഭിക്കുന്ന ഐപിഎൽ 2023 ൽ പത്ത് ടീമുകളാണ് പങ്കെടുക്കുന്നത്. ചെന്നൈ സൂപ്പർ കിംഗ്സും ഗുജറാത്ത് ടൈറ്റാൻസും തമ്മിലാണ് ആദ്യ മത്സരം. പഞ്ചാബ് കിംഗ്സ്, കൊൽക്കത്ത നൈറ്റ് റൈഡേഴ്സ്, ലഖ്നൗ സൂപ്പർ ജയന്റ്സ്, ഡെൽഹി ക്യാപിറ്റൽസ്, സൺറൈസേഴ്സ് ഹൈദരാബാദ് , രാജസ്ഥാൻ റോയൽസ്, റോയൽ ചലഞ്ചേഴ്സ് ബാംഗളൂർ, മുംബൈ ഇന്ത്യൻസ് എന്നിവയാണ് മറ്റ് ടീമുകൾ.
