തിരുവനന്തപുരം: ജിഎസ്ടിയുടെ പേരില് ഹോട്ടല് ഭക്ഷണത്തിന് അമിതവില ഈടാക്കി എന്ന് ആരോപിച്ച് തിരുവനന്തപുരം സ്റ്റാച്യു ജംഗ്ഷനിലെ തക്കാരം ഹോട്ടലിനെതിരെ കണ്ടോണ്മെന്റ് സ്റ്റേഷനില് പരാതി. ജിഎസ്ടി നടപ്പിലാക്കിയതിന് ശേഷം പൊലീസില് പരാതി ലഭിക്കുന്ന കേരളത്തിലെ ആദ്യ കേസ് എന്ന പ്രത്യേകതയും ഇതിനുണ്ട്. ഇന്നലെയാണ് സംഭവം.
സൂരജ് എന്ന യുവാവും അഞ്ച് സുഹൃത്തുക്കളും ചേര്ന്ന് ഉച്ച ഭക്ഷണം കഴിക്കാന് എത്തിയതാണ് തിരുവനന്തപുരത്തെ തക്കാരം ഹോട്ടലില്. നേരത്തെ മോശം ഭക്ഷണം വിളമ്പിയതിന് നടപടി നേരിട്ട ഹോട്ടലാണ് ഇത്. കോര്പ്പറേഷന് നടപടി എടുത്ത ഹോട്ടല്. ഈ സ്ഥാപനമാണ് ജിഎസ് ടി വിവാദത്തിലും പെടുന്നത്. ഭക്ഷണം കഴിച്ച് ബില്ല് കൊടുക്കാന് എത്തിയപ്പോള് ജിഎസ്ടിയായി 12% നികുതി കൂട്ടിചേര്ത്ത് 84 രൂപ അധികം അടക്കണമെന്ന് ക്യാഷര് ആവശ്യപ്പെട്ടു. ജിഎസ്ടി വന്നതോടെ ഹോട്ടല് നികുതി കൂടി എന്നതാണ് കടക്കാരന്റെ വാദം.
എന്നാല് ഇന്നലെ വരെ അടച്ച തുകയേ തരാന് കഴിയു എന്ന് സൂരജും കൂട്ടുകാരും വാശി പിടിച്ചതോടെ വാക്കേറ്റമായി. ഒടുവില് ബില് തുകയും ജിഎസ്ടിയും കൂട്ടിചേര്ത്ത് മുഴുവന് തുകയും അടച്ച ശേഷം സൂരജും സംഘവും പരാതിയുമായി കണ്ടോണ്മെന്റ് പൊലീസ് സ്റ്റേഷനിലെത്തി. കേസ് ഒതുക്കാനായിരുന്നു ശ്രമം. എന്നാല് പരാതിക്കാര് വഴങ്ങിയില്ല. ഇതോടെ കേസെടുക്കേണ്ട സാഹചര്യം ഉണ്ടായി. അപ്പോഴും ജിഎസ്ടിയെ കുറിച്ച് പൊലീസുകാര്ക്കും നിശ്ചയമില്ലെന്ന് വ്യക്തമായി.
നികുതി വരുമാനത്തിന്റെ സ്ളാബ് നിരക്കുകളെ പറ്റി സാമ്പത്തിക വിദഗ്ദര്ക്ക് പോലും കാര്യമായ അറിവില്ലെന്ന് ഇരിക്കെ ലഭിച്ച പരാതിയില് എന്ത് നടപടി എടുക്കണമെന്ന് പൊലീസിനും അറിയില്ല. ജിഎസ്ടി രജിസ്ട്രേഷന് തങ്ങള്ക്കുണ്ടെന്നും, നികുതി നിശ്ചയിക്കാന് അതുകൊണ്ട് തന്നെ തങ്ങള്ക്ക് അധികാരം ഉണ്ടെന്നുമാണ് സ്റ്റ്റ്റാച്യുവിലെ തക്കാരം ഹോട്ടല് അധികാരികള് നല്കുന്ന വിശദീകരണം. എന്നാല് നേരത്തെയും നികുതി ഈടാക്കിയിരുന്നു. ഇത് കുറച്ച് പുതിയത് കൂട്ടുകായണ് വേണ്ടത്. എന്നാല് പഴയ നികുതി ഉള്പ്പെടെയുള്ള തുകയില് നിന്ന് ജിഎസ്ടി ഈടാക്കുന്നു. ഇതിലൂടെ ഹോട്ടലുകള്ക്ക് കൊള്ളലാഭം ഉണ്ടാവുകയാണ്.
ഇരുപത് ലക്ഷത്തില് താഴെ വിറ്റ് വരവ് ഉള്ള തലസ്ഥാനത്തെ ചില നോണ് എസി റസ്റ്റോറന്റുകള് നികുതിയായി 18% വരെ വാങ്ങുന്നു എന്ന പരാതി ഇതിനോടകം ഉയര്ന്നിട്ടുണ്ട്. ഹോട്ടല് അധികാരികളുമായി നികുതി പ്രശ്നത്തില് സര്ക്കാര് ധാരണ ഉണ്ടായില്ലെങ്കില് വരും ദിവസങ്ങളില് കൂടുതല് പരാതികള് പൊലീസ് സ്റ്റേഷനിലെത്തും. ഹോട്ടലുകളുടെ കള്ളക്കളികള്ക്കെതിരെ സോഷ്യല് മീഡിയയിലും വ്യാപക പരാതിയുണ്ട്. ഈ സാഹചര്യത്തില് കൂടുതല് ഇടപെടല് ഉറപ്പാണ്.
Discussion about this post