ചെന്നൈ: മെഡിക്കല് പ്രവേശനം ലഭിക്കാത്തതിനെ തുടര്ന്ന് ജീവനൊടുക്കിയ അനിതയുടെ കുടുംബത്തിലെത്തി നടന് വിജയ് അനുശോചനമറിയിച്ചു. അനിതയുടെ അച്ഛനുമായി സംസാരിച്ച വിജയ് അദ്ദേഹത്തെ ആശ്വസിപ്പിക്കുകയും ചെയ്തു.
സാമ്പത്തികമോ, അല്ലാതെയോ ഉള്ള എന്തു സഹായവും തന്റെ ഭാഗത്തു നിന്നും ഉണ്ടാകുമെന്നും വിജയ് അനിതയുടെ കുടുംബത്തിന് ഉറപ്പു നല്കി.
അതേസമയം അനിതയുടെ അച്ഛനൊപ്പം തറയിലിരുന്ന് സംസാരിക്കുന്ന വിജയിന്റെ ചിത്രം സോഷ്യല് മീഡിയയിലും വൈറലായിട്ടുണ്ട്. നേരത്തെ അനിതയുടെ മരണത്തില് അനുശോചിച്ചും, നീറ്റിനെ എതിര്ത്തും സിനിമാരംഗത്തെ ഒട്ടുമിക്ക പ്രമുഖരും രംഗത്തു വന്നിരുന്നു. രജനീകാന്ത്, കമല്ഹാസന്, സൂര്യ, വിശാല്, ധനുഷ് എന്നിവരെല്ലാം അനിതയുടെ മരണത്തില് ദുഃഖം രേഖപ്പെടുത്തി. എന്നാല് അപ്പോഴെല്ലാം വിജയ് മൗനം അവലംബിക്കുകയായിരുന്നു. വിജയിനെ കൂടാതെ, നടനും സംഗീത സംവിധായകനുമായ ജി വി പ്രകാശ് കുമാറും അനിതയുടെ വീട്ടിലെത്തി ദുഃഖം അറിയിച്ചു.
ഇത്തവണത്തെ മെഡിക്കല് പ്രവേശനം ലഭിക്കാതെ വന്നതിനെ തുടര്ന്നാണ് അനിത ആത്മഹത്യ ചെയ്തത്. മെഡിക്കല് പ്രവേശനത്തിന് ദേശീയ തലത്തില് നടത്തുന്ന പൊതുപരീക്ഷയായ നീറ്റിനെതിരെ നിയമപോരാട്ടം നടത്തിയത് ഈ 17 വയസുകാരിയായ ദലിത് വിദ്യാര്ത്ഥിനിയായിരുന്നു. എന്നാല് നീറ്റ് പരീക്ഷയില് മികച്ച സ്കോര് നേടാന് കഴിയാത്തതിനെ തുടര്ന്ന് അനിതയ്ക്ക് മെഡിക്കല് പ്രവേശനം നഷ്ടമാകുകയായിരുന്നു.
പ്ലസ് ടു മാര്ക്കിന്റെ അടിസ്ഥാനത്തിലാണ് തമിഴ്നാട്ടിലെ മെഡിക്കല് പ്രവേശനം. തമിഴ്നാട് അരിയല്ലൂര് സ്വദേശിയായ അനിത പ്ലസ്ടുവിന് 1200 ല് 1176 മാര്ക്ക് ലഭിച്ചിരുന്നു. എന്നാല് ദേശീയ പൊതുപ്രവേശന പരീക്ഷ വന്നതോടെ ഇതിനെതിരേ അനിത നിയമപോരാട്ടം തുടങ്ങുകയായിരുന്നു. തമിഴ്നാടിനെ നീറ്റില് നിന്ന് ഒഴിവാക്കണമെന്നായിരുന്നു അനിതയുടെ ആവശ്യം.
അനിത ഉള്പ്പെടെയുള്ള ഏതാനും വിദ്യാര്ത്ഥിനികള് നല്കിയ ഹര്ജിയില് മദ്രാസ് ഹൈക്കോടതി ഇവര്ക്ക് അനുകൂലമായി ഇടക്കാല വിധി പുറപ്പെടുവിച്ചെങ്കിലും സുപ്രിംകോടതി ഇത് റദ്ദ് ചെയ്യുകയും തമിഴ്നാടിനെ പൊതുപ്രവേശന പരീക്ഷയില് നിന്ന് ഒഴിവാക്കാന് ആകില്ലെന്ന് ഉത്തരവിടുകയുമായിരുന്നു. നീറ്റ് സ്കോര് പരിഗണിച്ചു മാത്രമേ മെഡിക്കല് പ്രവേശനം നടത്താവൂ എന്നും തമിഴ്നാടിന് മാത്രമായി ഇളവ് അനുവദിക്കാനാകില്ലെന്നുമായിരുന്നു സുപ്രിംകോടതിയുടെ വിധി.
ഇതേതുടര്ന്ന് അനിത നീറ്റ് പരീക്ഷ എഴുതിയെങ്കിലും റാങ്ക് പട്ടികയില് മുന്നിലെത്താന് കഴിഞ്ഞില്ല. 720 ല് 86 ആയിരുന്നു അനിതയ്ക്ക് ലഭിച്ച സ്കോര്. മെഡിക്കല് പ്രവേശനം ലഭിക്കാതെ വന്നതോടെ എയര്നോട്ടിക് എന്ജിനീയറിങ്ങ് പഠനത്തിനായി മദ്രാസ് ഇന്സ്റ്റിറ്റിയൂട്ട് ഓഫ് ടെക്നോളജിയില് പ്രവേശനം നേടിയെങ്കിലും മെഡിക്കല് പഠനമെന്ന സ്വപ്നം പൊലിഞ്ഞതിന്റെ മനോവിഷമത്തില് ജീവനൊടുക്കുകയായിരുന്നു.
நடிகர் தளபதி விஜய் அவர்கள் மாணவி அனிதாவின் பெற்றோர்களை நேரில் சந்தித்து ஆறுதல் கூறினார். #NeetAnitha @actorvijay pic.twitter.com/1rBPg6MQTk
— RIAZ K AHMED (@RIAZtheboss) September 11, 2017
Discussion about this post