സംസ്ഥാന ചലച്ചിത്ര ആവാര്‍ഡ് വിതരണ ചടങ്ങില്‍ നടന്‍ മോഹന്‍ലാല്‍ പ്രസംഗിച്ചു കൊണ്ടിരിക്കെ വിരല്‍ തോക്കാക്കി ചൂണ്ടിയ നടന്‍ അലന്‍സിയറോട് താരസംഘടനയായ അമ്മ വിശദീകരണം തേടി. വിഷയത്തില്‍ വിശദീകരണം ആവശ്യപ്പെട്ട് അമ്മ അലന്‍സിയര്‍ക്ക് കത്തയച്ചു.
കഴിഞ്ഞ ദിവസം തിരുവനന്തപുരം നിശാഗന്ധി ഓഡിറ്റോറിയത്തില്‍ നടന്ന സംസ്ഥാന ചലച്ചിത്ര ആവാര്‍ഡ് വിതരണ ചടങ്ങിലാണ് സംഭവങ്ങള്‍ അരങ്ങേറിയത്. മുഖ്യാതിഥിയായ മോഹന്‍ലാല്‍ പ്രസംഗിച്ചു കൊണ്ടിരിക്കെ ഇരിപ്പിടത്തില്‍ നിന്ന് എഴുന്നേറ്റ് വന്ന അലന്‍സിയര്‍ തോക്കുചൂണ്ടി വെടിവയ്ക്കുന്ന രീതിയില്‍ കൈകൊണ്ട് ആംഗ്യം കാണിച്ചു. വെടിയുതിര്‍ത്ത ശേഷം സ്റ്റേജിലേക്കു കയറി മോഹന്‍ലാലിന് അടുത്ത് എത്താന്‍ ശ്രമിച്ച അലന്‍സിയറെ ചലച്ചിത്ര അക്കാദമി സെക്രട്ടറി മഹേഷ് പഞ്ചുവും പൊലീസും ചേര്‍ന്നു തടയുകയും സ്റ്റേജിനു പുറകിലേക്കു കൂട്ടിക്കൊണ്ടുപോവുകയും ചെയ്തു.
മുഖ്യമന്ത്രി പിണറായി വിജയനും മറ്റ് മന്ത്രിമാരും വേദിയില്‍ ഇരിക്കുമ്പോഴായിരുന്നു അലന്‍സിയറുടെ പ്രതിഷേധം. സംഭവത്തെ കുറിച്ച് ഓര്‍മ്മയില്ല എന്നായിരുന്നു അലന്‍സിയറുടെ ആദ്യ പ്രതികരണം. മോഹന്‍ലാലിനെതിരായല്ല, മുഖ്യമന്ത്രിക്കും സര്‍ക്കാരിനും എതിരായി ആയിരുന്നു തന്റെ പ്രതിഷേധം എന്നായിരുന്നു അലന്‍സിയര്‍ പറഞ്ഞത്. വലിയ പ്രതിഷേധമാണ് സംഭവത്തില്‍ അലന്‍സിയര്‍ക്ക് നേരെ ഉയര്‍ന്നത്‌
Discussion about this post