വിമാനയാത്ര സ്വപ്നംപോലും കാണാൻ പറ്റാത്ത 70 കുട്ടികൾക്കായി സൗജന്യ വിമാനയാത്ര ഒരുക്കി തമിഴ് സൂപ്പർതാരം സൂര്യ. താരം പ്രധാനവേഷത്തിലെത്തുന്ന സൂരറൈ പോട്ര് എന്ന ചിത്രത്തിന്റെ പ്രമോഷന്റെ ഭാഗമായാണ് കുട്ടികൾക്കായി ഈ സ്വപ്നയാത്ര. തമിഴ്നാട്ടിലെ വിവിധ സർക്കാർ സ്കൂളിലെ കുട്ടികളാണ് അവരുടെ മാതാപിതാക്കൾക്കൊപ്പം യാത്ര ചെയ്തത്.
വിമാനത്തില് ഇതുവരെ കയറാത്ത 70 കുട്ടികള്ക്ക് സൗജന്യ വിമാനയാത്ര ഒരുക്കിയത്. സൂര്യയും ചിത്രത്തിലെ മറ്റ് താരങ്ങളും കുട്ടികൾക്കൊപ്പം യാത്രയ്ക്ക് ഉണ്ടായിരുന്നു. ഏകദേശം 30 മിനിറ്റോളം ഇവർ സൂര്യയ്ക്കൊപ്പം ആകാശയാത്ര ചെയ്തു. കൂടാതെ സുരറൈ പോട്ര് എന്ന സിനിമയിലെ പുതിയ ഗാനവും ഈ സ്പൈസ് ജെറ്റ് ബോയിങ് 737 എയര് ക്രാഫ്റ്റില് വെച്ച് റിലീസ് ചെയ്തു
സിനിമയുടെ അണിയറ പ്രവര്ത്തകര് കുട്ടികൾക്കായി ഉപന്യാസ മത്സരം നടത്തിയിരുന്നു. മനസ്സിലെ ഏറ്റവും ഇഷ്ടപ്പെട്ട സ്വപ്നത്തെക്കുറിച്ചോ ലക്ഷ്യത്തെക്കുറിച്ചോ എഴുതുക എന്നതായിരുന്നു മത്സരം.
സൂര്യയുടെ മൂപ്പത്തിയെട്ടാമത്തെ ചിത്രമായ സൂരറൈ പോട്രിൽ മലയാളി താരം അപര്ണ മുരളിയാണ് നായിക. 2ഡി എന്റര്ടൈന്മെന്റ്സും സീഖ്യാ എന്റര്ടെയ്ന്മെന്റിന്റെ ബാനറില് ഗുനീത് മോംഘയും ചേര്ന്നാണ് ചിത്രം നിര്മ്മിക്കുന്നത്. സുധ കൊങ്ങര സംവിധാനം ചെയ്യുന്ന ചിത്രം ഫെബ്രുവരി 21 ന് ആണ് റിലീസ് ചെയ്യുന്നത്.
എയര് ഡെക്കാന് സ്ഥാപകന് ക്യാപ്റ്റന് ജി.ആര്. ഗോപിനാഥിന്റെ ജീവിത കഥയെ അടിസ്ഥാനമാക്കിയാണ് ചിത്രം നിര്മിച്ചിരിക്കുന്നത്. മോഹന് റാവു, പരേഷ് റാവല്, ജാക്കി ഷ്രോഫ് എന്നിവരാണ് ചിത്രത്തിലെ മറ്റ് താരങ്ങള്. ജി.വി. പ്രകാശാണ് സംഗീതം ഒരുക്കുന്നത്.
Discussion about this post