കൊച്ചി: തിരുവനന്തപുരം വിമാനത്താവളത്തിലൂടെയുള്ള സ്വര്ണ്ണക്കടത്ത് കേസില് സംസ്ഥാന ഐടി വകുപ്പിലെ ഉദ്യോഗസ്ഥയും മുന് കോണ്സുലേറ്റ് ജീവനക്കാരിയുമായ സ്വപ്നാ സുരേഷാണ് മുഖ്യകണ്ണിയെന്ന് റിപ്പോര്ട്ടുകള് .കേസിലെ പ്രതി ,സരിത്തിന്റെ ചോദ്യം ചെയ്യല് കൊച്ചിയില് പുരോഗമിക്കുകയാണ്. കേസില് സ്വപ്ന സുരേഷിന്റെ പങ്ക് വെളിപ്പെടുത്തിയതും സരിത് ആണ്.
സ്വപ്ന ഒളിവിലാണെന്നാണ് കസ്റ്റംസ് നല്കുന്ന വിവരം. സ്വപ്ന സുരേഷിനെ കേന്ദ്രീകരിച്ചും അന്വേഷണം പുരോഗമിക്കുകയാണ്. പിടിയിലായ പ്രതിയെ റോ, ഇന്റലിജന്സ് ബ്യൂറോ ഉദ്യോഗസ്ഥര് ചോദ്യം ചെയ്യും.കൊച്ചിയിലെ കസ്റ്റംസ് പ്രിവന്റീവ് കമ്മീഷണര് ഓഫീസിലാണ് സരിതിനെ ചോദ്യം ചെയ്യുന്നത്. യുഎഇ കോണ്സുലേറ്റ് കാര്ഗോയുടെ മറവിലായിരുന്നു സ്വര്ണക്കടത്ത്. യുഎഇ കോണ്സുലേറ്റിലെ മുന് പിആര്ഒ ആയിരുന്ന സരിത്ത് പിന്നീടും ഈ ബന്ധങ്ങള് ദുരുപയോഗിക്കുകയായിരുന്നു. ഒരു തവണ സ്വര്ണ്ണം കടത്തിയാല് ഇരുപത്തിയഞ്ച് ലക്ഷം വരെയാണ് സരിത്തിന് ഇടപാടുകാരില് നിന്ന് ലഭിച്ചിരുന്നത്. സ്വര്ണ കടത്തില് പങ്കാളികളായ മറ്റുള്ളവരെ കുറിച്ചുള്ള വിവരങ്ങളും ഇയാള് ചോദ്യം ചെയ്യലില് കസ്റ്റംസിന് നല്കി.
കേരളത്തില് വിമാനത്താവളം കേന്ദ്രീകരിച്ച് നടത്തിയ ഏറ്റവും വലിയ സ്വര്ണവേട്ടയാണ് തിരുവനന്തപുരത്ത് കഴിഞ്ഞ ദിവസം നടന്നത്. 30 കിലോ സ്വര്ണമാണ് കസ്റ്റംസ് അധികൃതര് കണ്ടെത്തിയത്. ഒരു രാജ്യം മറ്റൊരു രാജ്യത്തുള്ള തങ്ങളുടെ എംബസിയിലേക്കോ കോണ്സുലേറ്റിലേക്കോ അയയ്ക്കുന്ന ലഗേജിന് ലഭിക്കുന്ന നയതന്ത്ര പരിരക്ഷയാണ് പ്രതികള് സ്വര്ണ്ണക്കടത്തിനായി ഉപയോഗിച്ചത്. ഇവ സുരക്ഷാ ഉദ്യോഗസ്ഥര്ക്ക് പിടിച്ചെടുക്കാനോ പരിശോധിക്കാനോ കഴിയില്ല. ആവശ്യമെങ്കില് കേന്ദ്ര വിദേശകാര്യ മന്ത്രാലയത്തിന്റെ പ്രത്യേക അനുമതിയോടെ വേണം പരിശോധന നടത്താന്.
Discussion about this post