തിരുവനന്തപുരം : തിരുവനന്തപുരം വിമാനത്താവളം വഴി സ്വര്ണം കടത്തിയ കേസിലെ പ്രതികളായ സ്വപ്ന സുരേഷിനും സന്ദീപ് നായര്ക്കും വേണ്ടി തിരച്ചില് ശക്തമാക്കി കസ്റ്റംസ്.ബ്രൈമൂര്, മങ്കയം മേഖലയില് സ്വപ്നയെ കണ്ടെന്ന മൊഴിയുടെ അടിസ്ഥാനത്തില് ഇവിടെയും പോലീസ് പരിശോധന നടത്തി.ഇവിടങ്ങളിലെ ലയങ്ങളിലും പൂട്ടിക്കിടക്കുന്ന വീടുകളിലും പൊലീസ് പരിശോധന നടത്തി.
സന്ദീപിന്റെയും സൂരജിന്റെയും ഭാര്യമാരുടെ രഹസ്യമൊഴിയും പോലീസ് രേഖപ്പെടുത്തും.ഇരുവരും കസ്റ്റംസിന് മൊഴി നല്കിയിട്ടുണ്ട്. ഇതിന്റെ അടിസ്ഥാനത്തിലാണ് അന്വേഷണം നീങ്ങുന്നത്.സംസ്ഥാനത്തെ ചില ഉന്നത ഉദ്യോഗസ്ഥരുടെ സഹായം ഇവര്ക്ക് ലഭിക്കുന്നുണ്ടെന്ന മൊഴി അന്വേഷണ സംഘത്തിനു ലഭിച്ചിട്ടുണ്ട്.
പ്രതികള്ക്ക് ഈ ഉന്നത ഉദ്യോഗസ്ഥര് സഹായം നല്കുകയും, കസ്റ്റംസിന് വിവരം നല്കാതിരിക്കാന് സമ്മര്ദ്ദം ചെലുത്തുകയും ചെയ്തെന്നും വിവരം ലഭിച്ചിട്ടുണ്ട്. ഇതിന്റെ അടിസ്ഥാനത്തില് അഞ്ച് ഉന്നത ഉദ്യോഗസ്ഥരുടെ പങ്കും ദേശീയ അന്വേഷണ ഏജന്സി ( എന്ഐഎ) അന്വേഷിക്കുന്നുണ്ട്.
രണ്ട് ഐപിഎസ് ഉദ്യോഗസ്ഥരെയും ഒരു ഐഎഎസ് ഉദ്യോഗസ്ഥരെയും തിരുവനന്തപുരം വിമാനത്താവളത്തിലെ കാര്ഗോ കോംപ്ലക്സുമായി ബന്ധപ്പെട്ട രണ്ട് ഉന്നത ഉദ്യോഗസ്ഥരുമാണ് എന്ഐഎയുടെ നിരീക്ഷണത്തിലുള്ളത്.ഇവരെ ഉടന് തന്നെ ചോദ്യം ചെയ്യുമെന്നാണ് സൂചന
അതിനിടെ 2014 ല് സ്വര്ണക്കടത്തുകേസില് സന്ദീപ് പിടിയിലായിരുന്നു. പൂജപ്പുരയില് താമസിച്ചിരുന്നപ്പോള് ഇയാള് അന്വേഷണസംഘത്തെ വെട്ടിച്ച് രക്ഷപ്പെടുകയായിരുന്നു. നെടുമങ്ങാട് മേലാങ്കോടും പിന്നീട് മഞ്ചയിലേക്കും ഇയാള് താമസം മാറ്റിയിരുന്നു.
സന്ദീപിന് കോഴിക്കോട്ടും വന് സുഹൃദ് വലയം ഉള്ളതായി കസ്റ്റംസിന് സൂചന ലഭിച്ചിട്ടുണ്ട്. സ്വപ്ന രക്ഷപ്പെട്ടെന്ന് സംശയിക്കുന്ന കാര് കടന്നുപോയ വഴികളിലും പൊലീസ് പരിശോധന നടത്തി.കാറില് സ്വപ്നയെക്കൂടാതെ ഒരു സ്ത്രീ കൂടി ഉണ്ടായിരുന്നതായി റിപ്പോര്ട്ടുകളുണ്ട്.പാലോട് നിന്നും കുളത്തൂപ്പുഴ വഴി തമിഴ്നാട്ടിലേക്ക് കടന്നുവെന്നാണ് സൂചന.
Discussion about this post