“ഞാൻ മോഹൻലാലാണ് “! പതിഞ്ഞ ശബ്ദത്തിൽ വിനയത്തോടെ മറുപുറത്തു നിന്നും ശബ്ദിച്ചു’; ജീവിതത്തിൽ എക്കാലവും മനസിലും ഫോണിലും താൻ സൂക്ഷിക്കുന്ന ഒരു നിമിഷത്തിന്റെ സ്ക്രീൻ ഷോട്ട് പങ്കുവെച്ച് ഒരു കടുത്ത മോഹൻലാൽ ആരാധകൻ

61-ാം പിറന്നാൾ ആ​ഘോഷിക്കുന്ന മലയാളത്തിന്റെ പ്രിയതാരം മോഹൻലാലിന് ജന്മദിനാശംസകൾ നേർന്ന് ​ഹൃദയത്തിൽ സൂക്ഷിച്ച് വച്ചിരിക്കുന്ന അനുഭവം പങ്കുവെച്ച് ഒരു കടുത്ത മോഹൻലാൽ ആ​രാധകൻ.

ഫേസ്ബുക്ക് പോസ്റ്റ്:

ജീവിതത്തിൽ എക്കാലവും മനസിലും ഫോണിലും ഞാൻ സൂക്ഷിക്കുന്ന ഒരു നിമിഷത്തിന്റെ സ്ക്രീൻ ഷോട്ട് ആണ് ഇത് !
ഇത് വരെ ഞാൻ ആരോടും പങ്കുവെച്ചിട്ടില്ലാത്ത ഒരു സ്ക്രീൻ ഷോട്ട് .
ഒരു അനുഭവം പറയാം
ഒരിക്കൽ ഓർക്കാപ്പുറത്താണ് ഇങ്ങനെ ഒരു മെസ്സേജ് എന്റെ ഫോണിലേക്കു വരുന്നത് . വിശ്വസിക്കണോ വേണ്ടയോ എന്ന് അറിയാതെ ഒന്നിലധികം തവണ ഞാൻ അത് നോക്കി . ആരെങ്കിലും പറ്റിച്ചതാണോ എന്ന് അറിയാൻ വീണ്ടും നോക്കി .
ഉത്തരം അയച്ചു , നിമിഷങ്ങൾക്കുള്ളിൽ എന്റെ ഫോൺ ശബ്ദിക്കാൻ തുടങ്ങി . ഫോൺ ഉപയോഗിക്കാൻ തുടങ്ങി വർഷം ഇത്ര ആയെങ്കിലും ആദ്യമായാണ് ഒരു കാൾ വരുമ്പോ ചങ്കിടിപ്പ് . സ്‌ക്രീനിൽ എഴുതി കാണിച്ചു .. ‘മോഹൻലാൽ കാളിങ് ‘ .
ആദ്യം ഫോൺ എടുത്തില്ല , എടുക്കണോ വേണ്ടയോ എന്നറിയാതെ നോക്കി ഇരുന്നു .. എന്തോ ഒരു ആവേശത്തിൽ പെട്ടെന്ന് ഞാൻ ടോക്ക് ബട്ടൺ പ്രസ് ചെയ്തു .
മെസ്സേജിൽ കണ്ടത് പോലെ തന്നെ , പതിഞ്ഞ ശബ്ദത്തിൽ വിനയത്തോടെ മറുപുറത്തു നിന്നും ഒരാൾ ശബ്ദിച്ചു ,”ഞാൻ മോഹൻലാലാണ് “! പിന്നീട് അദ്ദേഹം ഏറെ നേരം സംസാരിച്ചത് ഇന്നും ഞാൻ എന്റെ സ്വകാര്യ സമ്പാദ്യമായി ഹൃദയത്തിൽ സൂക്ഷിക്കുന്നു .
ലണ്ടനിൽ ‘ ഡ്രാമ ‘ എന്ന ചിത്രത്തിന്റെ ഷൂട്ടിംഗ് ഇടവേളകളിൽ എപ്പോളോ ആണ് അദ്ദേഹം വിളിച്ചത് , ഏറെ നേരം സംസാരിച്ചു !
അക്കാലത്തു ഒരു മെയ് 21 നു , ‘ആരാധ്യനായ മോഹൻലാലിന് ഒരു ആരാധകൻ എഴുതുന്ന കുറിപ്പ് ….’ എന്ന് തുടങ്ങി ‘എന്ന് ‘നല്ല’ മോഹൻലാൽ സിനിമകളുടെ കടുത്ത ആരാധകൻ ‘ എന്ന് പറഞ്ഞു അവസാനിക്കുന്ന ഒരു ഓഡിയോ ട്രിബ്യുട് , റേഡിയോയിൽ ഞാൻ അവതരിപ്പിച്ചിരുന്നു.
ആദ്യമായാണ് അങ്ങനെ ഒരു ശ്രമം റേഡിയോയിൽ പരീക്ഷിക്കുന്നത് . പിന്നീട് പലരും അത് ആവർത്തിച്ചപ്പോൾ സന്തോഷം തോന്നി .
ലാലേട്ടൻ അന്ന് വരെ അഭിനയിച്ച സിനിമകൾ എന്നിലെ ആരാധകനെ എങ്ങനെ ഒക്കെ സ്വാധീനിച്ചു എന്നതിന്റെ ഒരു ശബ്ദാവിഷ്കാരം
ആയിരുന്നു അത് . അദ്ദേഹത്തോടുള്ള അടങ്ങാത്ത സ്നേഹവും ,ആരാധനയും
അമർഷവും വിമർശവും എല്ലാം ചേർന്ന ഒരു കുറിപ്പ് !പക്ഷെ അതെല്ലാം അദ്ദേഹം ഹൃദ്യമായി സ്വീകരിച്ചു.
പിറന്നാൾ ദിവസം ഒരാളോടുള്ള ഇഷ്ടവും അനിഷ്ടവും ചേർത്ത് ഒരു റേഡിയോ കുറിപ്പ് അവതരിപ്പിച്ചതിന്റെ ഇഷ്ടക്കുറവായിരിക്കാം എന്നെ വിളിക്കാൻ ഉള്ള കാരണം എന്നാണു ഞാൻ ആദ്യം കരുതിയിരുന്നത് . പക്ഷെ ഫോൺ എടുത്ത ഉടൻ അദ്ദേഹം പറഞ്ഞ ആദ്യത്തെ വാചകം തന്നെ എന്നെ കിലുക്കത്തിലെ കിട്ടുണ്ണി ആക്കി .
‘ഞാൻ കേട്ടു ,I became emotional’ എന്നാണു ആദ്യം പറഞ്ഞത് , ആ ഒരു വരി മതി ആയിരുന്നു എനിക്ക് ഒരു ആയുസ്സു മുഴുവൻ നെഞ്ചിൽ സ്ഫടികം പോലെ സൂക്ഷിക്കാൻ .
“ഒരു തിരനോട്ടം പോലെ ജീവിതത്തിലേക്കുള്ള ഒരു തിരിഞ്ഞു നോട്ടമായിരുന്നു നിങ്ങളുടെ ഈ ഓഡിയോ
ട്രിബ്യുട് ” എന്ന് പറഞ്ഞു കൊണ്ട് ആണ് ആ കാൾ അദ്ദേഹം അവസാനിപ്പിച്ചത് .
ഇത് ഞാൻ റേഡിയോയിൽ എഴുതി അവതരിപ്പിക്കുന്നത് 2018 ലാണ് .ഇന്നേക്ക് മൂന്നു വർഷം മുമ്പ് ,മറ്റൊരു
ലാലേട്ടൻ ജന്മദിനത്തിൽ .
കാലം മാറി ,കാലഘട്ടം മാറി .
പക്ഷെ അദ്ദേഹത്തോടുള്ള അടങ്ങാത്ത അഭിനിവേശം മലയാളിക്ക് അവസാനിക്കാത്തതു കൊണ്ട് ഒരുപക്ഷെ ഇന്നത്തെ ദിവസം നിങ്ങളും
ഇൻസ്റ്റയിലൂടെയോ വാട്സാപ്പിലൂടെയോ ഫേസ്ബുക്കിലൂടെയോ YouTube ലോ
ആ ഓഡിയോ‌ ട്രിബ്യുട് മുഴുവനായോ കഷ്ണങ്ങളായോ കേട്ടേക്കാം , കേട്ടിരിക്കാം .
കഴിഞ്ഞു പോയ എന്റെ റേഡിയോ ജീവിതയത്തിൽ ഞാൻ എന്നും ഓർക്കുന്ന ഒരു ദിവസമാണ് ഇന്ന് .
അതിനു കാരണം ദിവസങ്ങൾക്കു ശേഷം എനിക്ക് വന്ന ആ മെസ്സേജ് ആണ് .
സ്വന്തം പേര് പറഞ്ഞു പരിചയപ്പെടുത്തി വിളിക്കാൻ അനുവാദം ചോദിച്ചു മെസ്സേജ് അയക്കുന്നത് മര്യാദ മാത്രം ആയിരിക്കാം . ശെരി ആണ് , പക്ഷെ ആ ഒരു ചെറിയ വരിയിൽ നിന്നും ജീവിതത്തിൽ പഠിക്കാൻ ഒരു വലിയ പാഠം കൂടിയാണ് അദ്ദേഹം പകർന്നു തന്നത് .
ഇനി രാജു മോൻ ,’അങ്കിൾ ആരാണ് ‘എന്ന് ചോദിക്കുമ്പോ നമുക്ക് പറയാം..
ദൃശ്യത്തിലൂടെ മലയാള സിനിമയ്ക്കു ലോക സിനിമയിൽ വിപണനത്തിന്റെ വിസ്മയം സൃഷ്‌ടിച്ച , ലൂസിഫറിലൂടെ
OTT യിൽ കച്ചവടത്തിന്റെ കിരീടം ചൂടിയ , ആദ്യമായി നൂറു കോടിയുടെ പുലി പുറത്തു കേറിയ , നാളത്തെ സിനിമയുടെ നിധിപ്പെട്ടി കാക്കുന്ന ‘ബാറോസ്‘ എന്ന ഭൂതമാണ് ഞങ്ങളുടെ
മോഹൻലാൽ എന്ന് .
സിനിമയുടെ എംപുരാൻ ആയും കലയുടെ തമ്പുരാൻ ആയും ഇനിയും ഏറെ കാലം വാഴട്ടെ എന്ന് ആശംസിച്ചു കൊണ്ട് നിർത്തട്ടെ
സ്നേഹത്തോടെ
ഷാൻ
എന്ന് ,
എന്നും ‘നല്ല’ മോഹൻലാൽ സിനിമകളുടെ കടുത്ത ആരാധകൻ