കാബൂള്‍: അഫ്ഗാനിസ്താനില്‍ അധികാരം പിടിച്ചെടുത്തതിനു പിന്നാലെ രാജ്യത്തെ സര്‍ക്കാര്‍ ജീവനക്കാര്‍ക്ക് താലിബാന്‍ പൊതുമാപ്പ് പ്രഖ്യാപിച്ചു. ജീവനക്കാര്‍ ഉടന്‍ ജോലിക്ക് ഹാജരാകണമെന്നാണ് നിര്‍ദേശം. ജനജീവിതം സാധാണ നിലയിലേക്ക് മടങ്ങണമെന്നും താലിബാന്‍ പ്രസ്താവനയില്‍ പറയുന്നു.
കാബുള്‍ വിമാനത്താവളത്തിന്റെ പ്രവര്‍ത്തനം പുനരാരംഭിച്ചതോടെ വിദേശ രാജ്യങ്ങള്‍ ഉദ്യോഗസ്ഥരെ മടക്കിക്കൊണ്ടുപോകുകയാണ്. വിവിധ രാജ്യങ്ങളില്‍ അഭയം തേടി നൂറുകണക്കിന് അഫ്ഗാനിസ്താന്‍ പൗരന്മാരാണ് വിമാനത്താവളത്തില്‍ തമ്പടിച്ചരിക്കുന്നത്. താലിബാന്‍ കര്‍ഫ്യൂ പ്രഖ്യാപിച്ചിട്ടുണ്ടെങ്കിലും വിമാനത്താവളത്തിലേക്ക് ആളുകള്‍ എത്തിക്കൊണ്ടിരിക്കുകയാണ്.
ഗതാഗത നിയമം ലംഘിച്ചുവെന്ന് ആരോപിച്ച്‌ ഹമീദ് കര്‍സായി രാജ്യാന്തര വിമാനത്താവളത്തിനു പുറത്ത് ജനങ്ങള്‍ക്ക് നേരെ വെടിവയ്പ്പുണ്ടായെന്ന് റിപ്പോര്‍ട്ടുണ്ട്. കഴിഞ്ഞ ദിവസം വിമാനത്താവളത്തിലെ തിരക്ക് നിയന്ത്രിക്കാന്‍ നടത്തിയ വെടിവയ്പില്‍ ഏഴ് പേര്‍ മരിച്ചിരുന്നു.
അഫ്ഗാനില്‍ നിന്നും പ്രാണരക്ഷാര്‍ത്ഥം രക്ഷപ്പെടുന്ന സൈനികരുടെ വിമാനങ്ങള്‍ നിര്‍ബന്ധിതമായി ഇറക്കിയതായി ഉസ്ബക്കിസ്താന്‍ വ്യക്തമാക്കി. 22 സൈനിക വിമാനങ്ങളും 24 ഹെലികോപ്ടറുകളുമാണ് സൈനികര്‍ രക്ഷപ്പെടാന്‍ ഉപയോഗിച്ചത്. ഇതില്‍ ഒരെണ്ണം കഴിഞ്ഞയാഴ്ച ഉസ്ബക്ക് യുദ്ധവിമാനവുമായി കൂട്ടിയിടിച്ച്‌ തകര്‍ന്നിരുന്നു. അതിര്‍ത്തി കടന്നതിന് ഒരു വിമാനം വെടിവച്ചതിട്ടതായി ഉസ്ബക്ക് പ്രതിരോധമന്ത്രാലയം വ്യക്തമാക്കിയിരുന്നു. 585 സൈനികര്‍ വ്യോമമാര്‍ഗവും 158ലേറെ പേര്‍ കാല്‍നടയായും ഞായറാഴ്ച അതിര്‍ത്തി കടന്നുവെന്ന് ഉസ്ബക്ക് പ്രോസിക്യൂട്ടറെ ഉദ്ധരിച്ച്‌ ഒരു ടര്‍ക്കിഷ് മാധ്യമം റിപ്പോര്‍ട്ട് ചെയ്യുന്നു.
Discussion about this post