കീവ്: റഷ്യ ഉക്രെയ്നിൽ ഫോസ്ഫറസ് ബോംബുകൾ പ്രയോഗിച്ചതായി ഉക്രെയ്ൻ പ്രസിഡന്റ് വൊലോഡിമിർ സെലെൻസ്കി. ആക്രമണത്തിൽ മുതിർന്നവരും കുട്ടികളും ഉൾപ്പെടെയുള്ളവർ കൊല്ലപ്പെട്ടതായും നാറ്റോ സഖ്യത്തിനു നൽകിയ വീഡിയോ സന്ദേശത്തിൽ െസലെൻസ്കി ആരോപിച്ചു.
ഈ സാഹചര്യത്തിൽ ഉക്രെയ്ന് നാറ്റോ അടിയന്തരമായി സൈനിക സഹായം നൽകണമെന്നും സെലെൻസ്കി ആവശ്യപ്പെട്ടു. റഷ്യ അവരുടെ മുഴുവൻ ആയുധശേഖരവും നിയന്ത്രണങ്ങളില്ലാതെ ഞങ്ങൾക്കെതിരെ ഉപയോഗിക്കുകയാണ്. ഉക്രെയ്നിലെ ജനങ്ങളെയും നഗരങ്ങളെയും രക്ഷിക്കാൻ അനിയന്ത്രിതമായ സൈനിക സഹായം ആവശ്യമാണെന്നും സെലെൻസ്കി അഭ്യർത്ഥിക്കുന്നു.
ഓക്സിജനുമായി സമ്പര്ക്കത്തില് വരുമ്പോള് തീപിടിക്കുകയും ഗുരുതരമായ പൊള്ളലേല്ക്കുകയും ചെയ്യുന്നവയാണ് ഫോസ്ഫറസ് ബോംബുകൾ. ഇവ പൊടിയായാണ് അന്തരീക്ഷത്തിൽ വ്യാപിക്കുന്നത്. ഫോസ്ഫറസ് ബോംബ് പ്രയോഗിച്ചു എന്ന ഉക്രെയ്ന്റെ ആരോപണത്തോട് റഷ്യ പ്രതികരിച്ചിട്ടില്ല.
